Scomençant dal an scolastic 2020-‘21, i scuelârs austriacs a podaressin vê ben vot dîs di vacancis inte Sierade, ven a stâi dai 26 di Otubar – fieste nazionâl austriache – ai 2 di Novembar. Di chê altre bande a vignaressin gjavâts doi martars: chel daspò di Pasche Maiôr e chel di Pasche di Rosis, e cun di plui un altri pâr di dîs di vacance, che in dì di vuê a son a disposizion di scuelis e regjons. Insom insom – stant al ministri de istruzion – lis zornadis reâls di scuele no mudaressin. Il sisteme scolastic austriac al met in cont dut câs un sisteme di vacancis diferent di chel talian, cuntune distribuzion plui ecuilibrade dulinvie dal an scolastic, tant che lis vacancis di Istât a durin 6 setemanis. Dut chest, parie cu la gnove interuzion metude dentri inte Sierade, al ven motivât cu la dibisugne dai arlêfs di gjoldi di une polse dopo i prins doi mês di scuele, che a saressin cetant pesants. Cussì, i scuelârs austriacs si zovaressin di une polse avonde lungje ogni doi mês sù par jù (vacancis de Sierade, vacancis di Nadâl, vacancis di Fevrâr e vacancis di Pasche). Dut chest al judarès a cjapâ sù miôr i contignûts scolastics, sparagnant cussì ai arlêfs i sbassaments di rindiment dal nestri sisteme.
Par dî il vêr nol sarès nuie di gnûf in cheste propueste, fale che e à motivazions diferentis. Bisugne marcâ che chestis vacancis a esistin bielzà, ma a colin dentri in chês zornadis di polse scolastiche che si disin “autonomis”, par vie che a vegnin decidudis di ognidune des scuelis o des regjons, e chest fat al pues causionâ cualchi fastidi aes fameis che a àn fîs di etâts diferentis: seial par inmaneâ un viaç o ancje dome par stâur daûr. Intal mût che o vin dit, lis polsis de scuele a deventaressin compagnis par dutis lis scuelis e su dut il teritori nazionâl.
Cheste polse de Sierade e esisteve za par vieri (visìnsi che l’oblic scolastic al à scomençât une vore prin che in Italie) e cualchi regjon le à metude in vore za plui di dîs agns fa. Une volte, le clamavin intun mût che al sclarive ben il concet, o ben “Kartoffelferien” (lis vacancis des patatis), par vie che al jere il moment che si cjapavin sù lis patatis, cuant che lis fameis a vevin bisugne ancje dal jutori dai canais. In reson de gnove propueste, in plui che la gjonde di cetantis schiriis di canais, si cjaparessin dentri une vore di interès economics avonde pençs, massime intal cjamp dal turisim. Cun di fat, si darès fuarce a di un moviment turistic inte stagjon sclagne, ma al è vêr ancje che al sarès vuastât il setôr dal turisim che si invie intes vacancis di Pasche Maiôr e di Pasche di Mai, santissimadis di là des monts. Par nô furlans e larès salacor un pôc miôr, viodût ce che al sucêt a Grau, ma soredut a Lignan, inte fin di setemane de Pasche di Mai. Dut câs, il setôr dai albiercs al sarès content di cheste propueste, lassant stâ, però, lis fiestis tradizionâls des dôs Paschis, gjavant salacor cualchi zornade aes vacancis autonomis: in chest mût si rivarès a contentâ ducj.
Ore presint, al Ministeri de Istruzion si sta fevelant in mût ferbint sul fat di scurtâ lis vacancis estivis di 6 a 4 setemanis. A chest, i fasin cuintri tancj di lôr par vie che il periodi des vacancis estivis si doprilu pal praticantât dai scuelârs e che al dure sù par jù 4 setemanis. In reson di chest, ai frutats no ur restaressin plui lis 2 setemanis di gjoldilis in libertât. Se o podessin ribaltâ dut chest su la Italie, cetancj gjenitôrs che a saressin plui contents, e no varessin plui di fâ marculis par lâ di buride di un centri estîf a di chel altri, e ce tancj vons e basavons che a podaressin gjoldisi miôr la pension!
E cuissà nuie che ae nestre economie turistiche no i rivàs une pocade in plui. ❚
Barbara Cinausero
