Prime part – Aspiets introdutîfs
Ducj i organisims che si spostin in maniere ative a doprin viis preferenziâls par fâlu. Inte nestre specie, chestis viis a àn cjapât intal timp simpri plui impuartance, e chês terestris, cul aument des personis e dai mieçs che lis percorevin, si son adeguadis a sopuartâ une cjame simpri plui grande.
◆ Un di chescj adeguaments al tocje il fonts stradâl, dulà che un timp al vignive metût jù il pedrât. Chest mût di fâ al è lât ben fin che lis stradis a jerin dopradis di personis, e che i mieçs a lavin biel planc e a jerin mots dai animâi. Cuant che però a son rivâts i mieçs a motôr, chest gjenar di soluzion e à tacât a no lâ plui ben, ma ancje il fonts stradâl ingravât nol jere plui adat a machinis che a corevin simpri plui e che, cun di plui, a produsevin un polvaron.
La rispueste a di chescj problemis e je rivade dal asfalt che, intal cors dal secul passât al à caraterizât simpri di plui i centris urbans e lis viis, prime chês di grande comunicazion e dopo, a man a man, dutis chês altris.
◆ Par adeguâ lis stradis al numar e al gjenar di mieçs e al trafic simpri plui fuart a son stadis realizadis altris modifichis, tant che la retifiche e slargjament dal plan stradâl, la costruzion di oparis colegadis (marcjepîts, cunetis, rêts di protezion e vie indevant) e altri che a àn fat in mût che lis viis di comunicazion a doprassin un toc simpri plui grant di teritori.
L’om al vûl spostâsi in comoditât dapardut, e par fâlu al costruìs stradis. Cu la disponibilitât di bêçs, di mieçs mecanics e di imprescj che e je in dì di vuê, a son stadis realizadis stradis in puescj dulà che timp indaûr al jere impensabil e impussibil.
◆ Chestis stradis a van a traviersâ ambients naturâi e duncje a puartâ machinis, camions e altri in areis dulà che prime si rivave dome a pît.
◆ Par via de comoditât, ma ancje di interès personâi e/o di part (pussibilitât di rivâ in lûcs particolârs, edificis o terens di proprietât, pussibilitât di fâ manifestazions di un ciert gjenar e vie discorint) o dome pe disponibilitât di bêçs, in diviers câs lis stradis a vegnin asfaltadis.
◆ Al vûl però considerât che intai ambients traviersâts des stradis a vivin e si spostin ancje i animâi, no dome l’om. Chest al pues vê un grant efiet: al è sot i voi di ducj il numar di animâi muarts dilunc des stradis.
◆ Chest al è un probleme globâl che, cul sparniçâsi des viis di comunicazion intai ambients naturâi, al à incidût simpri di plui, rivant ancje a impatâ une vore a fuart sedi sui habitats che sui animâi.
◆ Intes areis plui antropizadis, di fat, il trafic stradâl al è une des causis che e pues vê un dai efiets plui grancj su la sparizion o su la riduzion di ciertis speciis.
Lis stradis a van a traviersâ lis areis vitâls dai animâi che a son costrets a passâlis, cun ducj i pericui che chest al compuarte.
In mont la costruzion di stradis e permet di rivâ, ancje cun mieçs mecanics, in puescj ancjemò avonde naturâi. Si vierç cussì la pussibilitât, par diviersis personis in gjenar no educadis al coret rapuart cul ambient naturâl, di “esplorâ” gnovis zonis dulà che, cemût che l’autôr al à plui voltis verificât, i segns de presince dal om e ducj i lôr efiets negatîfs a deventin evidents in pôc timp. Dut chest al aumente intal câs che lis stradis a sedin asfaltadis e che a deventin plui numerôs i passaçs di personis e, soredut, di veicui.
◆ Un altri aspiet di tignî di cont al è che la viabilitât e permet di rivâ in puescj tant distants dai centris abitâts, e cussì di incressi a fuart la pussibilitât che chescj a sedin antropizâts. Chescj a son lûcs dulà che i animâi no son usâts a vê a ce fâ cun stradis, machinis, oms e dut ce che chest al compuarte e che, di sigûr, nol è di ciert un ben in tiermins di naturalitât e biodiversitât e, in fin dai conts, di pussibilitât di vite dai animâi.
◆ I cadavars che a vegnin viodûts di ducj a son chei dai animâi plui grancj, ma tancj piçui animâi a cjatin la muart par vie dal trafic stradâl e nus lassin inte indiference totâl parcè che no son viodûts di nissun o di une vore pôcs di lôr.
◆ L’autôr al à par chest volût condusi un studi che al valutàs in maniere sientifiche cuâl che al è l’impat dal trafic stradâl su chescj piçui vivents in stradis di mont dulà che il passaç di veicui al è bas e duncje calcolât irilevant. Di fat, un erôr che al ven dispès a cjatâsi intai resonaments dai “no incaricâts ai lavôrs” al è chel di pensâ che se lis stradis a son di piçulis dimensions chest nol compuarti problemis ai animâi e, dut câs, che l’eventuâl impat al sedi piçul. Tra l’altri, si à di tignî in considerazion che il gjenar di resonament plui frecuent al è il “no resonament”, intal sens che la grande maiorance des personis e je tant lontane dal mont naturâl che chest gjenar di problematichis no le tocje minimementri. E intal câs che si ponès il probleme, chest al ven considerât di nuie, stant il gjenar di culture e la forma mentis.
In realtât, diviers studis sientifics a àn mostrât che la mortalitât su lis stradis e je un fatôr significatîf intal declin des popolazions di anfibis e di retii. La costruzion di stradis e operis colegadis e je cun di plui responsabile de distruzion di tancj sîts riprodutîfs dai animâi.
I spostaments che a permetin di rivâ intai sîts riprodutîfs a son un dai fatôrs di pericul plui grancj pai anfibis: di fat, in cierts periodis, chescj si spostin viers biotops particolârs par incubiâsi. In Friûl chest al è evident soredut dilunc cualchi strade, dulà che ‘sâfs e crots a vegnin cjapâts sot in grant numar.
◆ Lis stradis, però, a son dopradis dai animâi ancje par spostâsi propit dilunc di chês e parcè che, in cierts câs, a cjatin di mangjâ plui facilmentri: ancje chest al aumente il pericul che a sedin cjapâts sot. ❚
La seconde part e sarà publicade sul numar di Dicembar.
