AUSTRIE. La integrazion dai imigrâts e je une des prioritâts de gnove scuadre di guvier

Dopo lis dimissions dal vicecancelîr Pröll dal Partît popolâr (ÖVP), che al à scugnût lassâ la sô cariere par colpe di un mâl brut, une part dal guvier e à mudât muse. Il so sucessôr, il ministri pai Forescj Michael Spindelegger, al à decidût di gambiâ la sô scuadre di guvier di plante fûr, cun chê di reagjî aes critichis indreçadis al guvier de grande coalizion incolpât di no fâ nuie. Dute la vecje vuardie e à molât il puest a une scuadre zovine, biele ancje pes fotos pe stampe, cun trê feminis in posizion strategjiche e il zovin segretari di 24 agns, ducj pronts pes prossimis elezions dal 2013.
Salacor, une olme de influence de potente famee Pröll e je la gnove ministre dai Internis Johanna Mikl-Leitner, un ministeri impuartant ancje te suaze de problematiche migratorie tratade ogni dì dai mieçs di comunicazion.
Il rimpast dal guvier al è stât un esperiment e une rispueste ae diestre estreme che e critiche il faliment de integrazion, soredut dai membris de minorance turche in diviers distrets di Viene: e je la istituzion dal segretariât ae Integrazion che e vûl marcâ la voie dal partît di cirî une strategjie gnove.
Dut câs, e à lassât ducj a bocje vierte la nomine dal zovin Sebastian Kurz, 24 agns, a cjâf de organizazion dai zovins dal ÖVP, ancjemò student cence esperiencis di guvier.

I imigrâts a varessin di sintîsi austriacs_ «La segretarie di Stât pe Integrazion in Austrie e je alc dal dut gnûf. E e je une novitât ancje il fat che un politic cussì zovin come me al podedi cjapâsi sù la responsabilitât di guvier»: cussì Kurz dopo la sô nomine tant che segretari. Kurz al viôt trê grandis cuistions di risolvi pal futûr de Austrie: la educazion, il svilup demografic e la integrazion dai imigrâts. Un dai compits al sarà chel di ve une division clare tra il dirit di asîl, di jessi rifugjâts, la migrazion e la integrazion.
In Austrie a vivin 207 mil serps_ Lant daûr dai dâts dal 2010 di Statistik Austria, chenti a son regjistradis cirche 207 mil personis imigradis de Serbie: di chescj 73 mil di lôr a son za deventâts citadins austriacs.
Subit dopo de sô nomine rivade ai prins di Mai, il segretari Kurz al à visitât la Serbie, il paîs di dulà che e rive la plui part dai imigrâts in Austrie. Tai incuintris cul ministri dal Internis Ivica Dačić e cul Segretari di Stât, responsabil pe diaspore serbe, Predrag Tojić, si à vût fevelât soredut de integrazion dai serps che a vivin in Austrie.
Il fin de riunion al jere chel di sclarî la cooperazion pussibile. «Il nestri al è un interès vicendevul: bisugnarès viodi i serps in Austrie tant che une oportunitât», al à sierât Kurz ricuardant lis 400 societâts austriachis che a operin tai paîs dai Balcans. Tal mês di Jugn al è previodût un viaç in Bosnie e une cunvigne cul ministri turc pai turcs emigrâts.

Critichis de çampe e de diestre estreme_ Lis critichis a son rivadis de çampe e dai Verts: la presidente Glawischnig e cjate il teme de integrazion masse impuartant par puartâlu indevant cun esperiments fats di un zovin cence esperience. Di chê altre bande, il partît nazionâl FPÖ di drete si ten l’unic partît competent par risolvi chest ingredei dificil cu la solite recipe: sierâ i confins di Schengen e traviers leçs di pueste obleâ i imigrâts a integrâsi. Kurz al rispuint domandant une aleance cui Verts e ancje cu la diestre estreme par cjatâ adun  une strategjie valide. Il sindic di Viene Häupl (SPÖ), pe prime volte in coalizion cui Verts, si è esprimût in maniere positive e al vûl cooperâ.
Un segnâl positîf al è il grant interès tai mieçs di comunicazion dai imigrâts: su la riviste Biber, te edizion di Mai, si cjate su la cuviertine une foto di Kurz fotografât intun bar turc che al vent kebab.
Svilup e cambiaments de popolazion a Viene_ Al inizi de Vuere Grande a Viene a jerin a stâ cirche doi milions centmil abitants. Jenfri il 1910 e il 1918 e jere la cuinte citât plui grande dal mont, prime di jessi superade di Berlin. Par vie che e fo par tancj agns la capitâl di un stât multinazionâl, Viene e à une popolazion di divierse divignince.
Tacant dai agns Novante dal secul stât, daspò decenis di stagnazion, Viene e je deventade di gnûf une citât di imigrâts, soredut dopo la crisi balcaniche. Tal 2008 a Viene a vivevin un milion 700 mil di lôr, di chestis il 32,3 par cent e à une storie personâl peade ae imigrazion; cun di plui, il 20,1 par cent dai vienês no son citadins austriacs. Cirche 41 mil personis a son di lidrîs turche e po sù po jù 124 mil di lôr a son rivâts dai paîs de ex Jugoslavie.
Il probleme plui grâf, che al spiete une soluzion par jessi fûr di chest circul viziôs, e je la ghetizazion dai imigrâts in diviers distrets di Viene, li che dispès la percentuâl di int foreste e passe l’80 par cent sul totâl dai abitants.
JANEZ ERAT