Sfuei Mensîl Furlan Indipendent
Archivi de Patrie

AUSTRIE. Sigurazion sanitarie, un sisteme che al funzione benon

............

La sigurazion sanitarie in Austrie e je scompartide di fonde su doi nivei: chê obligatorie – che e garantìs la assistence di base – e chê privade, che in struc e je juste une integrazion par vê prestazions di soreplui. Ducj i lavoradôrs dipendents che a vuadagnin plui di cuatricent euros al mês sù par jù, a àn di jessi sigurâts e il contribût corelatîf al rive in dì di vuê al 7,65% des jentradis, spartît in mût plui o mancul compagn tra datôr di lavôr e dipendent, intant che i autonoms a pain dut di bessôi. Il sisteme al è inmaneât sù par jù come lis nestris vieris cassis mutuis, diferentis par ogni Land e par categorie di apartignince dal lavoradôr. Students, pensionâts e lavoradôrs discontinuis a pain alc di mancul. Chei di famee (om o femine e fîs che a van a scuele o in garzonât) a son cuvierts de sigurazion dal component familiâr che al lavore, cuntune zonte ae contribuzion. La sigurazion e je sore nuie se l’om o la femine a stan daûr ai fîs minôrs o a un invalit di une cierte gravitât.
Aes cassis a stan sot sedi i miedis di base sedi i specialiscj di cualsisei setôr, che a contratin di persone i lôr onoraris cu lis cassis stessis. O podìn dî che a son “convenzionâts”: a son sparniçâts su dut il teritori e no, tant che in Italie, cjapâts dentri in numar limitât intai ambulatoris dai ospedâi e des ASL a scombati cuintri schiriis che no finissin plui di pazients e listis di spiete lungjononis. Ogni citadin al pues indreçâsi, ben clâr, ai professioniscj libars a front dal paiament di dute la note di cont. Cheste e pues jessi presentade ae casse di apartignince, che dut câs e rifont dome fin al 80% dai coscj che la stesse prestazion e varès vût là di un miedi convenzionât.
Dutis lis medisinis che a vegnin ordenadis dal miedi a son sore nuie. Si paie dome un contribût pe ricete, a pene disore dai cinc euros e, intun an, no plui dal 2% des jentradis; chei che a vuadagnin pôc a son sfrancjâts di chest contribût.
Ancje lis spesis dal dentist a son paiadis dal dut de casse. Dome se un al vûl miorâ l’aspiet estetic, che si scuegnin doprâ materiâi particolârs e che a costin di plui, al à di contribuî ae spese, che dut câs e vignarà rimborsade de casse al massim fin al 80%. Lis cassis a pain ancje fin al 60% dai coscj di protesis e implants sostitutîfs. A intervegnin fintremai pai trataments psicoterapics, che lis primis dîs sentadis a son dal dut a titul gratuit; po dopo, ancje pai ocjâi a pain dut ce che al è disore dai 100 euros pai adults e 80 pai frutins. Ancje i students a scuegnin vê une sigurazion sanitarie, si ben che a pain di mancul, simpri che a vedin ciertis cundizions di redit e di merit ben fissadis. Clâr che chel che nol lavore e nol pues jessi considerât a caric al pues gjoldi dal sisteme sanitari austriac, ma al à di paiâ dut o di sachete o midiant di une sigurazion privade, che, tant che si pues capî, e coste une vore. Cumò si sta fevelant se al è il câs di meti sù un sisteme plui sempliç, metint adun tantis cassis, par smagrî l’implant sanitari. In chest sens, la Italie e à bielzà di tancj decenis un sisteme plui lizêr, che però al à centralizât dut, invezit di pandi il mecanisim sul teritori midiant di ducj i miedis, sedino di base o specialiscj, come in Austrie; in dì di vuê si à cussì dât dongje un ingorc che aromai o sin dongje de mancjance totâl di assistence.
O sin doi stâts cussì dongje, che al bastarès un binocul par viodi cemût che a vivin di chê altre bande, cjapantint il miôr. Dut câs, al somee che il confin che o vin sdrumât timp indaûr al sedi stât sostituît di un mûr cetant alt e une vore penç. ❚
Barbara Cinausero

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +