Sfuei Mensîl Furlan Indipendent
Archivi de Patrie

AUSTRIE. Faymann di gnûf al tamon de gnove grande coalizion

............

***
La estreme diestre di Strache in Stirie e à batût i partîts di guvier
Ve ca i risultâts des ultimis elezions pal Nationalrat austriac: la SPÖ di Faymann e piert plui dal 2% ma e reste salde al prin puest cul 26,8% dai vôts; la ÖVP dal discontent Spindelegger e je al  secont puest (24%): l’obietîf desiderât e anunciât di deventâ cancelîr no lu à otignût.
Il vincidôr di cheste competizion politiche al è H.C. Strache, il leader de diestre popolâr – soredut tal forest a clamin il partît “estreme diestre” -: al à tocjât il 20,6% in cressite di un 3%. Anzit, in Stirie la FPÖ e je rivade al prin puest tes elezions nazionâls. A Graz i partîts di guvier SPÖ-ÖVP, dopo une politiche di riforme, a àn di lassâ il prin puest ae diestre nazionâl. La popolaritât di Strache e mostre ancje che no si trate di un partît di estreme diestre classic ma di un partît populistic che al zuie cuntune retoriche patriotiche. Strache si presente tant che om fuart cu la cjamese nete, che si bat pai austriacs cuintri i politics dal guvier sporcjâts di coruzion.
Cuarts i Verts, che si fermin al 12,4%. Biel risultât (in cressite dal 2%) ma masse pôc pe leader Glawischnig, la carinziane di Vilac che e gjolt di une grande popolaritât ancje difûr dal partît Vert. Ancjemò plui deludût e disdrumât, l’austrocanadês miliardari Frank Stronach, cul 5,7% dai vôts; al à cirût subit la colpe dapardut, ancje dentri dal sô partît: la critiche dal leader e à provocade une crisi serie e si fevele che il partît si dividarà. Stronach al à dit che si ritirarà a pôc a pôc: cui siei 81 agns no si pues spietâsi che si meti di gnûf in bataie tes prossims elezions e, cence di lui, il partît al piert la sô figure centrâl.
Secont vêr vincidôr – e salacor la plui grande sorprese cu la sô jentrade in parlament – al è stât Matthias Strolz e il so piçul partît liberâl NEOS “La gnove Austrie”, che al è rivât adore al prin colp di passâ il 5%. Un grant sucès ancje denant dal fat che chest partît al è stât impastanât tal Otubar dal 2013 cuntune campagne minimalistiche, finanziade plui o mancul dome di donazions. Dutune cul partît di Stronach, i gnûfs partîts di proteste a àn metût adun plui dal 10%. In paralêl, o vin viodût che ancje in Gjermanie – intes elezions di Setembar di chest an – i partîts di proteste a àn cjapât tor dal 10% dai vôts; il 4,7% pal moviment antieuro »Alternative pe Gjermanie«, rapresentât dal economist Bernd Lucke.
Disdrumât e fûr dal Nationalrat, il partît impastanât di Haider – la BZÖ di Bucher – cuntune percentuâl dal 3,5% (e un câl dal 7,2%). Bucher e il so partît, che al à cirût di presentâsi tant che une opzion moderne cuintri i conservadôrs, al varà dificoltâts a sorevivi cence Haider.
Scuasit un mês dopo il vôt, o podìn dî che dut al reste come che al jere: Faymann cancelîr e Spindelegger al sarà obleât – fevelant in tiermins musicâi – a sunâ il secont violin. I politolics a previodin che, se la grande coalizion e larà indenant a tirâ dilunc il so lavôr sul stamp “dut come che al jere”, tes prossimis elezions la FPÖ e passarà i doi partîts borghês.
***
Risultâts des elezions nazionâls pai citadins cence passepuart austriac
Scuasit doi tierçs pai Verts e nissun vôt pe estreme diestre.
I forescj in Austrie a varessin votât cuntune super maiorance i Verts. Cheste impression almancul le cjapìn analizant lis elezions de organizazion SOS a Viene. A àn partecipât un totâl di 611 personis: il 64,01% dai vôts pai Verts e nissun vôt pe FPÖ.
Secont il sît web de organizazion, la SPÖ e je rivade al 14,76%, il gnûf moviment Neos al 8,46%, 5,97% pai comuniscj, e dome 3,15% pal partît di guvier ÖVP.
La organizazion e fevele di “un segn une vore visibil de viertidure de democrazie”. SOS Mitmensch – www.sosmitmensch.at –  si bat pal dirit di vôt pai no citadins:lis personis che a vivin in Austrie di almancul trê agns, a dovaressin jessi in grât di partecipâ a dutis lis elezions. ❚
✒ Janez Erat

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +