La zovine furlane, zuiadore di hockey
e professioniste inte comunicazion
e te organizazion di events, si conte a cûr viert
Provin a fâ un zûc. O metin dentri di un bussulot l’insium di une zovine di fâ alc di grant, la volontât di meti adun la sô professionalitât in diviers ambits, la voie di tignî le identitât culturâl furlane e l’amôr par une dissipline sportive che intal nestri teritori no jere ancjemò cognossude. Messedìn dut. E vignarà fûr une persone sole: Benedetta De Cecco, di Faugnà, borc dongje Martignà.
◆ La protagoniste di cheste storie e je une furlane che a vîf la sô disabilitât cun la fuarce di chei che a san che dome cun l’inzen e l’impegn di ogni dì si rive a lâ indenant. E, pûr cuintri cetantis dificoltâts, e je simpri in prime linie, cun iniziativis e progjets di preseonâ.
◆ Benedetta e à tacât cun l’hockey in carocine eletriche, cun la scuadre dai Madracs che ancje inte prossime stagjon a tignaran alte la bandiere dal Friûl come che a àn fat in tai ultins agns. Je a zuie come “sticker” e e fâs di dirigjent di riferiment par dute la ativitât dai Madracs, a nivel organizatîf e di comunicazion, cun passion e competence di insegnâ a ducj. E, dal sport, e à savût rimpinâsi intune profession che le puarte ator pal mont.
__
Di indulà vino di tacâ par cognossi l’univiers clamât Benedetta De Cecco?
“Al è un univiers une vore complicât e cun tantis musis che a si cjatin dongje te mê personalitât. O ài une grande passion pal sport, par i events e in dut ce che o fâs o met dedizion e cetante cure. In chest moment de vite, l’aspiet lavoratîf e professionâl al è sorestant. O lavori come libare professioniste, cun tant di partide Iva, vierte cuant che o mateavi cun la associazion di Bale tal Zei di Triest. Daspò che chê colaborazion e jere finide, o ài continuât a lavorâ cun diviers clients, soredut cuntune Agjenzie di Londre. L’obietîf al è chel di meti adun events di nivel internazionâl, di chei che a puartin tante int”.
__
In tal specific, cuale ise la tô competence?
“Si scuen discubiâ lis robis. A nivel locâl, par i miei clients o curi dute la comunicazion digjitâl e sociâl. Cu la agjenzie inglese o matei ancje su la part di organizazion, di logjistiche e di coordenament dai events. O ài studiât Relazions Publichis e o ài puartât indenant chê competence, ancje daspò la specializazion in “Sport Business Management”. Cun dut che chescj studiis, par cumò, a no mi àn dât cuisà ce a nivel di ocasions par lavorâ”.
__
La tô disabilitât tropis oportunitâts e tropis dificoltâts ti puartie?
“Chest al è un aspiet une vore impuartant. Tantis voltis, si pense che une persone disabil e rivedi a fâ cuasi dut, come une persone cence disabilitât. In cetancj câs al è cussì, ma no simpri. O ài vût dificoltâts reâls intal inseriment intal mont lavoratîf: no son ducj disponibii a vê a ce fâ cun personis cun disabilitât. Cumò o soi fortunade parcè che o ài cjatade une realtât indulà che o mi cjati une vore ben. In plui, al è simpri un probleme di fature pai timps di vite che, par une persone disabil, a son une vore plui luncs. O ài zontât cetancj impegns che, forsit, al jere miôr lassâ, par no cjatâsi cu la aghe al cuel ogni volte, par mancjance di timp”.
__
Cuale ise la tô filosofie?
“In tal ambit professionâl, l’an passât o soi lade sul palc di sene di un event clamât “Women X Impact”, che o ài judât a meti adun par l’agjenzie Horizon Group. O ài fevelât denant di centenârs di personis: il gno intervent al è stât intitulât “Dream Ability”, la capacitât di insumiâ in grant e di cori daûr di chei siums, pûr vivint a une velocitât di 12 chilometris a l’ore. Sigûr un limit, ma che al no mi ferme intal dâ il gno massim, simpri e dut câs”. ❚
::::::::::::::::::::::::::::::::::::::::::::::::::::::::::::::::::::::
Friuli Summer Camp, il memorial Alessio Moro e met il turbo: cetantis iniziativis par cont dai Madracs
Dai 9 ai 13 di Avost, tes struturis di Plancjaval, si cjataran zuiadôrs di hockey in carocine eletriche di dute Italie par jessi dentri dal “Friuli Summer Camp”. La ultime zornade, domenie ai 13, a vignarà dedicade al torneu in memorie di Alessio Moro. “Daspò dal Covid – e conte Benedetta De Cecco – o sin rivâts a meti adun cheste iniziative par ricuardâ il nestri amì Ciccio, un compagn di scuadre che a nus à lassâts masse adore. Di simpri, ducj nô dai Madracs o vin voie di fâ alc par tignî a ments Alessio. Lui al è stât un di chei che plui a àn vude passion par tirâ sù la scuadre. Cuant che al jere ancjemò vîf, o fevelavin cui lui di cheste robe e lui no le cjapave mai tant in mût seri. Par lâ daûr dal spirt che Alessio al à simpri vût, o vin pensât di fâ un torneu che al dedi la pussibilitât a tancj di divertîsi, intune zornade, par vivi il sport che a lui e a nô nus plâs di plui”.
◆ Intal mês di Setembar, ancje in chest câs daspò dal Covid, e torne la stafete “Dodis par un’ore”, rivade ae seste edizion, e clamade come simpri “Met il Turbo”. Intal parc “Ardito Desio” di Udin, a saran tancj di lôr a cori. “Un event cetant complicât di meti su – secont lis peraulis di Benedetta -. Sperìn pardabon che nus dedi sodisfazion. Al sarà un barachin viert par dute la zornade, a saran grups par sunâ musiche dal vîf, artiscj, spetacui e la ben cognossude “Color Run””. ❚
::::::::::::::::::::::::::::::::::::::::::::::::::::::::::::::::::::::::
Dal scudet scjampât ai Madracs 2.0; un gnûf progjet intal hockey cun la carocine eletriche in Friûl
Daspò jessi lâts dongje a vinci il titul talian, i verts e neris dal president Ivan Minigutti si preparin pe prossime stagjon cun tancj zuiadôrs aes primis esperiencis
Inte vierte dal 2010, une clape di amîs e à metût adun une associazion sportive pe pratiche dal hockey su la carocine eletriche, cul obietîf di zuiâ intun contest agonistic. Il non “Madracs” al conte une vore ben il stamp dai fantats piturâts di vert e neri: madracâ intal cjamp di zûc, cirint di sburtâ la balute dentri da la rêt.
◆ Le dissipline che, par inglês a si clame Powerchair Hockey, e je nassude par permeti aes personis cun disabilitât, pûr grivie, di fâ sport, su la fonde da lis lôr pussibilitâts.
◆ Daspò dai prins agns in serie A2, intal 2017 la scuadre furlane e à vint il campionât da la seconde serie taliane e e je lade su in A1.
Pôc a pôc, cul tirâ dongje esperience, tecniche, zuiadôrs simpri plui fuarts e entusiasim, intal 2022 e je rivade la finâl par il scudet, cuintri Monza, daspò vê batût Vignesie, la scuadre plui fuarte e plui vitoriose dai ultins agns in Italie. Nuie ce fâ par i Madracs: dome la sodisfazion di jessisi rimpinâts a nivei di ecelence in Italie, partint di un insium di dîs agns indaûr.
◆ “I risultâts a son stâts simpri une vore preseâts – e dîs la De Cecco -. Dut câs, chê finâl pierdude a nus à fat capî che al jere alc che nol leve inte juste direzion e o vin pensât di cambiâ. Rivâts dongje dal insium, ancje pe delusion par chê batude di arest, no dome intal cjamp, si ben par dute la societât a 360 grâts, i rapuarts dentri inte scuadre si son disfredâts e o vin scugnût tornâ a partî. Une sielte dificil, cun dut che cumò o sin rivâts a meti adun i Madracs 2.0”.
◆ Desenis di zuiadôrs, miârs di chilometris, sù e jù par l’Italie, vitoriis, batudis, emozions e cetant divertiment a son i elements che a segnin i Madracs furlans dal president Ivan Minigutti. Cumò, saludâts diviers zuiadôrs e passade une stagjon indulà che e je rivade le salvece in A1, rivade ancje cun il jutori dal olandês Kamal Tahtahi, un dai plui fuarts atlets al mont che al à decidût di vignî in Friûl pa lis partidis, la societât a partìs cun un gnûf progjet sportîf.
◆ Tancj zovins, a lis primis esperiencis e le volontât di onorâ il miôr pussibil il campionât numar 7 in ta la massime categorie taliane. ❚
