Sante o strie, vignude sù de gjernazie de tradizion popolâr e pûr passude di libris e di letaris, cheste e je stade Marta Fiascaris, di San Denêl, clamade a testemoneâ il so Credo cetant personâl devant dal Tribunâl de Sante Incuisizion di Aquilee, tal principi dal Sîscent.
La sô vôs nus è stade tramandade, par ironie de Storie, propit par man dal frari che le interogave e che al sperave di fale tasê par simpri, restât di clap, mudât in piere devant di une anime cussì grande e complicade, di sigûr impreparât a di une passion cussì sflandorose e grande, che si alimentave dentri di un coinvolziment estatic, un rapiment spirituâl masse potent par jessi ordenât tra i schemis de fede istituzionâl.
La figure straordenarie di cheste zovine furlane di San Denêl – bolade tant che mate, dal sigûr visionarie, cu la fuarce di une feministe dal secul XVII, che e crodeve di podê fondâ la sô religjositât su lis pulsions dal so cuarp, su la lidrîs dal so jessi femine – si conclût cu la condane intal 1563, dopo di un procès di cuasi vincj agns.
Des cjartis, che a son conservadis in part a Udin intal Archivi Capitolâr (plui di vincj cartelis!) e in part a San Denêl, inte Biblioteche Vuarneriane, al ven fûr il profîl di une femine iriverente, disubidiente e amante dal riviel: “No vês di fevelâ cuntune mate come jê, cirît dome di scuvierzi lis sôs intenzions e di convincile dal so erôr. Cualchi mês indaûr ancje jo i ai dite: tu sês dome che oscuritât, e in plui i ai dite ancje: i segnâi di une santitât sclete in union cun Diu a son la ubidience, la umiltât e la veretât. Invezit, tu tu sês simpri stade disubidiente, no tu âs mai volût crodi al Sant Ufizi e nancje al Pape di Rome, i tiei scrits a smirin dome che a pandi la tô grandece“. Chest al scrîf tal 1650 nuie mancul che il cardinâl Barberini, clamât di Rome cu la sperance di podê disbratâsi intune cause une vore complicade, là che e jere coinvolte une femine zovine che si jere permetude di scrivi un Vanzeli secundum Martam.
Di une sensibilitât fuartonone, peade a di une fisicitât siamaniche, carismatiche, tant che e podè clamâ a San Denêl une congreghe di feminis, un grup di mistichis tiradis dongje di dute la Furlanie, di Gurize, ma ancje di Triest, de Slovenie e de Carinzie, Marta par cierts aspiets e fâs pensâ a figuris tant che Sante Catarine di Siene o Zuane di Arc. Ancje se tant zovine (e veve pôc plui di vincj agns cuant che e fo clamade pe prime volte de Incuisizion) e à la fuarce di rivendicâ par se une fede insiorade di sugjestions che a misclicin insiemi libruts eretics, documents visionaris, ma ancje elements peâts ae tradizion popolâr, al sintî dal mont contadin, che al crodeve inte magjie e inte maravee dal misteri.
Il so jessi femine i regale une fiere ferbinte, che e fâs sgrisulâ il so cuarp fin tal cûr plui profont de sô intimitât. Chestis a son lis sôs peraulis, tiradis jù intant dal procès, intal 1650, dal frari che le interogave: “Jo o crot che i fruts dal Limbo a saran batiâts di Sant Zuan il Batiste intal dì dal Judizi. O soi sigure che o murarai devant dal altâr dal Santissim Sacrament e che in chel moment precîs a sunaran lis cjampanis cence jessi tocjadis di man umane. In chel moment, o visitarai l’Infier e il Paradîs, e il gno cuarp al sudarà sanc. Po dopo, o tornarai a resurî par contâus ce che o ai viodût. E je za pronte, jenfri Jesù e Marie, une cjadree par me e par chês altris feminis che mi scoltin e che mi vegnin daûr. Diu mi ame, al seguìs il gno consei, tant che ducj chei che mi perseguitin a saran punîts in cheste e in chê altre vite. O soi maridade cun Diu che mi à regalât tancj anei. O soi jo la artiliere di Diu, e cun tons e sclopetadis o pari fûr i diaui. Ma o sai ancje mandâ fulmins di amôr par judâ chei che lu amin. Il gno sen al è plen di lat, dolç e bon, e chei che lu bevaran a saran saceâts par mil dîs cence bisugne di altri, dal moment che i ai dât di tete ancje ae Vergjine Marie cuant che e veve dome doi agns. Di gnot, o svoli parsore des citâts plenis di pecjâts e ur mandi jù la mê maledizion. In spirt, o ai copât il Sultan dai Turcs a Costantinopoli e, dome cul cjalâju, o soi buine di convertî i pecjadôrs. Il diaul lu ai cjapât a pidadis, lui che al voleve spreçâ il gno ritrat. I Sants a saran il gno jet, e parsore di lôr o polsarai cun Diu e cu la Vergjine. Jo, sûr e vicjarie de Madone: jê il voli a man drete, jo chel a çampe dal Signôr, o ai dade la sante Comunion ae Trinitât che mi vistìs, mi petene lis trecis, mi disvistìs e mi met a polsâ tal jet”. ❚
Agnul Floramo
