La atlete di Blessan di Basilian, cumò dirigjente a Tarvis, e maravee ducj cun risultâts e passion che no mole, daspò dai 80 agns
Cemût si fasie, a 80 agns, a trai un martiel a plui di dîs metris e jessi cognossude tant che une des miôr atletis de Italie? Nissun fastidi, se tu ti clamis Brunella Del Giudice. Nassude a Blessan di Basilian ai prins di Fevrâr dal 1943, e à tacât a impegnâsi intal sport (e no dome), bielzà di frutute. Cumò, daspò di une vite passade a lavorâ, a insegnâ, a alenâsi e a competi in ducj i cjamps di atletiche, in Italie e fûr dai confins, e je presidente de storiche Associazion Sportive “Mario Tosi” di Tarvis, e e va indenant a fâ garis cuintri dai veterans, cun risultâts une vore preseâts.
_
Di indulà vino di scomençâ, par contâ Brunella Del Giudice?
“Cuant che o jeri une frutute, intal gno paîs, a Blessan di Basilian, mê mari e i nonos a lavoravin ducj, e jo o lavi ben a scuele. Duncje, cun tancj sacrificis pe famee e cun cetante sodisfazion, a àn rivât a permetimi di lâ a scuele a Udin, par frecuentâ il Liceu classic “Jacopo Stellini”. O lavi a Udin in biciclete a buinore, e o tornavi indaûr, simpri in biciclete, intal dopomisdì, par dopo studiâ a cjase e par dâ une man cui lavôrs in famee. O pensi che propit dut chel moviment, in biciclete, sù e jù, di Blessan a Udin, par ducj chei agns, mi vedi judade une vore par tirâ sù un fisic atletic e cun atitudin a fâ sport”.
_
Lis primis garis?
“Bielzà tes scuelis mediis o vevi tacât a fâ garis. Dut câs, al liceu o ai rivât adore di fâ part de scuadre dal GUALF, cemût che a clamavin il Grup udinês di atletiche lizere feminîl. Inta chê clape, mi soi subite inacuarzude che o lavi cetant ben intal trai il pês e, intes primis garis a nivel nazionâl, o soi rivade a risultâts preseâts. Intes classifichis nazionâls o jeri tra lis miôr atletis. Cun chel entusiasim, o ai continuât”.
_
In curt, e je rivade ancje le esperience cu la Nazionâl di atletiche.
“Sì, esperiencis maraveosis. E o lavi indenant a studiâ, cul jutori di mê mari, che e à pardabon fat une vore di sacrificis, che no pues dismenteâ. Finît il liceu, ducj mi sburtavin a lâ indenant a studiâ ae Universitât. O ai sielzût Jurisprudence, a Triest. In chei agns, massime a Blessan, lis zovinis che a lavin te Universitât no jerin tantis. Jo o studiavi e, intal stes timp, o lavoravi par vuadagnâ cualchi franc par paiâ il studi. Un pôc par câs, un pôc parcè che mi sintivi intal gno mont, o ai tacât a lavorâ intes scuelis, cui frututs, fasint lezions di educazion fisiche”
_
Il passaç de Brunella studente di leç e atlete ae Brunella insegnante di educazion fisiche isal vignût culì?
“Intant che al passave il timp, o sintivi che la Jurisprudence no jere il gno avignî. Mi cjatavi une vore miôr a insegnâur il sport ai zovins. E no jere dome une cuistion di bêçs che o vuadagnavi lavorant inte scuele. Le sintivi plui come une mission che mi faseve plasê puartâ indenant. Dit e fat, o ai molât la Universitât cuant che mi mancjavin dome un pâr di esams par finî dut. Cu lis suplencis o soi rivade fin a Tarvis. Intai prins timps, no crodevi di podê fermâmi chi. Pense il destin! Cumò a son plui di cincuante agns che o soi ca sù. O lavi indenant a insegnâ, intant che o studiavi al Isef di Bologne, par deventâ insegnante di educazion fisiche. Dal 1973 o soi professore”.
_
Daspò di chei agns, une vite pe comunitât, pai zovins, simpri cu la stele dal sport a dâ la direzion juste.
“Cul gno om, Antonio Kravina, cui fîs Daniele e Elisabetta, o sin simpri lâts indenant cirint di fa il miôr pussibil. Cul fat che o lavoravi, o ai scugnût molâ lis garis come atlete e no mi à pesât cui sa ce. O resti une vore peade aes lidrîs furlanis, a Blessan. Ogni tant, o torni jù, ancje parcè che o voi a fâ alenament a Padier, cuant che il timp al ten: a Tarvis, al è impussibil, par dut l’Invier, rivâ a alenâsi. Mi cjati cu lis feminis che a àn fat cun me il percors intal mont de atletiche. Il furlan mi plâs, e pense che o ai vût a ce fâ ancje cuntune associazion che nus mandave ator pal Friûl a lei storiis e nainis in marilenghe ai frututs, intes scuelis e intes bibliotechis”.
_
E, intai ultins agns, Brunella e à ancje cjatât il mût di tornâ a fâ garis. L’amôr pal sport e pal lanç dal martiel al è tornât cetant fuart.
“O ai vût cetantis sodisfazions. Mi soi specializade intal lanç di chel che si clame “martielon”, un imprest che al à une cjadene plui curte e che si dopre soredut intes garis dai veterans. Cu la Gnove Atletiche dal Friûl mi plâs lâ ator: la passion e je simpri chê di une volte. Il martiel al è il prin imprest, dut câs o fâs garis ancje cul pilot e, agns indaûr, o ai fat ancje il pentathlon. Il fisic che o vevi tacât a alenâ di frutute, cuant che o lavi a scuele a Udin in biciclete, mi à tignude sù. La dimostrazion e je che o ai rivât adore a passâ fûr une brute malatie. Mi à judade l’impegn, la determinazion, la voie di lâ simpri indenant, peculiâr di chei che a san che intal sport si scuen alenâsi e mai molâ, par rivâ a cjapâ un obietîf. O cîr simpri di insegnâ aes feminis plui zovinis che bisugne vê cure dal cuarp, che il sport al fâs une vore ben. E ancje i atletis de mê societât a Tarvis, la “Mario Tosi”, o speri che a ledin indenant cui miôr valôrs”. ❚
…………………………………………………………………………………………..
Campionâts talians, europeans, il mondiâl dai veterans: tancj obietîfs ancjemò di concuistâ
A lei lis pagjinis su la rêt che a fevelin di risultâts, misuris e primâts, si reste impressionâts di dut ce che e rive a fâ Brunella Del Giudice. Daspò de malatie che le à blocade par cualchi timp, e je tornade a nivei di ecelence, in Italie e intal mont.
◆ Intal 2022, e je stade bule di trai il pês di doi chilos plui inlà dai 7 metris e, intal lanç dal disc, la miôr misure e je stade il 18,72 de ultime Istât intune gare a Montebelluna. Inte sô gare favoride, chê dal lanç dal martiel, e à tocjât la misure di 26,87 metris, cul imprest di doi chilos, e 11,84 metris cul “martielon” di cuatri chilos. Brunella e je stade campionesse mondiâl e europeane a nivel master, e no si contin ducj i titui talians che si cjate inte vetrine personâl.
◆ “Chest an – e conte Brunella – a son i Campionâts mondiâls in Polonie, inte citât di Torun, su la fin dal mês di Març. Pecjât che a son masse dongje dal confin cu la Ucraine e des zonis di vuere: nol è il câs di lâ a riscjâ, e mi displâs une vore. Miôr pensâ di alenâsi pai Zûcs Europeans, che a son in calendari intai ultins dîs dal mês di Setembar. Chel al podarès jessi un biel obietîf di pontâ”.
◆ Ae la fin dal mês di Jugn a saran ancje i Campionâts talians, in Sicilie. Cuissà che Brunella Del Giudice no decidi di fâ un viaç fin là jù par zontâ ancjemò cualchi titul tricolôr. ❚
……………………………………………………………………………………………
Presidente de storiche societât “Mario Tosi”, tal puest di Mariano Malfitana, une persone che no si pues dismenteâ
Intal 2022, tal mieç di tancj problemis e cu la pandemie ancjemò presinte, a Tarvis a àn scugnût saludâ une des colonis de Comunitât, no dome sportive. Mariano Malfitana, par agns e agns al è stât une suste cence polse di cetantis iniziativis, sot de Mont Sante dal Lussari. Par 40 agns al è stât un pont di riferiment par dute la Valcjanâl, lui che al jere sicilian di origjin. Mariano al jere president de sezion di atletiche de societât Mario Tosi e, daspò de sô muart in Avrîl, la storiche associazion di Tarvis e à scugnût messedâ lis cjariis par vê la persone juste, cu la competence e la esperience che a coventavin par tignî il dret.
◆ “No podevi tirâmi indaûr – e spieghe Brunella Del Giudice -: par dut ce che al è stât Mariano Malfitana, par ce che al à rapresentât e par ducj chie che a àn intal cûr la Societât, o ai acetât di deventâ presidente”.
◆ Par capacitât, autorevolece, credit e sensibilitât sportive, la sielte plui biele che a podevin fâ te “Mario Tosi”, ancje par valorizâ ce che al è stât Mariano Malfitana. ❚
