Il 3 di Avrîl dal 1077 al rapresente une ricorence impuartante pal popul furlan parcè che al sancìs la nassite dal Stât Patriarcjâl furlan, la istituzion che e à metût dongje il Friûl e tancj altris teritoris intun unic organisim statuâl rivant, par chê epoche, a formis di organizazion civîl une vore avanzadis. Tal 2015 e je stade ricognossude uficialmentri de bande de Regjon la Fieste de Patrie dal Friûl, cu la leç n. 6 dai 27 di Març: il so obietîf al è chel di ricuardâ e valorizâ lis origjins, la culture e la storie di autonomie dal popul furlan. La Assemblee de Comunitât Linguistiche Furlane e propon a ducj i Comuns dal Friûl, tal timp dai 13 di Març ai 10 di Avrîl, un moment di riflession su la fieste, un incuintri di tai divulgatîf e viert a ducj, che al tachedi de conte de storie di chel 3 di Avrîl dal 1077 par rivâ al pensament dal sô sens in dî di vuê.
Son bielzà disponibii un trente relatôrs, cjapâts sù tal mont de culture furlane, e la intenzion dal President de Assemblee Diego Navarria e je chê di mandâju a doi a doi, come i dissepui dal vanzeli, a “semenâ” i principis dal valôr de identitât in ducj i paîs dal Friûl. Cualchi Comun al à za mandât il so agrât di dâ acet ae iniziative e a concedi une sale (che non covente altri) ma mancjin ancjemò tancj. Cui che al pues, che ai dedi un sburt o che al cjatedi une clape o associazion sensibile a ospitâ l’incuintri. Il coordenament lu à il president de Assemblee: diegonavarria@gmail.com
No son coscj; dut sore nuie e par amôr di Patrie.
(redazion)