Ce che al bol in Consei Regjonâl

La comission VI presiedude di Kristian Franzil (Rifondazione Comunista) e varà di analizâ i tescj des Propuestis di Leç regjonâl di tutele de lenghe furlane che a varà di jessi puartade in Aule. Ai 26 di Jugn a son tacadis lis audizions tra comission e ents, istituzions e associazions di setôr. Ma percors nol è par nuie facil stant che fin cumò a son stadis presentadis trê propuestis: une di caratar gjenerâl che e varès di cjapâ il puest de Leç regjonâl 15/96 e za fate buine de Zonte Illy, e dôs plui specifichis sul insegnament de lenghe furlane a scuele: une a firme dai conseîrs regjonâi Violino, Guerra, Franz e Follegot (Lega Nord) e une trasversâl firmade dai conseîrs regjonâi Violino e Guerra (Lega Nord), Zorzini (Pdci-grup mist) e Baiutti (La margherita).
LA PROPUESTE DE ZONTE ILLY_L’ûs de lenghe furlane al è dome “permetût” tes aministrazions publichis, cuant che invezit al è scrit ancje te normative statâl e te jurisprudence de cort costituzionâl che chest al è un dirit dai furlans che a fevelin furlan. A ven metude in discussion la teritorializazion dai comuns di lenghe furlane previodude de Leç 482/99 e la Agjenzie regjonâl pe lenghe furlane e ven ridote dome a comission consultîve, limitant di fat la sô azion orghin strategjic e operatîf di politiche linguistiche. Pe scuelis si previôt che l’insegnament de lenghe furlane nol sarà obligatori e lis scuelis a lassaran aes fameis la facoltât di sielzi. Tal câs che lis fameis a aderissin, l’nsegnament al previôt almancul une ore par setemane. L’ûs veicolâr de lenghe furlane (insegnâ altris materiis doprant il furlan) tal secont cicli al sarà permetût dome se ducj i students a saran dacuardi. Cun di plui dome tes scuelis superiôrs cun direzion pedagogjiche la Regjon e finanziarà lezions in lenghe e di leterature furlanis.
LA PROPUESTE DE LEGA NORD_Pes scuelis si previôt la istituzion de ore curicolâr di lenghe furlane tes scuelis primariis e secondariis di prin grât in conformitât cui metodis e obietîfs dal pluirilinguisim, e l’aprendiment e lenghe furlane cul insegnament di almancul altris cuatri materiis coricolârs, di chestis une de aree linguistiche e une de aree sientifiche. E je previodude la istituzion di une comission permanente di coordenament li dal Silce par planificâ obietîfs e dibisugnis des scuelis de regjon. I insegnants a son specialiscj (a insegnin in maniere specifiche la lenghe furlane) e specializât (a insegnin altris materiis par furlan) e a son iscrits te tabele professionâl regjonâl dome se a rivin a passâ un esam specific.
LA PROPUESTE TRASVERSÂL_Tes scuelis de infazie lenghe furlane e lenghe taliane a àn stesse dignitât in dutis lis ativitâts. Tes scuelis elementârs e mediis al ven aplicât il metodi Clil (Content Language Integrated Learning) di insegnament: almancul il 30% di dutis lis oris di dutis lis materiis a ven insegnât par furlan. Si previodin 2 moments par setemane par insegnâ insiemit furlan/talian e furlan/lenghe foreste. Ogni setemane e je previodude la ore di insegnament de lenghe furlane. Il protocol Clil al ven aplicât ancje tes superiôrs. I insegnants a son specialiscj (a insegnin in maniere specifiche la lenghe furlane) e specializât (a insegnin altris materiis par furlan) e la lôr formazion e je fate de Universitât dal Friûl daûr des indicazions de Comission pai Obietîfs Didatics de Agjenzie Regjonâl pe Lenghe Furlane. A son iscrits te tabele professionâl regjonâl dome se a rivin a passâ un esam specific.
ULTIME ORE_Ancje Forza Italia (cons. Massimo Blasoni) e je daûr a preparâ un so test su la cuestion, che però in dì di vuê (ai 23 di Jugn, ndr) nol è stât inmò uficializât in Consei.
A TACHIN LIS DENUNCIIS_Denant des declarazion dal Assessôr Antonaz che al minimizave la puartede des modifichis fatis de Zonte Illy al test origjinari presentât dal grup di esperts, doi di lôn no àn tasût e a àn denunciât intun comunicât chestis bausiis “Par nestri cont lis modifichis fatis de Zonte (ma o saressin curiôs di savê di precîs di cui) a son tantis e cussi grandis che a snaturin la propueste fate dal nestri grup di lavôr. Par cheste regjon no dome o intindìn cjapâ distance dal test fat bon dal esecutîf regjonâl, ma o ritignìn che un test dal gjenar, se fat bon in Consei Regjonâl cence modifichis, al pues adiriture jessi danôs pe lenghe furlane. Ancje i operadôrs linguistics dai sportei pe lenghe furlane di comuns e ents teritoriâi a àn fat un comunicât par dî la lôr su la propueste di leç fate de Zonte Illy “Un propueste indecente: la Zonte Illy nus taie la lenghe!” a àn declarât.