ATUALITÂT – Zico in Friûl: storie di un amôr

Cuant che in Friûl si pronuncie il non di Zico, a tantis personis ur pâr cuasi che il timp si sedi fermât. No je dome nostalgjie sportive di passe 20 agns fa (par altri, agns di ricuardâ), ma ancje tante ricognossince par un om, prime che par un campion, che al à lassât des nestris bandis une imagjin nete e umane, come che dome i grancj a san lassâ.
Storiis di balon si disarà. Ma no dome.
Zico e il Friûl, Zico e la int furlane che no lu à mai dismenteât. Cussì o jerin restâts cuant che tai prins agns ’80 il «Galinho» al zuiave tal Udin. Cussì la int e à tornât a saludâlu cuant che il 8 di Novembar stât al è tornât in Friûl, a Orsarie, in ocasion dai 25 agns dal Udinese Club de frazion di Premariâs, a lui intitulât.
UNE GRANDE FIESTE_ Un event che ducj a spietavin cun gole, cun passion, cun tante curiositât. Une fieste che, gjavâts i agns (a passin par ducj, ancje par Zico, che tra l’atri al à dite di sei a pene deventât nono), e à ricuardât i biei timps passâts. Par metile adun, al à coventât passe un an, come che al à dite te conference stampe il President dal Udinese Club di Orsarie Alessandro Scarbolo.
Par contâle si podarès ancje scomençâ de fin, cuant che te sale teatrâl di Orsarie si son cjatâts in tancj par spietâ la cerimonie uficiâl che e à dât uficialmentri a Zico la citadinance onorarie dal paîs furlan.
«Zico tu sês furlan cumò», al à vosât un om de platee, e dal moment si è jevât sù il coro di stadi che al faseve capî il preseament de int pal fat che Zico al fos pardabon un di nô.
ZORNADE EMOZIONANTE_ Si podarès contâ ancje – come che al à fat savê l’adet stampe dal AUC Gianluca Bertozzi che lu compagnave – che dal prin moment che al è rivât a Orsarie e fin cuant che al è tornât in albierc a durmî, aes dôs di gnot passadis, Zico nol à in pratiche fermât di strenzi mans, di fâ fotos cu la int e di firmâ autografs. «Une grande emozion, stâ a contat par dute la zornade cun Zico – al à dite Bertozzi –. Cuant che o soi lât insieme al president Scarbolo a cjolilu in aeropuart,  intal viodilu rivâ mi è vignût un grop di emozion che no podarai mai dismenteâ».
Bertozzi, tornant a rivivi la serade di Orsarie, al à ancje contât cualchi moment simpatic cul campion brasilian (vuê alenadôr dal Olympiacos Pireo in Grecie), sucedût fûr de cerimonie uficiâl,  come cuant che «il Galinho» i à firmade la maiute origjinâl dal Udin dai agns ’80.
E ae fin, al reste dome un piçul displasê pai tifôs che cun dute probabilitât no podaran mai viodi Zico sentât su la panchine dal Udin, tant che alenadôr. Di fat, al à dite che al à gust che i resti il biel ricuart di cuant che al zuiave. Pecjât, al ven di rispuindi. Ancje se tal balon, come te vite, al vâl il  mût di dî «mai dî mai…»!
Enrico Turloni