“Jere lì c’a mi spietave / jere lì su chel porton / jere lì c’a saludave / l’ai viodude pal barcon // Benedete ‘zoventût / ca mi à ciapât pe man / e insieme a vin corût / e sin rivâs cussì lontan // Son passadis li stagions / un altri inviâr al è tornât / jerin lì c’a si s’cialdavin / donge al fuc nus àn ciatât. // ‘Zoventût! Zoventût! / cussì biele malatie / tant plancut tu ses vignude, / ma tant svelte lade vie”.
◆ Al è un librut di sessantesîs pagjinis che al à dentri vincjetrê tiriteris (trê a son par talian) e nûf ricuarts (ancje di chei, trê par talian), insiorâts di une presentazion di Giuseppe Zigaina.
◆ Bruna (1922 – 2015) e jere une femine furlane che e veve une istruzion elementâr (sîs classis), ma une passionate dentri, un gust dut so par scrivi, par no permeti che i ricuarts si sfantassin inte dismentie. Parcè lassâ passâ la fieste dai paris, il complean de mari, lis gnocis dai amîs, il Nadâl, cence meti jù cuatri rimis cence pretesis, ma scritis cul cûr? La plui part a son componiments di ocasion, ma cualchidun si slargje fin a tirâ fûr cualchi emozion plui profonde, come la fionde cjatade daspò agnorums intune sfrese dal mûr de stale o un pelegrinaç a Lourdes. E cheste impression e ven fûr ancje cun plui fuarce intai ricuarts in prose: il cjadreon dal Negus, il camin de fornâs che al à di vignî jù, il cjaruç tirât di un cjan e il gjat neri che i scjavace la strade, il tirecorean (domandâ a cualchi von se al sa ancjemò ce che al è…), il miluç di Eve e di Adam, i ciroics improvisâts che a operin un crot: une umanitât di paîs, semplice e puare (“une volte o vevi miserie, cumò no ai nancje plui chê”).
◆ La peraule poesie no si le cjate mai, tiriteris e je peraule plui juste. Composizions scletis e lizerinis, cualchi volte cuntun bon sens dal ritmi e cuntune ande naïf plasevule. Leìntlis no si à di cirî cuissà ce sorte di Dante Alighieri, ma pensâ ae sodisfazion che e à di vê vude Bruna a viodi stampadis lis risultis di chê sô biele passion. Ancje parcè che un lamp di poesie nol mancje: al è propit inte prime tiritere (chê citade in viertidure), cun chê sorte di invocazion ae zoventût: la robe plui biele di dut il librut. ❚