Clanfurt, la capitâl dal Land Carinzie, e pues infin svantâ, e pe prime volte intai siei luncs secui di storie, il titul di “citât metropolitane”, par vie che – in graciis dal fat che intal ultin an la popolazion e je incressude di 526 unitâts – si è superade la bramade misure di cent mil abitants. Di chest si indalegre dal sigûr il sindic Maria Luise Mathiaschitz, ma pe int de citât al cambiarà une vore pôc. Sul andament numeric de popolazion no influissin dome lis nassitis, ma ancje l’aflùs e il deflùs di students e di chei che a domandin asîl e, nancje dîlu, i decès. Propit par chest motîf, il status di citât metropolitane di Clanfurt al reste inmò sul ôr, stant che a Fevrâr di chest an la citât e veve 100.136 abitants. Bielzà intal 2016 – cun di fat – chest limit al fo tocjât in graciis dal rivâ di migrants, che daspò putrop si spostarin, fasint tornâ indaûr i numars e gjavant il titul ae citât. Daûr des normis europeanis – cun di fat – si à di tignì cont dome di chei abitants che a risiedin in citât almancul par 90 dîs. Par chest motîf, i dâts su la popolazion a vegnin publicâts dal ent statistic austriac dome ae fin dai trê mês, e in teorie il numar al podarès za jessi tornât disot dai cent mil.
Clanfurt e il dulintor a son simpri stâts lûcs bramâts dai turiscj, ancje par vie de vicinance dal Wörtersee e dal clime cetant dolç. E di fat, la citât e presum che intai agns che a vegnin si varà une incressite dal aflùs turistic, robe che e tornarà a fâ sflorî il marcjât imobiliâr, ma che e podarès ancje palesâsi in mût negatîf, cuntun aument avonde penç dai presits dai imobii.
Dut câs, il fat di jessi deventade citât metropolitane nol vûl dî che a rivaran plui bêçs. I politics de citât a vuadagnaran come simpri e ancje i contribûts pro capite che a vegnin paiâts de aministrazion citadine – par cumò 1.180 euros parom – no mudaran. Par une citât a pene nomenade “citât metropolitane” no son previodûts nancje auments dai contribûts di bande de Union Europeane, par cause di une modifiche jentrade in vore siet agns indaûr, di une leç che e dopleave i contribûts pro capite pai comuns che a fossin rivâts a cincuante mil abitants. Daspò de modifiche, su chest dopleament no si pues plui fâ calcul e inalore, su la fonde des leçs di vuê, la aministrazion citadine e varà di fâ cuintri ai problemis che a rivuardin il trafic, la planificazion e lis infrastruturis cui stes mieçs economics di prime.
L’unic mudament positîf che la citât di Clanfurt e metarà in vore in curt e sarà la introduzion di une mieze ore di soste a gratis in citât e – cun di plui – di cumò indevant su lis cjartutis stradâls il puntin che al marche Clanfurt al sarà plui grant! ❚
Barbara Cinausero
