Juste intai dîs che ducj a saludavin par simpri un fi de nestre mont – Bonsignôr Pieri Brollo che al à puartât indevant par tancj agns la diocesi di Udin -, in Carinzie ducj i gjornâi a pandevin a plene pagjine la notizie de nomine di bande di Pape Francesc di un gnûf vescul te diocesi di Gurk. E pai letôrs de “Patrie” il so non al sune familiâr, parcè che si clame Josef… Marketz. Al vignarà consacrât ai 2 di Fevrâr dal 2020 tant che 66st vescul de diocesi di Gurk-Clanfurt. Al à pandût di no volê lâ a stâ intal palaç vescovîl ma di volê restâ invezit intal so apartament intal centri di Clanfurt, par podê lâ a pît a vore ogni buinore e incuintrâ la int dulinvie de strade; e duncje si è za fat viodi dai carinzians tant che apuestul dal so popul.
Cu la nomine di Josef Marketz a gnûf vescul pe Carinzie, Pape Francesc al vierç di fat une gnove ete inte glesie di chê regjon. Cun di fat, pe prime volte al sarà un sloven di Carinzie a puartâ la mitrie de diocesi di Gurk-Clanfurt, e chest al varès di puartâ a une fuarte incressite dal status public dal bilinguisim todesc-sloven inte regjon. Ancje par marcâ la cuistion, il gnûf vescul al à doprade propit la sô lenghe mari par comentâ a cjalt la sô nomine, bramant pal avignî ancje une colaborazion jenfri lis etniis.
Marketz al à 64 agns e dal 2014 al direzeve la Caritas carinziane, ufici che intai mês passâts – cuant che a son vignudis a flôr lis primis vôs di une pussibile nomine – al veve pandût di no volê lassâ, ma al sarès stât propit l’intervent di Pape Francesc a fâi mudâ idee. A son tancj i ponts che lu svicinin al pape inte suaze spirituâl. Inmò prime de sô consacrazion, al à passât un an in Sudameriche tant che diacun, e intune interviste al veve declarât che la motivazion che lu veve fat deventâ predi no jere une cuistion di fede, ma sociâl, par podê judâ chei che a àn plui bisugne. No je stade une decision facile, tant che – intun moment di crisi – al veve decidût fintine di bandonâ il seminari e di lâ in Indie, là che la miserie di chei puescj lu à sburtât a tornâ su lis sôs sieltis par finî di studiâ di predi. Consacrât intal 1982, dîs agns daspò al à cjapade sù la direzion de sezion slovene dal Ufici Pastorâl Carinzian: tal 2009 al è deventât diretôr dal Ufici Pastorâl vescovîl, fin a rivâ intal 2014 ae direzion de Caritas carinziane e deventâ vicjari vescovîl pai servizis sociâi, e cun di plui coordenadôr diocesan pes domandis di asîl. Chest lu à puartât intal 2015 a criticâ cun tante fuarce la Union Europeane, domandant une posizion plui umane intai confronts dai migrants. In Carinzie al à metût sù ancje lozaments in canoniche e in cjasis privadis par chei che a domandin asîl. Al è cognossût pal so mût di fâ umil e pe facilitât intal tratâ cu la int semplice, ma ancje pes sôs capacitâts marcadis di organizadôr, tant che a testemonein i siei colaboradôrs. Al è ancje cetant viert sul divignî de Glesie e, cun di fat, al à pandût plui voltis di jessi favorevul ae consacrazion di diacuns sposâts e ae sopression dal celibât.
La novitât e je une vore impuartante par vie che la Carinzie e jere cence vuide spirituâl di plui di un an e mieç, ven a stâi di cuant che il vescul Alois Schwarz al jere stât trasferît a St. Polten daûr dai scandui che a vevin tocjade la diocesi di Gurk e che a àn puartât a une indagjin apostoliche su la diocesi, ma ancje a indagjins penâls – cualchidune daspò metude di bande – cuintri dal vescul che o vin nomenât, indagjins che no son inmò dal dut sieradis. ❚