Putropis zonis bacigadis di Viene – soredut parcs – no àn mai vût un non uficiâl. La prime robe che si ricêf, cuant che si ven in chest mont, al è il non: i ven dât a dutis lis personis, a ogni animâl domestic e fintremai a cualsisei ogjet. Ma pai vienês a son cetant impuartants i nons des areis che lôr a frecuentin, ven a stâi stradis, viucis o parcs. Flôrs di comissions a vegnin metudis sot par cjatâur il non plui adat, e pûr a son inmò tancj i lûcs di Viene che a son cence non, si ben che la plui part de int no si inacuarzi. Un esempli al è il “Fuchu-Park” a Hernals, che lu clamin cussì dai prins di Otubar par vie de amicizie trentenâl dal distret cu la citât gjaponese di Fuchu. Il fat che il parc nol vedi vût inmò un non uficiâl al è stât scuindût par desenis di agns di un altri non popolâr, doprât dai aventôrs, ven a stâi “Kastanienpark” (Il parc dai cjastinârs), in graciis de presince di cetancj di chescj arbui.
◆ I nons popolârs no divegnin dut câs nome dai arbui: il parc che in dì di vuê si clame “Christine-Nöstlinger-Park” prime di chest non uficiâl al jere cognossût tant che “Lidlpark”, parcè che al confinave cu la viuce “Lidlgasse”. Prime de trasformazion de place “Loquaiplatz” e dal parc omonim, la aministrazion distretuâl si è inacuarte che chest non nol jere mai stât conferît in vie uficiâl, par vie che Ferdinan Loquai al jere antisemite. Intant che la place e continue a mantignî il so non, chel dal parc al è stât mudât in “Schmalzhoftempelpark”, dal non de sinagoghe che fintremai al 1939 si cjatave jenfri la place e il parc. No son spiegazions par cheste incoerence, se no che il cambiament dai recapits al inmanearès un davoi burocratic pe aministrazion comunâl, pai citadins, pai mieçs publics, pai corîrs. Cun di fat, al è plui facil mudâ il non dai parcs, stant che non àn indreçaments. Par chest, intai ultins vincj agns a àn mudât non cetancj parcs e cetancj plui piçui a ’ndi àn vût un gnûf di scree, fale – ben clâr – chei storics sicu Schönbrunn, il Volksgarten e il Burggarten.
◆ Il fat che si cirin di un continui gnovis areis di denominâ, al dipendarès dal mudament di percezion dai valôrs inte societât dulinvie dal timp. Se par vieri i toponims a jerin cuasi dal dut cun riferiment a personaçs masculins, in dì di vuê simpri plui dispès si atribuissin nons di feminis, ma al è clâr ancje ai aministradôrs che chest procès al à bisugne di timps luncs.
◆ Pe atribuzion di un non a van rispietâts cierts criteris: la persone è a di figurâ tant che un valôr in plui pe citât o pal distret, o ben jessisi impegnade in mût impuartant a pro dal ben comun. Cun di plui e à di jessi muarte, e su chest Viene e je une ecezion, stant che inte plui part des citâts austriachis si puedin tribuî ancje nons di personis in vite. Chest al pues dâ problemis, come pal stadi di Graz, intitulât a Arnold Schwarzenegger intal 1995. Cuant che intal 2005 lui al à refudât la gracie a un condanât a muart, e je sclopade une barafuse – a peraulis, ben si intint – e par chest si à scugnût mudâ il non al stadi. In sumis, a Viene i nons no mancjin e – se dal câs – no son i lûcs a cirî un non, ma i nons a cirî un puest: no dome parcs, ma ancje palaçons popolârs, gnûfs cuartîrs abitatîfs e v.i. ❚
Batisim intardât pai cence non!
Barbara Cinausero