Ancje lis lûs rossis a tornin a impiâsi dopo de cuarantene

In chest numar o fevelìn di cemût che il Covid-19 al à condizionât in Austrie chê che e je gjeneralmentri definide, in maniere purtrop masse banâl, tant che la profession plui viere dal mont. Diferent che in Italie, in Austrie chest mistîr al è ricognossût e normât, e duncje i proviodiments dal guvier a àn interessât ancje chest setôr. L’argoment al è un pôc intrigôs, ma o ‘nt fevelìn par vie che l’implant viert di pueste cualchi an indaûr a pene di là dal confin, al cjape zornade cuasi dal dut cui clients dal Nord Est de Italie. Si che duncje, il lockdown tacât li di lôr ai 16 di Març, al à obleât la direzion a mandâ su la strade – si fâs par mût di dî, ben clâr! – lis sôs colaboradoris (culì o fevelìn al feminin parcè che la prostituzion e tocje pe plui part lis feminis, ma dut câs no in maniere esclusive).
◆ Duncje, tacant di chê zornade, cheste profession e je stade di fat improibide in dute la Austrie, e si trate di un afâr avonde penç, se si pense che dome a Viene a lavorin 3.500 prostitudis e i locâi interessâts a son 350; e che in dute la Austrie a son sù par jù 8.000. A son dutis iscritis aes cjamaris di cumierç locâls tant che libaris professionistis, e in cheste dificoltât – viodût il lôr mistîr particolâr – a son stadis fra lis categoriis che plui a àn patît. Ancje lôr a àn dut câs podût zovâsi dal jutori economic che il guvier al à inviât pe emergjence.
◆ Però, tal moment che altris setôrs a àn scomençât a movisi, al è stât clâr che chest al sedi stât un dai plui disvantazâts, cu la pôre di no podê tornâ a tacâ fin al Autun. Lis consecuencis si puedin imagjinâ cun facilitât e si stimin centenârs di rapuarts clandestins a paiament ogni dì dome a Viene. Ancje chest – e no dome la diminuzion dai infets – al à sburtât il guvier a molâ la brene.
E cussì, dai 8 di Jugn a àn tornât a tacâ in dute la Austrie lis visitis medichis obligatoriis pal setôr, cence contâ des regjistrazions aes cjamaris di cumierç e ai comissariâts di polizie, voris che si scuegnin fâ par vê un tessarin di ricognossiment. Une part des visitis medichis e va tornade a fâ ogni sîs setemanis, intant che ogni dodis si scuen fâ un prelêf di sanc par escludi infets di sifilide o HIV, e chest al vâl ancje cuant che no je la pandemie. Dome in chest mût si pues vê un timbri sul tessarin, par podê lavorâ in regule.
◆ Lis consecuencis de pandemie no son stadis di pôc par chestis personis, se o tignìn cont che tantis di lôr a son forestis, massime dal Est european, e che si son cjatadis cence un puest, e cence mieçs, par passâ cheste dade di timp. Une vore di lôr a vivin par solit intai bordei – là che tantis a àn ancje la residence uficiâl – e, par chel, chês che no son rivadis a tornâ intai lôr paîs a son stadis obleadis a sierâsi intes lôr stanziis, taponant ducj i lusôrs tant che in timp di vuere, par fâ viodi che i locâi a jerin sierâts.
◆ Par ce che al tocje lis regulis di rispietâ, ancje li si scomence de misurazion de temperadure al ingrès, e po dopo a àn fissât altris normis par cirî di garantî une situazion che e sedi il plui pussibil sigure pe salût des personis coinvolzudis. Par rispiet dai plui piçui, no contìn di ducj i repeçs che a àn cjatât fûr par tignî lis distancis di sigurece. Par chest o lassìn puest ae imagjinazion di ognun di voaltris. ❚