AUSTRIE. Gnove leç di citadinance in Austrie

La legjislazion su la citadinance de plui part dai Stâts de Union Europeane si fonde su une combinazion di ius sanguinis e di ius soli. Storichementri, tant che dut il sisteme juridic moderni, ancje la citadinance e je stade regolade daûr la tradizion dal dirit roman; secont chel, un individui al è stât definît daûr la sô famee e divignince e no daûr il so teritori.
Pôcs a son i stâts che a aplichin il ius soli (locuzion latine che e vûl dî “dirit peât al lûc di nassite”) in mût automatic e cence condizions, e cuasi ducj si cjatin tal continent american: i Stâts Unîts, il Canadà e cuasi ducj i stâts de Americhe dal Sud. Vâl a dî, paîs impastanâts di imigrâts.
Pai migrants e pai lôr fruts, la leç e previôt in Austrie il ius domicilii, vâl a dî la naturalizazion par residence stabile tal paîs. Il periodi di residence necessarie ai stranîrs residents par rivâ ae citadinance al mude dentri de Ue: di un minim di 3 agns de Belgjiche – dulà che dal 2010 si sta discutint di alçâlu a 5 –, fin al massim di 10 in Austrie o in Slovenie.
La Austrie e à aprovât tal mês di Lui di chest an une gnove leç su la citadinance austriache: cui che si sarà integrât une vore ben e che al dispon di une otime cognossince dal todesc al varà la pussibilitât di otignî la “Staatsbürgerschaft” in dome sîs agns. Par chei altris, invezit, al reste il minim di 10 agns. Il progjet di modificâ edi acelerâ la naturalizazion al è stât une vore discutût za di agns incà, sedi in Gjermanie che in Austrie, dulà che la percentuâl di chei cuntune storie migratorie personâl e cres di un continui e si môf tor il 20% de popolazion totâl. Duncje, une percentuâl une vore plui alte in confront cu la Italie. Promotôr principâl de ultime iniziative al è stât il segretari pe integrazion Sebastian Kurz che al vûl premiâ cu la citadinance austriache chei che a mostrin un nivel alt di integrazion. La integrazion dai migrants, soredut de gjenerazion zovine, e je une des cuistions plui impuartantis di risolvi in Austrie e al sarà ancje un dai temis plui discutûts te campagne eletorâl atuâl.
***
Citadinance daspò di 6 agns
Il periodi di sîs agns al impon a cui che al fâs domande di vê un sostentament sigûr, une jentrade di no mancul di 1.000 € al mês par almancul trê agns, e ancje tai ultins mês prime de domande. Al sarà però essenziâl dimostrâ la cognossince de lenghe todescje di nivel intermedi.
Chê altre strade che ti jude a deventâ austriac za dopo sîs agns e je la partecipazion a une ativitât di integrazion par almancul trê agns o une forme di volontariât tant che la Crôs Rosse o il servizi di emergjence.
Ducj i candidâts a àn di passâ ancje un test di citadinance che si cjate cumò in fase di cambiament, di mût che al ledi mancul insot tai fats storics ma che al dedi plui atenzion ai valôrs e aes cuistions de convivence cun chei altris.
***
Nissune cerimonie speciâl
I Burgenland cravuats si spietin, daspò la adesion de Cravuazie ae Union europeane (UE), in prin lûc gnûfs scambis culturâi: di fat, sedi di un pont di viste politic che emotîf, no son cussì leâts a strent ae Cravuazie e a Zagabrie tant che i slovens de Carinzie a Lubiane. Cussì al à dit intune interviste Joško Vlasić, politic e figure plui innomenade dal mont de musiche etniche popolâr de minorance cravuate in Austrie.
***
Diference significative tra lis comunitâts di minorance
Cuant che tal 2004, cu la adesion de Slovenie ae UE, la lenghe slovene e je deventade ancje lenghe uficiâl e ricognossude a Bruxell, tra i slovens e je stade une grande sodisfazion cu la sperance che la Slovenie, tant che paîs protetôr, e podarà discuti i problemis de minorance ancje a nivel de Union europeane.
Contrarie, e je la situazion dai cravuats che si sintin leât ae Cravuazie dome di un pont di viste storic, soredut midiant il folclôr. I lôr antenâts si son stabilîts te zone dal Burgenland e de Basse Austrie e ancjemò viers il nord fin ae citât ceche di Brno za plui di 500 agns fa. Ancje se il lôr numar e teritori al jere significatîf, i leams si son pierdûts par vie de distance gjeografiche. Ancje la lôr lenghe uficiâl e je divierse. La lenghe fevelade dai Burgenland cravuats e à lis sôs peculiaritâts, cuntune ortografie plui arcaiche rispiet ae lenghe scrite uficiâl cravuate. La gjenerazion di vuê si sint divierse dai cravuats imigrâts che a vivin in Austrie dome di pôcs decenis. Duncje, nuie di strani che la adesion de Cravuazie ae UE no vedi nissun significât speciâl pe minorance in Austrie. Chi si viôt ben ce che al sucêt cuant che si sclarìs che il dialet de minorance al è une lenghe gnove e dal dut divierse; come che si à cirût di fâlu cui slovens di Resie o tal Porabje in Ongjarie, il risultât al è un straniament de minorance che e piert la percezion di vê alc di comun cu la entitât mari.
✒ Janez Erat