BASTIAN CONTRARI. Tito Maniacco e i furlans: sono pardabon cence storie?

Apene finidis lis celebrazions sui gjornâi pe disparide di Carli Sgorlon, une altre brute gnove e je vignude a segnâ la culture furlane: la muart di Tito Maniacco, scritôr, inteletuâl e autôr di variis libris su la storie furlane.
La lôr muart seguitive e met dongje doi inteletuâi une vore diviers, Sgorlon plui dongje a posizions conservadoris, Maniacco a posizions di çampe, che però a rapresentin ben lis dôs ganassis de tanaie che e ten fer i inteletuâi di chenti dal displeament di une culture plui furlaniste.
Tes sôs oparis Maniacco al à un voli atent viers il popul plui che i sorestans, dispès criticâts cence dûl: daûr de sô vision ideologjiche, su la bare al à volût la bandiere comuniste, al met la lint di ingrandiment di storic e je pontade sul popul, sui lavoradôrs. Si à di dî che la atenzion viers dai destins dal popul no mancje tai inteletuâi furlans: ancje in Sgorlon, par esempli.
Maniacco al descrîf i furlans tant che un popul nobil ma tibiât, pôc calcolât: il struc dal so pinsîr che si pues riassumi tal titul di un so inomenât libri «I senza storia».
Ma dai stes fats storics che lui al ricuarde, a viodi ben, nol salte fûr un popul che nol vedi segnât la storie: ribelions che a puartin ae istituzion de Contadinance par esempli, riviei sociâi, une serie di events tragjics – da lis invasions dai Ongjars al taramot dal 1976 – che al rive a superâ, tornant a jevâsi sù miôr di prime. Un popul di caratar, plui che rassegnât, alore. Il fat al è che la storie, magari cussì no, si contile ancje traviers figuris storichis significativis e sigûr dutis lis vicendis dal Friûl a àn vût i lôr cjâfs, ma si à simpri spesseât a scancelâju: o dal paron di turni o de indifarence dai inteletuâi furlans, plui atents a lâ daûr e celebrâ ideologjiis che a vignivin di fûr.
De opare di Maniacco o tiri fûr un esempli dongje par timp (si podarès lâ ancje a viodi se al fevele o no di Marc di Murùs, leader de resistence cuintri Vignesie dal 1400): tal librut «Breve storia del Friuli» li che par fuarce – stant il titul – Maniacco al à di jessi curt, come personaç storic dal Secont Daspò Vuere al nomene Tina Modotti, grande artiste de fotografie e inteletuâl comuniste, ma che in fat di Friûl – di là des divignincis – e jentre e e à fat pôc e nuie. O pûr cuant che al fevele dal moviment autonomist furlan al sielç di nomenâ nome Pasolini, che a ‘nt fasè part par un periodi curt, par passâ tal partît comunist. Nol è nomenât ni Tessitori, che sigûr nol è però un “cence storie” parcè che i siei ricognossiments ju à vûts, ma massime nol è nominât Felix Marchi, un non impressindibil par cualsisedi furlanist. Un tipic esempli di figure impuartantone par spiegâ i motîfs di parcè che o sin ancjemò achì a fevelâ di autonomisim (che nol ven di rive jù di cuissà dulà) e scancelât de storie di bande di chei altris.
I furlans no son cence storie parcè che no ‘nd àn une o parcè che le àn dome subide, ma parcè che no je mai stade fate une storie furlaniste, fale il tentatîf de «Cuintristorie» di Marchet e Placerean. Une responsabilitât dai inteletuâi che a son simpri prime alc altri (serenissims, austriacants, talians, garibaldins, comuniscj, democristians, leghiscj…) prime che furlans. Gjavât il vê scrit la ultime opare prime di murî par furlan (par Maniacco la racuelte «Oltris»).
Une storie che e domande di jessi contade e cumò l’imprest al sarès: e varès di rispuindiji la Universitât dal Friûl ma, magari cussì no, cheste domande e somee no scoltade.
Dree Venier