Sfuei Mensîl Furlan Indipendent
Archivi de Patrie

Chei che a tornin

Walter Tomada

E je int che si cjate a jessi furlane ma nassude e cressude a miârs di chilometris di chenti:
e che il Friûl lu cognòs dome in gracie des contis dai vons, dai paris, des fotografis, de lenghe, o che adiriture no lu cognòs propit par nuie. A son furlans che o di rif o di raf a vegnin simpri a fâ i conts, prin o dopo, cu la lor identitât: e se a vivin in puescj dulà che la fortunedi une volte si è mudade vuê in pore e insigurece, prin di dut economiche, tant che in Argjentine, dispès ur capite di sintisi dome “libars di scugnî tornâ”.
NO DOME BUTUI DI ROSE_ Ve chì alore che la identitât si displee di gnûf intal so teritori di divignince: ma no son ducj butui di rose cuant che un furlan al torne a cjase… Anzit, al è dificil che chescj furlans di seconde, tierce o parfin cuarte gjenerazion: al è un mistîr no simpri masse biel chel di “chei che a tornin”. A menin vitis a tirâ indevant: soredut al inizi, ma no molin e la lôr ativitât, il lôr savê, la lôr capacitât a vegnin fûr un pôc a la volte, planc, cuiets ma inesorabii. Tal zîr di cualchi an, a tornin a jessi protagoniscj: magari a fasin fature a imparâ il furlan, o a strissinin un talian che al pant ancjemò l’acent spagnûl, ma i argjentins a son la ponte di chel “iceberg” che e je l’ondade migratorie al contrari. A son e a vuelin restâ in Friûl, cheste volte: ancje se lis olmis de nostalgjie ju sburtaressin a tornâ dulà che la prime onde de storie ju veve sgnacâts.
TINDINCE INVERTIDE DI 30 AGNS_ Al semearès che si trati di robis che a stan capitant cumò, intai ultim agns. Invezit al è scuasit di 30 agns che si è inviertide la tindince. De France, de Gjermanie, de Svuizare in tancj a son tornâts subit daspò dal taramot: e planc planc la voie di tornâ e je stade simpri plui clare ancje inte Americhe dal Sud, tant che a dimostrin i studis dal massim espert de materie, il ricercjadôr argjentin-furlan Javier Pablo Grossutti che adun
cul gjeograf Francesco Micelli al à realizât tai ultims agns une mapadure une vore significative des migrazions furlanis.
Chei che a vuelin savê dulà che a son finîts tal mont i abitants di Tavagnà, Puçui, Tumieç, parfin i roseans e i comelianòts, al à di lâ a scandaiâ i siei tancj lavôrs. Grossutti, laureât in siencis politichis a Buenos Aires tal 1990, ma antropolic di scusse buinonone, al à studiât ancje il fenomen contrari, ven a stâi ad esempli “L’emigrazione argentina in Friuli” o soredut “I rientri in Friuli da Argentina, Brasile, Uruguay e Venezuela” intal periodi dal 1989 al 1994.
Cui che al vûl savê di plui su “chei che a tornin” al po cirîlu lì, in chest test une vore biel editât dal Ermi tal 1997. E je une altre iniziative che e po judâ a recuperâ cheste memorie. Dal 1996 e je nassude difat une associazion culturâl, “La Clape Friûl dal Mont”, che e je chê che e met dongje i emigrants tornâts in Friûl, e che sul sît www.clape.it e à scomençât a inserì storiis no di chei che a son lâts ator pal mont a cirî fortune, ma di chei che la fortune le an cjatade tornant chenti.
E cussì o podìn lâ a viodi vite e maraveis di trê Lucianos, che a son rivâts a cjatâ un troi par vê culì la possibilitât di cjatâsi di gnûf a cjase: il scultôr Luciano Spizzo, svuizar di Trep, il compositôr Luciano Turato, piemontês di Buje, e il pitôr Luciano Filaferro, cuntun cognon che ancje in Australie al mostrarès la divignince di Mueç. Al sarès biel che a chestis storiis si podessin zontâ dutis chês di chei che a an cjatade di gnûf l’Americhe a cjase lôr. O magari di chei che la lôr tiere no ur à ancjemò dât chel bon acet che a speravin. La storie di “chei che a tornin” e à juste scomen@at scomençat a scrivisi; e par sigûr e je une di chês storiis che al vâl la pene di contâ.

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +

L’EDITORIÂL / No stin a colâ inte vuate de indiference

Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +