Catalan? la lenghe dai catalans e… dai forescj. Lu disin i risultâts de ultime indagjin sociolinguistiche sul ûs de lenghe

Par sfantâ il mît che al è il forest a causâ la muart di une lenghe ancestrâl, l’imigrât o chel che al ven acusât di no integrâsi, al baste consultâ la ultime ricercje sul stât de lenghe catalane, che i siei risultâts a son stâts publicâts di pôc dal Guvier de Catalogne.
Cheste e je la tierce indagjin dal an sul ûs di une lenghe che o fevelìn di chê, daspò di chê furlane (numar di Lui) e di chê irlandese (numar di Setembar): 2014 an de sociolinguistiche, al vignarès di dî…
La ricercje, si diseve, e dimostre che il Catalan al è simpri plui fevelât de popolazion imigrade che e rive par diviers motîfs in Catalogne. La percentuâl di imigrâts in Catalogne e je lade sù dal 3% intal an 2000, a plui dal 15% intal 2014, ma propit dentri di chest 15% e je une continue incressite di locutôrs catalans, int di difûr dai confins de regjon.
Il 28% des fameis nassudis fûr de Catalogne a doprin il catalan cui lôr fîs. Intal specific, il 60,2% des fameis cuntun gjenitôr nassût difûr de Catalogne al dopre il catalan cui siei fîs e il 27,5% di natîfs cun ducj i doi i gjenitôrs nassûts fûr regjon lu dopre cui siei fîs.
FORESCJ: UN SPIELI DI VITALITÂT DI LENGHE
Chest al è un segn clâr che la lenghe e je vitâl e e continue a cressi. In gjenerâl, se i imigrâts no imparin la lenghe di un teritori al vûl dî che cheste e à une pocje vitalitât linguistiche e al è un segn clâr che no je doprade in primis de popolazion autoctone di chel teritori.
“Cundut dai cambis demografics impuartants di chescj ultins timps, il catalan al devente une lenghe simpri plui fuarte: al è il sucès clâr de societât catalane unide e un fatôr sociâl impuartant di coesion” – cussì al à comentât i risultâts de ultime ricercje “InformeCAT-50 dâts su la lenghe catalane” il ministri catalan de Culture, Ferran Mascarell.
Mascarell, cun di plui, al marche il fat che il catalan al è deventât un element di identificazion teritoriâl e culturâl, rinfuarçantsi e infuartintsi pe linguistiche.
ANDE POSITIVE
Chest trend positîf al è confermât di altris dâts. Par esempli, l’ûs dal catalan tes rivistis tai gjornâi al è lât sù dal 35,3% intal 2013, al 42,1% intal 2014, intun periodi li che i gjornâi no gjoldin di buine salût inte editorie mondiâl.
Plui dal 68% dai lavoradôrs ocupâts intal setôr terziari al è bon di lei e scrivi par catalan, e cheste percentuâl e cres al 85,5% tra i aministradôrs delegâts e i diretôrs des aziendis privadis. La percentuâl tra i aministradôrs e i professioniscj si ateste al 80,4%.
La plui part dai intervistâts dai 15 agns insù e declare di jessi in stât di capî il catalan (94,3%), di fevelâlu in maniere corinte (80,4%), di leilu (82,4%) e di scrivilu (60,4%).
Il report, cun di plui, al mostre che intal 2014 si è regjistrade la percentuâl plui alte di consum di musiche par catalan, ven a stâi il 13,3%.
Dal 2001 al 2011 la popolazion catalanofone e je cressude di 750.000 unitâts passant i 10 milions di feveladôrs.
DIFICOLTÂT RIVELADORE
Interessant il fat che il 26,6% dai intervistâts al à declarât di vê dificoltâts seriis a fâ la sô vite in Catalogne par vie de pocje cognossince dal catalan o de pocje competence intal leilu e scrivilu. Chest al da la idee di tant che la lenghe e sedi intrinsiche inte societât catalane, inte sfere politiche e socioeconomiche e duncje di fonde pe vite di ogni dì.
SCUELE E CHEI CENCE SCUELE
Fevelant dal catalan intal sisteme de istruzion, il 75% dai students de scuele secondarie a àn un nivel linguistic medi alt di spagnûl e catalan e il 96,3% dai students de scuele superiôr a doprin il Catalan intes provis di amission de universitât, e di chei il 12,7% a son forescj. Par ce che al tocje l’ûs dal catalan te universitât, si ateste al 76,5% e al 56,8% pai masters.
I adults forescj no àn vût il vantaç di imparâ la lenghe midiant la scuele publiche catalane, però intal 2014 un totâl di 14.231 adults al à otignût un certificât linguistic di catalan e 1.064 a frecuentavin cors ocupazionâi par catalan. Intal 2014, il consorzi pe standardizazion de lenghe al à organizât 3.229 cors cun 67.465 iscrits.
LENGHE DI INTERNET
Li che il catalan si fâs viodi une des lenghis plui ativis tra lis lenghis minoritariis europeanis al è su internet e intal mont des gnovis tecnologjiis. Intal rapuart a son diviers dâts che lu confermin. La version catalane di Wikipedia, Viquipèdia, e je rivade intal 2014 al numar record di visitadôrs, e i cuatri sistemis operatîfs principâi sul marcjât a ufrissin za versions par catalan. Intal mont de rêt, sîs “social network” dai siet plui difondûts a àn une version par catalan e Twitter dal 2012 al fâs plui di 150.000 utents.
UN VITALITÂT IMPRESSIONANTE
Cheste vitalitât linguistiche e je impressionante, massime calcolant la ostilitât dal stât spagnûl viers di chest idiome, che al refude di ricognossilu uficialmentri in tantis areis de Spagne. Il catalan al è une lenghe in stât di salût otim che no dome e resist ae modernitât, ma e cjape part in cheste, acuisint miârs di gnûfs feveladôrs ogni an.
La Catalogne e je un cantîr impuartant di sociolinguistiche che di chel nô furlans o podìn imparâ tant. Lis politichis linguistichis fin cumò metudis in vore inte regjon no dome a àn rinfuarçade la lenghe tal cjamp linguistic e socioeconomic, ma le àn fate deventâ atrative e necessarie ancje pal forest o par chel che al ven di une altre regjon de Spagne. La atuazion in Friûl di cualchidune des politichis linguistichis metudis in vore in Catalogne e ribaltarès lis sortis dal furlan, fasintlu deventâ di lenghe che e mûr une lenghe vive de societât. Si crearès cussì, tant che in Catalogne, plui coesion sociâl e di facilitarès il procès di integrazion dal forest. ❚
Redazion