Cemût si disial lemure par furlan? Intant cuietiti…

La pagjine Facebook de Patrie e je un imprest par difondi il gjornâl, ma ancje par incuintrâ e dialogâ cui letôrs e cu la int che e baline pal social network. E cussì al capite di cjatâ cualchi realtât interessante…
––
Al jere di un pôc che ator pal Muselibri, cussì i furlans a clamin Facebook, no jerin novitâts in marilenghe e duncje no vevin masse ce contâ in cheste nestre rubriche. Di un pâr di mês però al è saltât fûr un… lemure furlan, il testimonial de pagjine Intant cuietiti. Il lemure al è un simpatic animalut, che al è deventât famôs soredut cul cine di animazion Madagascar e cumò al è protagonist di frasis e proverbis furlans su cheste pagjine che e à vût une grande incressite in pôc timp: cumò plui di 14.000 like (i “mi piace”). Ma cui isal chel che i à insegnât il furlan? Viodìn cui che al è daûr di cheste pagjine.
––
Mandi, fantatis! Cui isal il paron dal lemure?
Il lemure al è indipendent e plen di sapience, noaltris che di Mai lu judìn a doprâ la sô pagjine o sin Martina e Sandra.
––
Parcè vêso metût propit chel animalut, e cemût ise vignude fûr la idee dal titul «Intant Cuietiti»?
Une dì Sandra e à publicade la foto dal lemure cun scrit «intant cuietiti» sul sô profîl e subit al è stât un grant sucès di condivisions! Cussì e je nassude la idee de pagjine, di creâ une grafiche e di domandâ il contribût dai letôrs, graciis a Martina che e fâs cheste robe par lavôr!
Disìn che «intant cuietiti» al è ispirât al inglês «keep calm… and carry on»: par chest, o vin metût «and» par inglês prime dai sugjeriments dal lemure!
––
La idee e je di fâ dî al vuestri personaç frasutis par furlan, duncje. Di dulà vegnino?
Lis primis frasutis lis vin metudis nô, dopo cuant che o vin domandât ai letôrs di partecipâ – come che si diseve prime – o vin subit ricevût un grum di sugjeriments! O cirìn simpri di rispuindi a ducj e di publicâ dutis li frasis: la liste e je ancjemò lungje e par viodi le frase mandade tocje vê un pocje di pazience, ma cheste colaborazion e je fondamentâl pe pagjine e o ringraciìn ducj chei che nus continuin a mandâ la lôr!
––
Cemût si disial “lemure” par furlan, si sêso fatis la domande?
O vin idee che il lemure no somee che al sedi une bestie masse tipiche da nestris zonis tant di vê un non par furlan! Il nestri lemure, Bepi pai amis, al è clamât ancje cul so non par intîr: Intant Cuietiti.
––
Bon, us al dîs jo: mi an spiât che si dîs “lemur”, come il leon o la pantere, che a esistin par furlan ancje se sul ôr dal Tiliment no ju vin mai viodûts.
Ma tornant a nô… Cuale ise stade la imagjin plui di sucès? E ce plasial di plui ai letôrs in gjenerâl?
Cualchi volte o metìn une imagjin divierse dal solit, simpri cui sugjeriments dai letôrs, cuant che il mût di dî si compagne miôr cuntune espression dal lemure che cul solit «intant cuietiti». Chestis “vignetis” a àn simpri sucès!
––
O doprais il furlan, ma cun cualchi erorut. Ce pensaiso dal insegnament dal furlan a scuele? Us plasaressial savêlu scrivi ben?
Studiâ une lenghe in plui al è simpri ben, l’impuartant al è studiâ no dome il furlan ma ancje ben il talian e une lenghe foreste! Cuant che la pagjine e je cressude o vin scomençât a controlâ  di plui la scriture des frasis che o metevin o che nus mandavin i letôrs: cualchi erorut al sarà ancjemò, ma o vin di ringraciâ Bepi che nus int fâs imparâ une ogni dì!
––
Cuant che si à un grant sucès cussì a colp, o varês sigûr di contâ cualchi fatarel curiôs… E vêso progjets futûrs?
No vin un fatarel curiôs in particolâr, ma e je stade propit une sorprese viodi cressi la pagjine a cheste velocitât e nus à capitât cualchidun che nus à tabaiât di Intant Cuietiti cence savê che o jerin nô daur dal simpatic lemur!
Cualchi idee di piçul progjet le vin, e sperìn di podê condividile prest cui fan!
––
Seguîso altris pagjinis furlanis su Facebook? Cualis sono lis miôr?
Sì, in plui che la vuestre pagjine o vin tra i preferîts di Intant Cuietiti ancje  Felici ma Furlans, Average Furlan Guy e la comunitât Sei di san zorz se… gjestide simpri di Sandra.
––
Secont voaltris, Facebook e i social puedino judâ lis piçulis lenghis?
I social nus dan la oportunitât di creâ une comunitât di personis cun cualchi interès cence limits gjeografics o di altri stamp: cu la nestre pagjine o vin viodût partecipazion di bande ancje di cualchidun che il furlan no lu scrîf, no lu fevele o cualchi volte no lu cognòs propit! Nus àn domandât di meti la traduzion par talian par podê imparâ e capî cheste sapience furlane…
Daspò a son i furlans che a vivin lontan, e nus capite cualchidun che al comente une frase che nol sint di tancj agns e che i ricuarde magari un nono… Di sigûr i social puedin jessi un canâl par tignî vîf e par fâ cressi l’interès pes piçulis lenghis e dut ce che a rapresentin. ❚
✒ Dree Venier