Ce staial sucedint sul front de autonomie? Biadelore, si sta tacant a rispuindi ai atacs ae specialitât che a vegnin di ogni bande

Covente dîlu: alc si môf sul front de autonomie. E mancul mâl, parcè che la specialitât de Regjon e je simpri plui sot atac. Il guvier di Rome al à sclarît di volê acentrâ plui che si pues dutis lis competencis di caratar aministratîf e politic, lassant ae perifarie dome i fruçons. E inte campagne eletorâl pes consultazions dai 31 di Mai, i candidats che a vuidin lis regjons a statût ordenari a fasin a gare intal contestâ i privileçs che noaltris o varessin plui di lôr: al à tacât il toscan Enrico Rossi, ma i son daurman vignûts daûr i venits Alessandra Moretti e Flavio Tosi. PROPUESTE INDECENTE_Cun di plui, la propueste di Roberto Morassut, deputât Pd, di scancelâ no dome la nestre specialitât ma adiriture la nestre Regjon, e cjate simpri plui acet jenfri dai parlamentârs di Rome. Se la voie di jessi parons dal nestri destin no si dismôf di presse, o riscjìn che de nestre autonomie in avignî no ‘nt resti plui nancje un fregul. E che il Venit nus gloti dut un flât.
CENTRI DI GRAVITÂT_Covente sveâsi, duncje. Dut câs al è cui che si è za dismot. I sindics dal “Laboratori di Autonomie” a stan lant indevant intun percors che al ponte a doi obietîfs: di une bande rinfuarçâ la cussience autonomiste cuntune schirie di incuintris di formazions, clamâts “Lezions di autonomie”, e di chê altre meti dongje la Assemblee des Comunitâts Linguistichis che e podarès pardabon deventâ il centri di gravitât di une gnove vision plene di morbin di autoguvier. Salacor, al volarà un pôc di timp par organizâ chest gnûf organisim, ma la strade e je chê juste: i 16 sindics no àn spietât che la Regjon e convochi di bessole la Assemblee, ma a àn stiçât la sô costituzion dal bas, sburtant i lôr coleghis sindics a cjapâ la iniziative e a aderî daurman a cheste istituzion.
UN GNÛF PARTÎT_Intant, la galassie dai autonomiscj si insiore di un altri moviment: Patrie Furlane. A dâ fûc ai pulvins dal gnûf sogjet politic e je la volontât di lâ a costituî la Regjon Autonome dal Friûl. Cence Vignesie Julie. Bastaraial? Nol è dit, ma alc al è alc … e nol è un câs che ducj chescj discors a viazin sul canâl de valorizazion politiche e no dome culturâl dal fatôr identitari.
La culture, la lenghe, il folclôr no bastin plui: il Friûl al à podût di fat disvilupâsi dome cuant che al è stât autonom. E ancje se tai ultins 15 agns la autonomie no je coventade a cuissà ce, pierdile al sarès pardabon un disastri. Ma in prospetive, al à spiegât Sergio Cecotti, la erosion de nestre specialitât e sarà inevitabil se nol nassarà di corse un fuart grup bon di convinci i furlans a dâi un grum di consens tes elezions pe uniche Cjamare che e restarà, dulà che il Friûl al sarà rapresentât probabilmentri di cuatri gjats ininfluents. Dome realizant une gnove fuarte formazion autonomiste e identitarie la nestre tiere e podarà – salacor – salvâsi di un declin ireversibil.
RISULTÂT SPARIZION?_Se invezit si continuarà a discuti cence meti in vore une alternative ai partîts talians o padans, il risultât al sarà dome un: la sparizion dal Friûl. A 70 agns de Liberazion dal Fassisim, sublimazion dal centralisim talian, la crisi des istituzions e dai lôr belançs  e pues sburtâ a crodi che i ramaçs secs de Democrazie a sedin propit lis Regjons e i Comuns. Mancul podê sul teritori, plui podê tai centris decisionâi che a contin: e in chê volte, ce nus restaraial? Dome il “sium di chei furlans in fughe” che Franco Marchetta al veve delineât intune sô opare sul plui utopist dai personaçs de leterature mondiâl: Don Chisciotte.
LA UTOPIE UTIL_A chest pont, la lote pe autonomie e podarès pardabon someâ a une utopie. Lu someave ancje intal doman de vuere, ma int come Pasolini, Marchet e D’Aronco e veve scomençât a percorilu, il troi di chê utopie. E nol è un câs che tal zîr di 20 agns e je nassude la Regjon autonome: une Regjon sbaliade, che e met dongje il Friûl e Triest, ma che nus à dut câs fat lâ une vore indevant tal disvilup de nestre societât e de nestre economie. E someave une utopie ancje tornâ a tirâ sù dut dopo che l’Orcolat nus veve sdrumadis 100 mil cjasis e copâts mil confradis. E invezit je vin fate, di presse e ancje avonde ben.
Ancje cumò al covente inietâsi une buine dose di sane utopie: e fâ di dut par imagjinâ un Friûl diferent, che al cjali al doman cun fiducie e che al  vedi braçs e cûr, ma soredut cerviel. Parcè che nissun nus judarà e o varìn, come dispès nus è tocjât, di rangjâsi di bessôi. E plui adore o tachìn, plui adore o rivarìn adore a fâlu.❚
Walter Tomada