Ai 12 di Avost dal 2024 e je stade inaugurade la Fatorie didatiche “Borc Nêls” a Darte. “La sielte dal non – al conte il zovin Piero Bertuzzi – e je stade fate par ricuardâ e no dismenteâ lis mês lidrîs: gno nono lu clamavin Mario di Nêl parcè che so pari (gno nono bis) al veve non Daniele Bertuzzi, sorenomenât Nêl.”
◆ La idee de fatorie e je peade soredut ae grande passion di Piero pe agriculture, ancje se il lavôr che al fâs (il banchîr a Udin) lu puarte a stâ fûr di cjase dut il dì.
“O vevi za un lavôr – al conte – e no podevi molâ dut par vierzi une stale di vacjis. O ai scugnût cjatâ un compromès tra la vite che o ai cumò (famee e lavôr) e la mê passion. O ai tacât a meti dongje i tassei par capî ce che o podevi fâ: achì o vevi comprât e fat sù la cjase, dopo planc plancut o ai comprât diviers tocs di prâts dongje. Tabaiant cu la mê femine Debora, e je nassude la idee de fatorie didatiche. Jo le viodevi dome come un puest indulà che a son animâi e a Debora i plâs une vore stâ cui fruts; duncje mi è vignude tal cjâf cheste idee achì par meti adun lis dôs robis. O ai fat il cors pes fatoriis didatichis e dopo, un pôc par volte, o ai tacât a fâ sù il gjalinâr e il sotet pai cjavai. Cul cors o jeri lât a viodi cetantis fatoriis inte Basse che a son struturadis in maniere diferente di ce che o vevi tal cjâf jo: a àn dut dret, grancj terens placs e par chest mi sintivi di vê fat pôc. Alore dopo o vin decidût di fâ sù lis dôs cjasutis indulà che o fasìn lis ativitâts didatichis cui fruts, che par me al è come zuiâ e divertîsi in compagnie tal viert.”
◆ Te fatorie o vin gjalinis, cunins, razis, dôs copassis di tiere, un cjaval, une piore e une cjavre. Pes ativitâts didatichis o vin dôs cjasutis di len clamadis “cjase des furmiis” e “cjase des cialis”. Nol mancje il parc cui zûcs e une zone cun taulis e bancjis par mangjâ tal mieç de nature.
“O vin za fat un event: cualchi timp indaûr – al conte Piero – a son vignûts sù miei coleghis de Basse, ducj banchîrs, e o vin organizât une zornade in fatorie: e je lade benon. Ju vin spartîts in grups: i oms a àn slargjât il fen, a àn provât a seâ cul falcet e a àn viodût cemût che si lu gucje, a àn fat i fassons e metûts sù sul cjâf par puartâju inte stale dal cjaval. I fruts a àn fat tintinis cu la robe che si cjate in nature, lis feminis a àn cjapât sù i ûfs tal gjalinâr e a àn fate la fertaie cu la robe che o vin tal ort. A varessin vût ancje di netâ la stale, ma no sin rivâts! O vin fat un moment di convivialitât e dopo o vin fat un zîr cul cjaval. A son stâts ducj contents!”
◆ Piero al à inmò tal cjâf un grum di progjets: il prin al è chel di meti impins un sît internet indulà cjatâ dutis lis informazions su la fatorie. “Mi plasarès – al continue Piero – ancje pensâ di plantâ un vignâl, ma viodarìn plui indevant ancje parcè che al è di studiâ. O sin stâts contatâts des scuelis di Damâr parcè che a volaressin passâ une zornade achì. Noaltris o sin contents di ospitâ i fruts che a podaran passâ cualchi ore tal mieç de nature.”
◆ L’invît al è chel di lâ a dâ un cuc a cheste biele realtât, poiade ad ôr dal bosc, che e cjale di parsore la taviele di Darte, sot il voli atent de Plêf di Sant Pieri di Cjargne. ❚