Che al fasi un pas indenant cui che, vie pai mês de sierade fuarçade dal an passât, nol è colât inte tentazion di meti lis mans in paste. Nol covente fâ stât su lis statistichis: lis scansiis di buteghis e supermarcjâts lu àn confermât, cussì come che lu àn testemoneât lis milante fotografiis che ducj noaltris, cu la braùre di masterchefs perfets, o vin doprât par ingolfâ lis pagjinis dai social.
◆ Dal rest, par un marilamp cualchidun al à pensât pardabon che lis sôs sperancis a podessin tornâ a cressi tant che chel impast che biel planc al jevave sot dai siei voi.
◆ Dal sigûr però, di chê esperience, platant i chilos che o vin ancjemò di parâ jù, o vin scuvierzût che ogni farine e à carateristichis diferentis e, ancje di profans, o vin imparât a miscliçâlis e a doprâlis al miôr daûr dai guscj e des preparazions.
◆ Cun di plui, si sin ancje inacuarts che no ducj i impascj a àn la stesse digjeribilitât, cussì come che, magari cussì no, tantis marchis comerciâls no àn il stes rindiment dai prodots in vendite dal pancôr o dal contadin dongje cjase. Di là dai cereâi doprâts (aromai al è dome ce sielzi, tra forment, formenton, spelte, sarasin, siale, soie, rîs e vie indevant), di fat, al va ricognossût cemût che i produtôrs locâi a sedin, in gjenar, coltivadôrs simpri plui atents e sensibii, ancje par chel che al tocje la salût dai consumadôrs, massime cuant che si fevele dai plui piçui.
◆ Tra lis bielis gnovis dal mês di Març, e va ricuardade la presentazion di “AmorBimbi”, une farine di forment creade dal mulin Moras di Trivignan (une des realtâts produtivis plui antighis de nestre tiere cui siei 110 agns di ativitât) e studiade di pueste pe alimentazion di grancj e frutins, a tacâ dai trê agns insù.
◆ La normative specifiche pai prodots alimentârs pe infanzie, di fat, e cuvierç dome la fasse di etât che e va dai 0 ai 3 agns, biel che no esist nissune atenzion pai fruts plui granduts (seconde e tierce infanzie), che a vegnin considerâts tant che adults, no cate la lôr dimension ridote e il metabolisim diferent.
◆ A une mame ciertis mancjancis no puedin scjampâi, massime se e je responsabile dal setôr Ricercje e Disvilup, come che al à stât par Anna Pantanali dal mulin Moras. Cussì, intal 2017 e je stade inviade une colaborazion cul dotôr Carlo Brera dal Istitût Superiôr di Sanitât, che e à puartât ae definizion di un prodot certificât unic intal so gjenar, cence pesticidis e cence glifosât, cuntune riduzion dal 80% di micotossinis rispiet al limit massim stabilît par leç de Union Europeane (i risultât de ricercje a son stâts presentâts ancje a Rome, vie pal sest congrès nazionâl su lis micotossinis e su lis tossinis vegjetâls inte filiere agroalimentâr).
◆ Intal progjet di ricercje a son stadis cjapadis in considerazion dutis lis fasis di realizazion: dal grignel, ae farine, fin a rivâ ae distribuzion des micotossinins intal pan e altris lavorâts daspò cuets. Cun di plui, e je stade creade une procedure certificade di pueste par chest prodot: ogni singul lot al ven analizât e ducj i passaçs a vegnin controlâts intal detai, di mût di garantî nivei alts di cualitât e di sigurece alimentâr de farine.
◆ Ancje il scartòs al è fat dut di cjarte (100% plastic free), rigjavade di forestis sostignibilis e certificadis PEFC (daûr dal Program di valutazion dai schemis di certificazion forestâl), e par confezionâle e ven doprade dome cole a aghe.
◆ Fondamentâl ancje la sielte de divignince dal forment, che al rive di un progjet di filiere curte regjonâl, te stesse maniere de farine biologjiche “Flôr di Lune”, risultât dal progjet a chilometri 0 “Coltiviamo il pane del futuro”, nassût intal 2014.
◆ Pai plui tecnologjics, infin, al esist un sît internet (https://shop.molinomoras.it/), ancje chel “chilometri Zero” za che al è stât disvilupât de dite furlane Ensoul, che e à simpri lavorât une vore cu lis realtâts ativis pe lenghe furlane e intai ultins timps si è ben impegnade tal setôr dai plui piçui (une altre sô creazion resinte e je il progjet “Ghiti”).
◆ Intun periodi li che fâ pan in cjase al somee plui un divertissement che une buine pratiche, ancje par colpe de grande distribuzion organizade che e propon i siei prodots “a pene vignûts fûr dal for” (che però a dîle juste a son precusinâts e surgjelâts e in buine part a rivin de Europe dal Est), la sielte dal mulin Moras nus mostre la strade juste di percori, par un avignî – nestri e dai nestris fîs – plui san, sostignibil e atent ae realtât locâl. ❚