Bataiis di Cjargne: i comitâts che (a voltis) a vincin

A son simpri di plui i fûcs impiâts inte mont e te pedemontane dal Friûl, di bande de int che no vûl rassegnâsi a gloti dut ce che la politiche e la economie a àn cirût di imponi tai ultins dîs, cuindis agns. Comitâts, coordenaments, grups di citadins stracs di jessi sotans, rivâts adore cun indurance, in plui di cualchi câs, a otignî reson.
ELETRODOT
Il nestri zîr ator pal teritori al partìs di une des bataiis plui datadis, ven a stâi chê cuintri l’eletrodot. Chi il cûr de lote al bat tra Çurçuvint e Paluce in gracie di Carnia In Movimento, la associazion inmaneade da Renato Garibaldi e tancj zovins tor il 2003, cuant che i progjets di une linie energjetiche transfrontaliere Italie-Austrie, di Wurmlach a Samblâc di Cjavaç, a àn tacât a circolâ in te val de Bût. Manifestazions di place, protestis, incuintris tai paîs e aleancis cui carinzians a son rivadis adore di smovi lis cussiencis e, planc a planc, di intardâ l’iter burocratic fasint modificâ i progjets che a vevin un impat ambientâl notevul. Il pericul nol è dal dut superât parcè che al Ministeri des Ativitâts produtivis e dal Ambient il percors autorizatîf al è ancjemò in pîts. La Regjon e i Comuns di bande lôr a àn domandât che se la opare si à par fuarce di realizâ, che e sedi sot tiere e no aerie, stant tra l’altri il “no” rivât dal Consei di Stât austriac rispiet al colegament proponût de cuardade Pittini-Fantoni-Burgo. Di Rome, al moment, no son gnovis.
AGHE
Altre bataie e je chê su pe aghe: in chest câs, il moviment al è deventât cul passâ dai agns trasversâl a pet di diviers paîs e valadis. Motôr di dut al è Franceschino Barazzutti, ex sindic di Cjavaç al timp de ricostruzion, che al à dade vite al Comitât tutele aghis dal bacin montan dal Tiliment, sburtât prin di dut cuintri de proliferazion di centralinis idroeletrichis che a àn lassât a sut i flums de mont e po dopo cuintri Carniacque e la gjestion dal servizi idric integrât. Cun lui si son agregâts il Comitât Aghelibare di Paluce, vuidât di Antonino Galassi, il Comitât “Per Altre Strade Dolomiti” di For Disot (nassût ai timps par contrastâ il colegament autostradâl tra A23 e A27 passant pe val Tiliment), il Comitât “No centralina idroelettrica Ponte Rop” di Resie, l’Sos Chiarsò di Paulâr e il Comitât Val Dean di Davâr, rapresentât di Paolo Querini. In chest câs, dome cumò che si rive al grop, cuntun sisteme di gjestion destinât a finî in mans furlanis (e forsit ancje emilianis, tra un pôc), la int si sta inacuarzint de impuartance dal teme e di setemane in setemane si moltiplichin lis assembleis tes valadis par discuti di chescj argoments.
IL LÂT
Leade al teme da la aghe no si pues dismenteâ la ativitât dal Comitât pe difese e pe valorizazion dal Lât di Cjavaç, vuidât di Dino Rabassi di Dalès che, simpri in cunvigne cul Comitât di Barazzutti, si son inschiriâts par blocâ il dopleament de centrâl Edipower di Samblâc che e varès penalizât ancjemò di plui il lât e il so paisaç. Une azion inspirade no dome a dî di no, ma ancje cul obietîf di tornâ a naturalizâ il bacin midiant la idee di un scaric in stât di puartâ fûr dal lât la aghe glaçade che e rive des turbinis dal implant. Il sucès di cheste posizion al è stât significatîf, tant che la Regjon si è impegnade a tignî cont di dut chest tal plan des aghis.
TRIBUNÂL
Cui che invezit al à tirât un pôc i rems in barcje a son chei dal Comitât pal Tribunâl di Tumieç, dopo trê agns di lote par evitâ che a sierin lis puartis dai uficis judiziaris de citât. Tantis, cemût che o vin vût mût di scrivi su La Patrie, lis promessis de politiche, ma fin cumò l’unic risultât al è stât un sportel di justizie, pal moment dome su pe cjarte.
OSPEDÂL
Sbassantsi te pedemontane, a Glemone in particolâr, e je la cuistion sanitarie a tignî banc. E chi il fûc al è un grum vivarôs. A son ben trê i Comitâts impegnâts a difindi l’ospedâl che la riforme regjonâl e à decidût di riconvertî. La Cicogna al è il plui vecjo, vincj agns di storie, tacade cuant che a metât dai agns 90 la leç Fasola e à decidût di sierâ il pont nassite. Tai ultins doi agns si son zontâts il Comitât “San Michele” e il grup Facebook “Io voglio l’ospedale a Gemona”. Ancje in chest câs, manifestazions, incuintris, flash mob par sensibilizâ la politiche a tornâ sui siei pas. Une fuarce simpri plui grande, in gracie de union cun ducj chei altris Comitâts dal Friûl e di Triest che si cjatin te stesse situazion. A Glemone a son cussì inrabiâts che a àn decidût di presentâ doi esposcj, il prin ae Cort dai Conts, il secont ae Procure di Udin. Une linie difensive, chê de justizie, simpri plui inevitabile di front de arogance dai governants. ❚
David Zanirato