Sfuei Mensîl Furlan Indipendent
Archivi de Patrie

CJAMINANT TE STORIE. Un ritrat di storie dal Cristianisim aquileiês

............

Chest an o vin volût vierzi une gnove rubriche par presentâ dutis chês realtâts archeologjichis dal Friûl che, magari cussì no, a son mancul cognossudis ma no par chest mancul impuartantis. Par fâ chest o vin domandât la colaborazion de Societât Furlane di Archeologjie che dal 1989 si impegne cetant su dut il teritori par valorizâ e promovi il nestri patrimoni culturâl.

Un ritrat di storie dal Cristianisim aquileiês

La glesie di S. Proto e je leade a la figure dal martar copât tal IV secul dopo di Crist intal periodi des persecuzions cuintri dai Cristians metudis in vore dal imperadôr Dioclezian.
Proto al jere l’educadôr dai trê fradis martars Canzi, Canzian e Canzianile: la tradizion e conte che ducj i cuatri a jerin partîts di Rome propit a cause des persecuzions e che si jerin direzûts a Aquilee par cjatâ Crisogon (venerât sant daspò che al vignì copât su ordin di Dioclezian). Ma rivâts a S.Canzian dal Lusinç, che in chê volte al veve non Aquae gradatae, a forin decapitâts e soterâts dongje de sepulture dal Sant.
La glesie di S.Proto, insiemi cu la parochiâl, ancje chê di implant paleocristian e sît des sepulturis des figuris che o vin viodût, e je une lint su la storie secolâr de localitât furlane.
Sogjete a sgjâfs sistematics tai agns 2009-2011 e à permetût di fâ lûs su diviers periodis che si son dâts la volte su chest stes implant a partî dal IV secul. Lis fonts a fevelin di une glesie dedicade al Sant dome a partî dal Cinccent ma lis pavimentazions e lis plantis dai edificis a metin in lûs ben cuatri lûcs di cult tal cors de storie.
L’implant plui antîc al è paleocristian (IV-VI sec.d.C) e al è risultât dai elements che a son vignûts in lûs (stabiliduris pituradis, tessaris di mosaics e cops) daspò dal messedament cu la pavimentazion sucessive de Basse Ete di Mieç, cuant che al fo fat sù un altri edifici di cult su la fonde di chel plui vieri.
Tal XVI secul e fo fate sù une altre glesie, o forsit al fo dome metût a puest l’edifici precedent, stant che lis plantis retangolârs a son restadis compagnis.
In relazion al implant de Basse Ete di Mieç e je stade fate une scuvierte une vore interessante: cinc sepulturis di personis che dal sigûr a jerin stadis selezionadis par vie dal fat che no son stadis cjatadis altris realtâts in chest contest.
Lis inumazions no vevin nissune cuviertidure (puartadis vie forsit tal moment che e fo costruide la glesie rinassimentâl) ma a son stadis studiadis in maniere une vore profonde dal grup di sgjâf.
I risultâts di chescj studis a àn prin di dut individuât une sepulture plui impuartante di chês altris, in posizion plui centrâl, che e jere di un om sui 50-60 agns di costituzion robuste ma no logorade (un nobil?), e metût te tiere cence casse ni furnidure.
Chês altris cuatri sepulturis a son stadis datadis a un secul dopo, o ben XIV-XV secul; di chês une e je riconducibile a une frute tor i 11-13 agns, muarte par vie di une malatie degjenerative, sepulide dentri une casse di len e vistude cun diviers ornaments. Une altre invezit, plui insolite, e je di un frutin muart dentri des dôs setemanis di vite e posizionât intune urne formade cun doi cops.
Al sarà tra pôc di gnûf visitabil l’antiquarium cun cetancj reperts romans ma no dome cjatâts in cheste localitât; par une visite virtuâl si pues lâ chi: http://www2.units.it/epilab/lapidesonweb/luoghi/scanzian/antiquarium.html.
____________________________________________
PROGRAMS DE SOCIETÂT FURLANE DI ARCHEOLOGJIE
V.I.V.A. – Volontariato Insieme Valore Attivo
La SFA, tal ambit dal bant “Giovani e Volontariato” bandît de Regjon Friûl-VJ
(Servizi politichis dai zovins), e da il vie al progjet “V.I.V.A.-Volontariato Insieme Valore
Attivo” par ativitâts in ambit archeologjic.
✽✽ Ativitât didatiche lì des muris bizantinis di Aquilee
Come l’ an passât e ven inviade lì des muris bizantinis di Aquilee une ativitât didatiche
cu lis scuelis mediis superiôrs di Udin che e cjaparà dentri cirche 800 zovins tai mês di
Març e Avrîl 2013.
✽✽ Ativitât di ricercje.
Tal mês di Mai, come ormai di tancj agns, si davuelzaran ativitâts di pulizie, ricercje e aprofondiment storic-archeologjic lì dal Cjistiel superiôr di Atimis.
✽✽ campagne di sgjâfs archeologjics
Tal mês di Lui si tignarà la tierce campagne di sgjâfs archeologjics te vile romane di Moruç.
Venusia Dominici e Giovanni Filippo Rosset
In colaborazion cu la Societât Furlane di Archeologjie, Par informazions: Societât Furlane di Archeologjie, Puarte Vilalte, vie Micesio 2, Udin. Tel. 0432 26560. www.archeofriuli.it

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +