AUSTRIE. Eutanasie e/o suicidi judât: une sielte personâl o une sielte culturâl?

Dentri de fin di chest an cu ven, la politiche e varà di dâ gnovis regulis par chel che al tocje la eutanasie e/o il suicidi judât. Chest al è imponût di une sentence de Cort Costituzionâl jessude intal Dicembar passât, che e dîs che la improibizion assolude ae eutanasie no si pues plui mantignî e par chel bisugnarà dâ dongje gnovis regulis dentri dal 2022. La cuistion che e sta metint sot sul moment il guvier austriac e je juste ben chê di meti adun chestis gnovis regulis par fîl e par pont. La sezion juridiche civîl dal ministeri de justizie austriac e à clamât dongje comunitâts religjosis, organizazions e sienziâts a un “Forum par un dialic su la eutanasie”, che al varès di scomençâ – in linie – ae fin di Avrîl. A varessin di partecipâ in dut in 25, contant organizazions e personis singulis. Jenfri chestis a saran ancje, in plui dai rapresentants di comunitâts religjosis ricognossudis e des lôr organizazions umanitariis, ancje l’ordin dai miedis, lis universitâts, e cun di plui l’ufici pai afârs costituzionâi e il ministeri des politichis sociâls. Daûr dal ricognossiment de cort costituzionâl, un doman si scugnarà fâ bon – o almancul tignî cont – il jutori di tiercis personis par podê dâsi la muart. Ben clâr che e restarà un reât la azion direte su la persone, ancje se su clare richieste dal interessât.
◆ Il cantin al è une vore intrigôs dal pont di viste politic, ma la opinion publiche e je al 80% a pro de liberalizazion de eutanasie, duncje parele a chê de cort costituzionâl, impen che il 32% al pense che la decision e varès di jessi inmò slargjade. Cun di fat, stant a un scandai inviulât de ÖGHL (Societât austriache pe fin de vite umane) un austriac su doi al pense che al podarès cjapâ in considerazion ancje par se stes il supuest di un suicidi judât. Il scandai si è davuelt a metât di Març e al à tignût cont des opinions di mil austriacs jenfri i 16 e i 69 agns, cun rispuestis dividudis in maniere compagne sedi par etât che par stât socioculturâl. Un cuart sù par jù (23%) al pense che si vedi di autorizâ ancje une eutanasie ative. Dome il 9% al reste tacât ae viere improibizion de eutanasie, intant che l’11% al volarès une leç par rindi plui dificil il suicidi judât, par pôre che la leç in studi e sedi ae fin incostituzionâl. Il 53% al spere impen che la leç e infuartissi il dirit al suicidi judât. Ae domande su cui che al varès di dâ fûr la eutanasie, doi tierçs a pensin ai miedis o aes associazions professionâls in colaborazion cui miedis, biel che il 27% al cjale bande amîs e parincj. Al è interessant di savê che fintremai il 40% dai zovins sot dai 30 agns al è favorevul al suicidi judât ancje par se, tal câs che la situazion e fos tant grivie di no podê tornâ a stâ miôr. In fin dai fats, dome il 32% dai austriacs al è inciert. La ÖGHL e spere intune leç che i permeti ai plui disfortunâts di jessi libars di fâ l’ultin pas cence vincui e cence tutôrs.
Une comission bioetiche indipendente e à proferît bielzà intal 2015 une propueste di riforme, che la assistence al suicidi e varès di restâ impunide dome in situazions particolârs: par esempli cuant che la persone e à un mâl une vore brut e che al puartarès ae muart. Ben si intint che i berdeis plui grues a vegnin des associazions religjosis, che a pandin par clâr la lôr preocupazion pal slambri culturâl che cheste viertidure e podarès causionâ inte societât. ❚