ATUALITÂT. Progjets, contats e ideis sul avignî dai cuasi 200 Fogolârs Furlans presints tal mont

ULTIME ORE: Intant che o jerin in stampe e je rivade la notizie de elezion dal gnûf President di Ente Friuli nel Mondo, Piero Pittaro 76 agns, imprenditôr vitivinicul che al cjape il puest di Giorgio Santuz.
Gerussi, cuâi nestris emigrants isal stât a cjatâ tai ultins mês?
O soi stât sedi in Argjentine là che si faseve fieste pai 100 agns di Sant Durì (Colonia Vicente Agüero, ndr), un paisut che un secul indaûr si è distacât di Colonia Caroya. In Australie invezit a vevin inmaneât l’incuintri di ducj i Fogolârs di là vie. Duncje l’Ente Friuli nel Mondo al è stât invidât in chestis dôs ocasions impuartantonis.
Parcè chescj viaçs?
Cuant che o soi jentrât tal Ente Friuli nel Mondo o ai volût scomençâ a cognossi daurman la realtât dai Fogolârs Furlans sparniçâts in Italie, in Europe e tal mont in gjenerâl, par vê une testemoneance direte e scoltâ lis richiestis par po dopo pensâ a progjets condividûts.
Cualis lis sôs impressions?
O ai vût mût di vê contat cu lis gnovis gjenerazions e o ai viodût un interès pal Friûl. In Argjentine si è aromai ae cuarte gjenerazion che e domande adun cu la tierce di discuvierzi il Friûl di vuê, no si contentin plui di ce che ur contin i nonos e i gjenitôrs. Chescj zovins a vuelin cognossi la realtât economiche, il disvilup, il paisaç, lis gnovis tindincis de culture furlane. A cheste richieste o vin di rispuindi.
Cuâi i problemis in chescj Fogolârs?
E je une ricercje di passâ il testemoni des presidencis dai Fogolârs. La plui part di chei che ju vuidin a àn aromai fat la lôr strade e cumò a volaressin cedi il pas a fuarcis zovinis. In tancj a son daûr a cirî il ricambi gjenerazionâl, lu ai viodût propit cui miei voi a Buenos Aires. Un altri probleme al è chel de gjestion des sedis. Cun di fat se in Canada e in Australie, par condizions economichis plui buinis, a rivin a frontâ lis spesis e a sfrutâ i spazis di chestis struturis, par esempli cu la realizazion di ristorants e di salis di zûc dentri tai locâi, in Argjentine la situazion e je plui grivie. Po dopo une altre robe che mi à impressionât e jê che che in Argjentine e àn une imagjine di nô e dal Friûl che e je vecje. Tes cjartis gjeografichis che a àn là vie de nestre Regjon no son segnadis nancje lis autostradis! Duncje a Buenos Aires, ma po dopo ancje in Australie o ai cjapât sù la richieste di realizâ videos e documentaris, che a mostrin e a fevelin de realtât di ca.
Ce vêso intenzion di fâ tal concret par lâ incuintri a chestis esigjencis?
Poiâ simpri di plui la pussibilitât che chescj zovins a vegnin ca di nô par 15-20 dîs, chest mal àn domandât sedi in Argjentine che in Australie. E je stade la richieste che l’Ente Friuli nel Mondo si fâsi promotôr di chestis iniziativis, in plui di chês che za a son cu la Universitât dal Friûl e cul Istitût Paolo Diacono. Ma jo o soi daûr a pensâ ancje a scambis jenfri personis di Fogolârs difarents, che a vivin in puescj difarents. In chest câs o pensi che prime si vedi di prontâ un percors di preparazion al viaç in tiere furlane. Ma parcè no pensâ a un de Australie che al va ospit a cjase di un furlan in Argjentine e po dopo il contrari? O crôt che al judarès il dialic jenfri i Fogolârs stes e jenfri i furlans che a son plui tal forest che in Friûl. O sin 6 milions in dut e visìnsi che 5 milions di lôr no vivin chenti.
Ce interès isal pe nestre lenghe di bande des personis che a vivin tal forest?
In Argjentine ce che mi à maraveât al è stât cjatâ, te sede di Buenos Aires, dôs classis li che ta une si insegnave il talian e ta chê altre il furlan. Po ben la lezion furlane e jere chê cun plui arlêfs. Pardut mi àn domandât di inmaneâ cors di furlan. Al è stât un fren di bande de gjenerazion di mieç, che e veve blocât l’ûs de marilenghe, cumò però a àn gole di tornâ a cjapâ contat e di imparâle, sì che duncje ancje di bande dai zovins che a son sburtâts di une cierte curiositât. Un jutori in cheste direzion al è dal sigûr vignût cul cors curât dal mestri Fausto Zoff, in linie sul nestri sît internet (www.friulinelmondo.com).
Cuâl progjet i plasaressial che al vignìs fat in curt?
O volarès che si creassin redazions internazionâls pal nestri periodic, in maniere che lis pagjinis a vegni curadis tal forest, doprant la lenghe che si vûl, par che chestis realtâts a vedin une vôs e si cognossin jenfri di lôr. Po dopo o pensi a un gjornâl plui dinamic e viert che al vedi dentri ancje propuestis di scambi e di incuintris jenfri cui che magari al met a disposizion la sô cjase par ospitâ cualchidun. O vin di judâ i «furlans forescj» a cognossisi jenfri di lôr e a cognossi il Friûl di vuê.
Elena Zanussi