Pordenon al à pôre de invasion. Dai imigrâts? No, di chei di Udin… Le àn clamade “anession” i sorestants “made in Pn”, la decision di Rome di fondi lis dôs Cjamaris di Cumierç di ca e di là da l’Aghe. Une leç sbaliade, une falope di chês nassudis intor de riforme istituzionâl che il Guvier Renzi al voleve fa buine e che i talians a àn refudade votant cuintri ai 4 di Dicembar passat. Ma se la leç che e veve di cambiâ la Costituzion e je muarte in che volte, cheste altre norme di “semplificazion” no: e va indevant istès, metint cuintri teritoris fradis come chei di Udin e Pordenon e lant a stiçâ un marum che cierts ambients “vip” dal Friûl Ocidentâl no àn mai platât.
La tesi de “intelighenzie” sul Noncel e je che l’acorpament des dôs Cciaa al puartarès indaûr la linie dal timp di passe 50 agns, prin che e nassès la Provincie di Pordenon. Lant daur di cheste fantasiose teorie, chei di Udin a saressin cussì influents di vê fat buine une norme valide a nivel talian, ma studiade di pueste par gloti Pordenon. Purtrop il mandant dal “sassinament” nol è Udin ma chel Renzi che i imprendidôrs di Unindustria e Cciaa Pn a àn sostignût cun fuarce cuant che al domandave il Sì al referendum. Cence rindisi cont che il centralisim a Rome al dispon normis che a somein sveltî lis robis, ma intant a copin lis specificitâts dai teritoris. La realtât e je che l’uniche reson par tignî in pîts une Cjamare di Cumierç no varès di jessi la cuantitât di impresis sociis, ma la sô eficience: e chê di Pordenon e funzione une vore ben.
Dut cas il fat di berlâ a une fantomatiche anession al è sintomatic: al è plui facil cjatâ il nemì e il pericul subit dongje di te, pluitost che la a cirilu alì che al è pardabon. E cussì a Pordenon a cjalin cun favôr al Venit (l’acorpament cun Trevîs lu fasaressin vulintîr, a sintî lôr) e si metin dongje a nivel di costrutôrs parfin cun Triest. L’impuartant pai sorestants al è sfrancjâsi de idee di jessi furlans: ma al sarès ben che i citadins di Pordenon a capissin che il zuc di dividisi al è une vore pericolôs, par ducj.
di Walter Tomada