Il rebus des vacancis al timp dal Covid-19

Une leande jenfri il Friûl e lis Gjermaniis a son lis feriis: a nô furlans nus plâs di lâ sui lâts de Carinzie par scjinfâ la scjaldadice di mieç Avost, biel che i nestris convicins a son i prins a vignî jù a butinton sui nestris lîts subit daspò di Pasche di Mai. Nancje cheste malandrete pestilence nus à fat dismenteâ lis bandassis che a Pentecostis a rivavin jù dal Carantan a fiscâ dut ce che a cjatavin dulinvie de strade dal mâr. E chest an, ce sucedaraial? Al è dificil di induvinâ, tant che al è dificil di dî se i gjestôrs dai albiercs di Grau e di Lignan a tiraran flât par vie che no puedin tornâ lis pestadicis dai agns passâts, o ben no pensaran che a son mancul piês a pet de muart economiche che e podarès vignî daûr dal infet, almancul fin ai mês di Lui e Avost.
◆ Ai prins di Jugn la frontiere cu la Austrie e je ancjemò sierade e si son za sfantadis ocasions impuartantis pai austriacs di scjaldâsi i vues (e butâ jù cualchi got di plui) chenti: ai 27 di Avrîl, di fat, al colave il 75t inovâl de proclamazion de Republiche, che – dutun cul Prin di Mai – e podeve jessi il dret par un puint di fiestis biel e sigûr, seial par nô (cu la fieste de Liberazion… dal nazifassisim, biel si intint, dal sigûr no dai arescj a domicili di CoViD-19!), seial par lôr. Ancje i apontaments mancjâts daspò no son stâts di mancul: il fin setemane de Sense ai 21 di Mai (dutun chest an tes Gjermaniis cu la fieste dal pari!), la Pasche di Mai al prin di Jugn e il Corpus Domini ai 11 di Jugn.
◆ Pecjât che par cumò ducj i confins a son dal dut sierâts pai turiscj e la pussibilitât di passâju e je mancul che no intai agns plui dificii de tendine di fier! Propit une ditature dal CoViD, un ditatôr sordin, invisibil, che nol perdone nissun, e che par dislidrisâlu o varìn di pierdi cetant in vitis umanis, dirits, economie. Fin dal imprin di là des Alps nus àn tratâts di infetadôrs (fale che scuvierzi dopo che la scune dal virus e jere propite là di lôr, che il câs di Bad Ischl al à fat deventâ ros plui di cualchidun!), ma ancje lôr a sburtin par un confront cui stâts dongje, e ancje cu la Italie. Ancje nô ur mancjìn tant ai nestris vicins, che cun 144 milions di presincis a durmî, un cuint dai lavoradôrs impleâts intal setôr e un zîr di 60 miliarts di euros, a àn intal turisim il 16% dal PIL, che intai ultins agns al à simpri fats sigûrs i lôr belançs economics.
◆ In Austrie si stan rindint cont che lis vacjis grassis a son finidis, cu la stagjon invernâl çoncjade di brut – e che e varès vût di jessi sierade almancul dôs setemanis prime – e une stagjon estive vuastade. Il ministri todesc Heiko Maas al à pandût ducj i siei cencenaments, contindint che “O vin viodût ce che al è nassût cuntun fûc di infezion intai paîs di origjin dai turiscj cuant che a van in vacance”, cun riferiment clâr al câs di Bad Ischl, là che al è scomençât un fogolâr di Covid-19 che si è spandût in mieze Europe e al à fat dam ae reputazion austriache.
◆ Cumò, cuindi, plui di simpri e covente une resonade fra i sorestants europeans ducj insiemi par decidi ce meti sù pal Istât cu ven e ancje pal Invier, cence fa mancjâ la sigurece ai citadins. Lu domandin cun fuarce ducj i operadôrs europeans dal turisim e de economie, che a àn par clâr che il mût di fâ turisim al varà di jessi tornât a pensâ. Intal avignî si varan di garantî sigurece, sostignibilitât e servizis ae persone tant che “sogjet”, e duncje cuntun rapuart di plui rispiet jenfri ospitants e ospitâts, ma ancje intai confront dai lavoradôrs di ogni setôr, daûr dal sproc “Solidarietât plui che Superlatîfs”.
◆ Intant dut câs i prins cunfins vierts a saran chei todescs e svuizars, ma un rai di lûs i Austriacs lu viodin de bande de Republiche Ceche, che e varès voie di tornâ a vierzi il trafic viers di lôr bielzà di Lui, e de Slovenie e de Cravuazie che a son stimadis avonde siguris. Il guvier austriac al à miôr dut câs di spietâ e, propit par chescj mûts diferents di viodi, al sburte di vierzi une discussion inte suaze europeane. Chest al sta deventant une vore urgjent, se si pense che mieç dal turisim mondiâl si davuelç in Europe e che si spietisi une riduzion dal 45 al 70%. ❚