Aziende agricule di Prât di Cjargne “Sot la Napa”

L’ aziende agricule Sot la Napa di Pesariis di Prât e je nassude tal 1995. “In realtât – e conte Eliana Solari – o vevi tacât tant prime cu la coltivazions di flârs (freulis), dopo o ai continuât cuntun pôc di lidric. A un ciert pont, la coltivazion di flârs e jere masse grande (o fasevi 10/15 cuintâi ad an) e cussì o ai ralentât, ancje parcè che intant o ai vût cuatri fruts. O ai però simpri tignût alc, se no altri pal ûs de famee. Tal ’95 o soi partide cu la aziende agricule cu la produzion di prodots biologjics.
◆ Daûr dal prodot biologjic e je une part burocratiche no indiferente. Nô o paìn cui che al à di vignî a controlânus, e dopo o vin ancje di tignî tancj regjistris e di segnâ dut. Il prodot biologjic al è controlât, la burocrazie e je compagne tant pes piçulis realtâts che par chês grandis.
◆ I prins timps, par vendi i prodots o vevi viert un piçul spaç in cjase, dopo o ai tacât a zirâ i marcjâts locâi. I prodots che mi restavin, o ai scomençât a trasformâju: conservis, marmeladis, sirops… e ancje chescj ju ai certificâts biologjics, e ca a son inmò plui controi e coscj.
◆ La plui part dai prodots le vent tal agriturisim che o vin viert tal 2004, e alc o puarti in cualchi spaç e latarie de zone. Cui che al va a mangjâ tal agriturisim al cerce il prodot (i plats dal menù a son cuasi ducj fats cui nestris prodots) cu la pussibilitât di comprâlu. O produsin soredut fasûi: o vin une cuindisine di cualitâts, dutis cualitâts locâls. Cualchi an fa o vin partecipât a un progjet cu la Universitât dal Friûl pal recupar des varietâts di fasûi de nestre zone. Vuê o vin un “cjamp catalic” a disposizion de Universitât, che al covente par moltiplicâ e par mantignî vivis dutis lis varietâts. Dongje di chest prodot, o vin ancje cartufulis, capûs e mei (miluçs): chestis a son lis produzions plui grandis. Dopo o produsin alc di dut ce che nus covente. Di doi agns incà, o vin tacade la produzion di mîl. O vin ancje ducj i trasformâts: o fasìn crauts, marmeladis; o fasìn ancje lis racueltis spontaniis, di fat o sin iscrits al ERSA tant che racueidôrs spontanis. Cui prodots che o cjapìn sù, o fasìn sirop di savût, di tale, o metìn vie il lidric di mont, o fasin marmeladis di clasimis (cerniculis)… dute robe che o doprìn tal agriturisim che o vin viert, come che o ai dit, tal 2004.
◆ O vin recuperât e sistemât une vecje cjase che e jere sierade di tancj agns, e o din tant di mangjâ che di durmî. Simpri achì o vin il nestri pont di vendite dai prodots e la ostarie. Particolaritât: inte ostarie o vin dome prodots furlans. Si bevin dome most di mei, sirops, la bire artesanâl di Sauris, la sgnape che o aromatizìn nô, e no esistin prodots industriâi!”.
◆ La famee Solari e à ancje la fatorie didatiche. Di solit a ven visitade des scuelis che a passin une biele dade o une zornade interie a viodi i animâi, ma ancje a fâ la racuelte des jerbis di prât e, parcè no, il zîr dai orlois.
◆ “La dificoltât principâl che si presente ogni an – e conte Eliana – e je chê dai animâi salvadis che a van a mangjâ i prodots dai nestris cjamps ancje se a son sierâts di spaltadis! Pal rest, no vin fastidis. La robe e ven avonde ben.”
◆ Par savê alc di plui al è il sît https://www.sotlanapa.it/ ❚