Saco e Pidins a continuin a lâ a torzeon. “Donald D.T. Live”, il spetacul multimediâl metût adun di Teatro della Sete e de associazion Lenghis dal Drâc cu la poie de ARLeF (Agjenzie Regjonâl pe Lenghe Furlane), che al cjape sù il test dal innomenât romanç di Stiefin Morat, “Donald dal Tiliment”, al sarà in sene ancje vie pai prins mês dal 2019. La interpretazion de bande di Teatro Sosta Urbana, The High Jackers e Paolo Cossi di chê conte sfolmenade, publicade disevot agns indaûr e calcolade ancjemò in dì di vuê tant che la vore plui inovative de leterature furlane contemporanie si podarà viodi e scoltâ ai 2 di Fevrâr a Palaçûl, ai 3 a Çarvignan, ai 8 a Sedean e ai 9 a Comelians.
Il spetacul, che al misclice i lengaçs dal teatri, de musiche e dai fumuts, al viôt sul palc Barbara Bregant, Serena Di Blasio, Caterina Di Fant, Lucia Linda, Nicoletta Oscuro, Michele Polo, Federico Scridel, Micol Sperandio, Valentina Rivelli, Aida Talliente e Andrea Collavino, che al firme ancje la regjie, compagnâts dai musiciscj Stefano Taboga, Alan Malusà Magno, Alessandro Mansutti e Maurizio Tomada e dai dissens fats dal vîf di Paolo Cossi.
La formule, za sperimentade doi agns indaûr di chê stesse formazion, e funzione. Il spetacul al è pardabon plasevul e, cemût che al marcave ancje Stiefin Morat in ocasion di un incuintri public fat te Biblioteche di Felet ae vilie de rapresentazion di Culugne, «al riprodûs in maniere fedêl il spirt dal romanç, la psicologjie strambe dai siei personaçs e l’ambient là che si movin, juste in graciis dal miscliç tra teatri, musiche e dissen».
Lis informazions e i detais in cont dai spetacui di Fevrâr e di chês altris datis che a vignaran fatis si cjatin in rêt: https://www.facebook.com/TSUteatrosostaurbana/ e https://www.facebook.com/donaldaltilimentlive/ (m.s.) ❚