AUSTRIE. Infineon a Vilac, un esempli di interazion jenfri citât e industrie

Il colòs tecnologjic Infineon, che si è distacât de Siemens intal 1999, al à metût 1,6 miliarts di euros intal so stabiliment di Vilac. Il grup, che al à 27.000 brevets e un faturât di 7,6 miliarts di euros in dut il mont, al implee 7.200 lavoradôrs intal setôr de ricercje e dal disvilup. Il faturât in Austrie al è di trê miliarts di euros, che il 17% al ven metût inte ricercje. Cuant che si decidè dulà logâlu, la citadine su la Drau e je stade preferide sui centris tecnologjics gjermanics e asiatics, ma no sore nuie. Cun di fat, Vilac al à scugnût fâ i conts cun cheste presince, là che i stes managers de Infineon a àn fat capî che, par restâ trative, la citât e scugnive meti man inte sachete. Dut chest par inzornâ lis infrastruturis urbanis, soredut pal traspuart, midiant di un potenziament di chel public e di une schirie di pistis ciclabilis, par ridusi i timps dai percors e i garbuis dal trafic.
Cun chest no si pense dut câs dome ae strade che e puarte ae fabriche: la citât e à za metût pôc timp fa 4,5 milions di euros par fâle a trê corsiis, che la tierce si dopraressile par rivâ in altris aziendis che a vignaressin tiradis sù midiant dal riclam de Infineon. Intune cun altris cinc aziendis, si sta burint fûr il progjet par une schirie di furnidôrs logâts intal dulintor, che al costarès 5-6 milions di euros. Di chest implant a podaressin zovâsi ancje aziendis di concorence. Cun di fat, a pensin i aministradôrs dal grup, al vâl chel che al va a bon pro de Infineon, e lassâ fûr altris buinis aziendis al larès cuintri, cul timp, ai interès de aziende.
Par ce che al tocje la realizazion de rêt ciclabile, la citât e metarès, dentri de fin di chest an, 1,2 milions di euros par gnovis pistis e 800 puescj sigûrs par meti lis bicicletis.
I bêçs pai invistiments a vegnin di un fonts che une part (17 milions) e ven de vendite intai agns ‘90 des azions de Kelag (l’ent che al da fûr la energjie eletriche). Cun chescj bêçs si fasarà ancje un citybus eletric, che dut câs par trê agns al vignarà provât dome intal centri de citât, là che la trate di scree e tacarà a funzionâ ae fin dal 2019. Si sta decidint ancje se si fasarà un viaç di scree su pe Drau. Nuie di concret par cumò, ma si pense di meti un taxi sul flum, che al varès di colegâ la Infineon cul politecnic di St. Magdalen e cu la stazion dal flum intal centri di Vilac. Al sarès cualchi probleme pe trate su la Zelie, par vie dal fondâl bas, ma i imprenditôrs a àn fat capî che, se e je la volontât politiche, dut si pues fâ… simpri che a bastin i fonts Kelag!
In graciis di chest invistiment miliardari si inmanein 750 gnûfs puescj di vore. Stant a un studi interni de aziende, ogni puest di vore a ‘nt inmanearà altris trê. La aziende e sburte ancje par che si pensi par timp a sigurâ ce che al covente intal setôr dai imobii, ae assistence ae infanzie (asîi pe infanzie, doposcuele e vie indevant) e ae formazion. Si à di pensâ che cul lâ dal timp a nassaran 3.000 puescj di vore e che duncje – se no si vûl rivâ cul flât curt – bisugne scomençâ di subit, e la aministrazion de aziende e sta bielzà calumant lis areis di comprâ e di lotizâ. Cussì, no varessin di rivâ savoltaments sui presits dai imobii e cun di plui si varan tancj apartaments za dal dut mobiliâts par chei che a lavoraran inte Infineon dome par pôc timp. La citât e a za metût in vore la ristruturazion di une ex birarie par mudâle in asîl bilengâl todesc e inglês.
Si domandìn se la citât e rivarà a stâi daûr al disvilup previodût pal grup industriâl, che dut câs al podarà durâ a lunc dome se al sarà tratîf pe lavoranzie une vore cualificade di bande di dut il teritori nazionâl. ❚
Barbara Cinausero