ATUALITÂT. Teatri par furlan, ma par cui?

In ocasion de prime dal so spetacul “Aghe e siums” che al rapresente la conclusion di agns di impegns a pro dal teatri par furlan, Bepi Agostinis al à ricevût dal President de Provincie di Udine Pieri Fontanini une targhe cuntune dediche une vore significative “Une vite pal Friûl parcè il Friûl al è la tô vite”.
Da la cognossince cun Nico Pepe, fint a la ultime bataie pe istituzion dal Teatri stabil in lenghe furlane, Bepi Agostinis no si è sparagnât lavorant dì par dì, cence pôre di frontâ cui che al volarès incjantonâ il furlan a robe di folclôr e di museu. La ultime jessude indelicade e je dal atôr Luciano Virgilio, in regjon par “Cosí è se vi pare”. Intune interviste, a la domande su ce che al pensàs dal progjet sul teatri stabil par furlan, al à taiât curt domandantsi, stant che al esist za un teatri stabil dal Friûl-VJ, «par cui?».
Alore o zirìn la domande a Bepi Agostinis, «par cui?» e parcè covential un teatri stabil par furlan?
Di sigûr nol è par chei che lavorant fûr dal Friûl, no si son mai visâts des lôr lidrîs. E Virgilio al è un di chei. E i rispuint che il Teatri Stabil F-VJ nol à nuie di furlan, duncje al è just che ancje il Friûl al vedi il so Teatri Stabil, no dome, impuartant, par dâ lavôr ai nestri atôrs professioniscj, ma soredut parcè che al è un mieç impuartant di comunicazion par valorizâ la nestre lenghe e la nestre culture.
Ce pensial di chei furlans che cjatade furtune fûr dal Friûl no ricognossin il valôr de culture e de lenghe furlane?
A son personaçs che a varan vude fortune, magari scomençant cul morosâ cu la fie di cualchi grant atôr, pensant dome ae cariere, cence mai ricurdâ, simpri fevelant di Teatri, lis lidrîs di chel che i veve insegnât i prins pas, parcè ancje lui al à scomençât a Udin cui cors di dizion dal prof. Walter Faglioni. Tai agns cuant che al passave par Udin nol è mai lât a saludâlu e dîji graciis. O disarès ai furlans no stait a lâ a viodi i siei spetacui.
Ce pensial de Farie Teatrâl Furlane?
Beh, domandâmi de Farie daspò plui di 20 agns di bataie, al è come domandâ a un che al mûr di sêt se al à voie di bevi. La Farie al è il coronament, ancje se nol è un Teatri Stabil , ma une compagnie Stabile, e cui timps che a corin, al è un grant risultât. E al è sucedût graciis ai prins doi politics che a àn crodût ae mê bataie: il president Pieri Fontanini e la assessore ae culture Elene Lizzi de Provincie di Udin.
Cemût viodial il teatri di vuê?
Di sigûr, ancje cu la compagnie de Farie, alc di impurtant si è mot, soredut e fasarà pensâ di plui ancje i dramaturcs che i lôr tescj a podaran jessi raprensentâts no dome des filodramatichis, ma ancje di atôrs professioniscj, e nol è pôc. Duncje al sarà un Teatri plui vivarôs e o speri plui leât ai nestris timps

E cemût viodial il teatri di doman?
O pensi che cu la nassite de Farie, za cui doi spetacui realizâts, e je stade dimostrade la impuartance de Compagnie Stabile, viodût che fin cumò il Teatri professionist furlan si fondave su grups di 3 o 4 elements, e duncje a podevin fâ spetacui limitâts, ancje se pençs di cualitât, ma mai a lavôrs cun diviers atôrs, che di sigûr a podaressin dâ plui spetacolaritât e plui valôr al nestri Teatri.
Cul so ultin spetacul “Aghe e siums” aial pardabon saludadis lis senis teatrâls?
O soi rivât (fra pôcs mês) ai 80 agns, duncje e je ore di fermâsi, ma par dî la veretât plui che i agns, al è il probleme dai voi, che a stan lant e mi tocje tigniju cont. Ma di sigûr o starai sot ae Farie,
che e à di lâ indenant simpri pal miôr.
Cemût si isal cjatât cun Sonia Cossettini? Ce pensial di jê?
Le ai cognossude propit pe realizazion dal gno ultin spetacul. Un frute une vore furlane sedi come lenghe ma ancje come caratar, voie di lâ indenant cun cheste sô passion pal Teatri che i bruse dentri, e soredut i plasarès fâ alc di impuartant propit par furlan, Cumò le ai introdusude cul C.S.S. che e sta za fasint un lavôr pai fruts. E je zovine e à il timp di dimostrâ lis sôs siguris capacitâts. In bocje al lôf.
Vuelial dedicâ un pinsîr a Galliano Zof?
Galliano lu ai cognossût ae fin dai agns ‘70 propit par vie des sôs poesiis, e di chê volte o vin simpri vût un biel rapuart di stime. Grant pensadôr e studiôs, al fevelave ancje cun me, che no soi un studiât, cun semplicitât, e nol faseve mai pesâ il so savê. Un grant om de culture furlane che al à dât cence mai domandâ nuie.
Lui al jere grant amì di Arnalt Baracêt…
O ai vude la furtune di cognossîlu miôr, come segretari dal Comitât pe Autonomie e il rilanç dal Friûl. Un om furlan, sclet, che al à lavorât pal Friûl cuntun grant cûr e cuntune cjarie di furlanetât che al tacave ducj. La lezion che mi à lassât: “no stâ cjalâ il colôr politic di une persone, ma viôt dome se al lavore di cûr pal Friûl”.
Trop mancjal un come Nico Pepe?
Nico Pepe al è rivât une vore prime dal timp. Fevelâ di Teatri furlan professionist tai agns 70-80 al jere come lâ a cirî l’aur su la Tor. Ma lui al à vude la costance di semenâ e cui agns alc al è nassût. Se o vin un Compagnie Stabil di Teatri furlan, o vin di ricuardâsi che la idee le à vude lui.
Fevelant plui in gjenerâl, ce viodial tal destin de autonomie e dal Friûl?
Lu ai za dite altris voltis, ancje lant cuintri a cierts autonomiscj, nô o sarìn simpri sotans ai partîts talians, parcè che i nestris autonomiscj no àn la voie di metisi insieme, par vie che un al cjale a drete e chel altri a çampe, duncje no si pues stâ insieme. Duncje o vin dome di sperâ che un furlan di un partît talian al vedi un voli di rivuart pal nestri Friûl. ■
Christian Romanini