Bivare, la ultime bataie cuintri des servitûts militârs che di agns a tormentin la nestre mont e il Friûl intîr

Il Friûl al è une tiere di confin, ancje se o dismenteìn che te storie e je stade dispès ancje une tiere che e à fat di puint a umanitâts diferentis cun daûr di lôr storiis e lenghis. Dut câs, chi bataiis a ‘nd è stadis un grum: almancul 48 invasions in 2.000 agns, in pratiche une ogni 40 agns. Si podarès dî che o sin usâts ma forsit, par fortune, a esistin câs che a disin il contrari. Tal 1967, in plene vuere frede, al vignive fûr il Libri Blanc cu la Mozion dal Cleri, indulà che une vôs e berlave cuintri lis servitûts militârs, no dome par une reson etiche ma ancje, e soredut, considerant i timps di emigrazion di chê volte. I militârs a rivavin a strops di dute Italie e noaltris a strops o partivin pal forest parcè che chi nol podeve jessi il “boom economic”. Cheste chi e veve di jessi la potenziâl tiere brusade tal câs di une invasion di bande est. Ven a stâi: casermis sì, fabrichis no, e dut il rest di consecuence. La storie e à fat il so cors e lis casermis a son stadis pe plui part sieradis ma il probleme des servitûts militârs al reste, ancje se in maniere diferente. Cumò a son cambiadis lis armis, no vin pui il “gran nemì” che al rive di est, o vin tancj nemîs invisibii e potenziâi, cussì o vin dibisugne di armis, ancjemò, sedi par fâ peace keaping che par difindisi. Di cui, no si sa.
Davian al reste, ancje se o vin votât in masse cuintri il nucleâr, Rivolt al è deventât une base operative, e i poligons a coventin a mantignî preparade la nestre, e no dome, fuarce di intervent. Tai ultins timps, in particolâr, si è sintude plui di cualchi vôs fûr dal coro par difindi i teritoris SIC (Sîts di Interès Comunitari) de mont Bivare (zone tra Sapade, Fors e il Cjadovri) e di chei di Celine – Midun. Si son mots i comitâts locâi; il WWF al à fât denunciis claris; a nivel provinciâl, il Front Furlan al à organizade une manifestazion di solidarietât ative; in Regjon, Antonaz al à fate plui di une interpelance; a nivel nazionâl, i rapresentâts de regjon dal Movimento 5 Stelle a àn presentade une mozion parlamentâr. E dut chest, parcè? Prin di dut parcè che in chei doi puescj la int e vîf e lis ativitâts agriculis e zootecnichis a patissin di chestis esercitazions. Colps che a fasin pôre aes bestiis che a passonis, che no permetin ae faune dal puest une situazion di calme par podê continuâ a riprodusisi, considerant che la zone e varès di jessi protezude. “Ma chel al vâl pai comuns mortâi, no pai militârs”, al à vût dit il sindic di Soclêf.
A Ciline – Midune, une analisi resinte dal teren là che si davuelzin chestis esercitazions e à rilevât la presince di metai pesants, segn di un incuinament seri de zone: no urani impuarît, ma distès un puest indulà che al è miôr no lâ a fâ un ghiringhel. Un alarm che al è stât slargjât fin ae Bivare. Doi sîts SIC che a vegnin incuinâts. Lis aministrazions de zone a àn cjapade une posizion clare e nete, contrarie ae presince dai poligons.
Tal câs de Bivare, al è impuartant visâsi che tal 1979 un moviment pacific di popul al veve metût in crisi chestis esercitazion midiant di une schirie di tam tam tra comunitâts e une strategjie di boicotament pacific (si impiavin fûcs tes zonis di esercitazions, a passonavin bestiis, e passave int). Par completâ la suaze, si àn di considerâ ancjemò doi aspiets: un economic e chel altri intune prospetive future. Tal prin câs, nol sarès fûr lûc visâsi che la crisi no je dome un cantin de biade int. I colps che a vegnin doprâts là sù par esercitâsi a costin 1000 € dal un, ogni bum! Cjartis di mil che a van come nuie. La seconde, ancjemò pui serie e preocupante: il rivâ a Vicence dal 173 batalion avio traspuartât american cun sede a Vicence (Dal Molin) ma di fat operatîf cun Davian e cuntune zone di esercitazion che facilmentri e sarà chê de Bivare. Il limit stagjonâl concuardât tra esercit e Regjon al è stât rot tal Jugn di chest an e in plui al è une vore probabil che ce che al jere di pertinence taliane al sarà prest sot la grande ale NATO, ven a stâi a saran pui militârs che a zuiaran a fâ la vuere intune zone SIC. Chel de mont Bivare nol è un câs isolât: Trasaghis, Osôf a continuin a segnalâ e a tirâ sù firmis par limitâ il svualâ a cuote basse di elicoteris e avions militârs. Il probleme al reste. Il Friûl nol rive a jessi considerât tiere di pâs, puint tra culturis. Intun periodi di pâs a continuin a pensâ che o vin di fâ la vuere a cualchidun. Intune societât civîl, la int e varès di contâ alc. Resisti al è impuartant ancje par chest. ❚
Mauro Della Schiava