A pît pai secui: i cramârs cjargnei

Secui di stradis lungjis fatis a pît, la ricercje di un carantan par tornâ a cjase une dì. Su pe schene il pês de marcjanzie poiade dentri de uniche compagne di viaç: la crasigne o crame. Musis segnadis dai sacrificis, personis cul cûr sglonf di nostalgjie pal paîs lontan, che al veve pôc ce ufrî. Chescj a son i cramars, oms puars ma plens di buine volontât, obleâts a lassâ la Cjargne par cirî fortune. «I cjargnei, che a àn pocje tiere di coltivâ, a àn di lâ pal mont», al diseve tall 1560 Jaroni di Porcie. Capî cuant che e je tacade la prime migrazion cjargnele bande tieris plui fortunadis al è inmò dificil. Il prin document uficiâl che al fevele di cramars al è dai 8 di Setemabr dal 1261: propit in chê volte il Patriarcje Gregori di Montelongo al deve il permès di comprâ un edifici cun 47 marchis aquileiesis dai dazis di Tumieç cence tocjâ ce che a vevin tirât i cramars. E pûr, fin al secul XVI-XVII no si conte cuasi nuie su di lôr. Di fat, al è di chei agns il prin studi su la ativitât dai cramars, oms che “a emigrin di Unvier, e ogni Istât a tornin cjase pe racuelte, e, dopo vê sistemât i afârs di cjase, a spessein a tornâ aes lôr voris, vuadagnant cussì no pôc” (Fabio Quintiliano Ermacora “Antichità della Carnia”).
UNE VORE DIFICILE_ Se in dì di vuê al è dificil fidâsi di int che e rive di altris stâts, figurìnsi in ce maniere che a tratavin i cramars che però, no vevin pôre e prin di partî pes gjermaniis a levin te glesie di Sante Marie di Paluce. Achì a metevin la lôr vite tes mans de Vergjine Sante e a incidevin il lôr segn tal mûr che al jere daûr dal altâr di len. Alore a cjamavin sù pe schene il mobilut tipic di len che al veve i cassetins e a partivin a pît. Austrie, Ongjarie, Moravie, Polonie, ma pe plui part i cramars a levin in Gjermanie anticipant la grande migrazion dai nestris conazionâi secui dopo. Dôs a jerin lis stradis principâls che a menavin a Salisburc: une che e partive dal pas di Mont di Crôs, e vignive jù in Gailtal e e continuave fintremai a Heiligenblut; chê altre de Val Cjanâl, bande traviers Spital, e leve sù a Katschberg e po bande Radstättertauern.
CJARGNEI TAL IMPERI_ La presince dai cjargnei tal Sacri Roman Imperi e stiçâ un interès cussì grant che il storiograf Herbert Klein, tor dal 1600, al elaborâ un studi une vore aprofondît su la lôr ativitât, che intant a vevin slargjât i lôr marcjâts: no plui dome tiessûts, ma ancje speziariis, colorants e medisinis comprâts a Vignesie. Deventâts siôrs no dismentein la lôr Cjargne lontane e la domande di benedizion fate ae Vergjine Sante prime di partî e spes a faserin donazions aes glesiis dal lôr paîs. I cjargnei che a vevin fate fortune tal forest però a pensavin ancje ae impuartance de scuele. Emblematiche la donazion di Leonardo De Infant di Monai (vuê Ravascêt) che tal 1726 al regalâ 4000 fiorins pe costruzion di une scuele publiche gratuite.
FIN DI UN MISTÎR_ Diviers cramars a deciderin di vierzi ativitâts fissis otignint licenzis di vendite di pueste, magari dopo vê fat deventâ todesc il lôr cognon, par esempli, Morassi in Morasch, Moro in Mohr o De Rivo in Von Bach. Si pense che chest cumierç storic al sedi disparît par une decision cjapade in Austrie tal secul XIX, par evitâ ai forescj di jessi ambulants. Come che l’inizi di chest mistîr al è misteriôs, ancje la sô fin e reste pôc clare.
Ce lusso il bol sul Lussari! Ma nol è talian
Al è il Santuari dai trê popui li che te fede si cjatin la çocje latine, slave e todescje. La Mont Sante dal Lussari e je il simbul de Val Cjanâl. forsit chê plui visitade, dal sigûr chê plui cognossude di ducj i trê confins. Duncje al è impussibil no rindi omaç a cheste mete di comunion tra i popui. E je cussì ai 12 di Avost il Circul filatelic di Tarvis cun grande la braure al à stât presentâ il bol sloven dedicât ae Mont Sante. Cheste opare si zonte a chê realizade tal 2006 des puestis austriachis «Austrie e Slovenie – al dîs Giuseppe Montanaro, president dal Circul – a àn acetât cun entusiasim la domande di realizâ un bol dedicât al Lussari». Chel sloven che al rapresente un santut dedicât al Lussari al è stât prodot in 1000 esemplârs e al puesi jessi doprât pe pueste ordenarie. Ma se Austrie e Slovenie i àn dât al Santuari une impuartance cussì alte di jessi rapresentât tai boi, achì si fâs fente di nuie. «Achì no je la pussibilitât di fâ un bol “ad hoc” come di là dal confin – al conte Montanaro – ma ogni produzion filateliche e à di jessi aprovade di une comission. Ancje se in Italie o vin une serie turistiche componude di tre o cuatri boi par an, nissun al à mai proponût il Lussari». Pussibil che un puest che al ven ricognossût come impuartant di bande dai stâts dongje, al sedi “snobât” propit dal teritori li che al è? Chei dal circul nus fasin capî che, ancje ta chest câs, si trate di zûcs politics. Un bon al è une grande publicitât e dome cui che al à une poie politiche fuarte je fâs. Montanaro al è clâr «Come circul o vin aprovât di realizâ un bol dedicât ai mil agns de foreste di Tarvis, ma no je vin fate», ancjese ae fieste uficiâl a jerin presints Marini e Amato. La poie juste no je rivade. Insome austriacs e slovens a safin boi dedicâts al Lussari, la Italie e met juste… lis cassetis pe pueste.