Passonant tal mont virtuâl di internet, in particolâr su ‘Wikipedia’, o podarìn cjatâ scrit che Gjiviane (Gjiviano, tal furlan locâl) e je une frazion dal comun di Rigulât, cun 7 abitants, a 1.124 metris sul nivel dal mâr, a mieze cueste dal Crostis, e che lis cjasis a son posizionadis un grum in pendence tant che tes detulis popolârs si dîs che aes gjalinis ur vignive peât un sacut par daûr par che i ûfs no rodolassin jù tal Dean o che, pal stes motîf, in chest paîs a fasevin il formadi di forme cuadrade!
A part chestis curiositâts, tai agns i Gjivianots a son cuasi ducj emigrâts o in planure o tal forest a cirî fortune e vuê a son restâts pardabon in pôcs.
Stant jù pe valade, di lontan si viôt il cjampanili particolâr che al conte part de storie de int su pes cuatri façadis pituradis tal 2002 cun biei colôrs vîfs.
No son servizis, no son negozis ma e je in vore la Aministrazion separade dai bens di ûs civic, che e gjestìs i boscs frazionâi; tai ultins doi agns e à puartât indevant une iniziative impuartante: sistemâ il fabricât de ex latarie turnarie.
«Il consei dai bens civics – al conte il president Adriano Faleschini – al à fat in maniere di vê in donazion dai proprietaris de ex latarie il stabil. Midiant dai vuadagns dal bosc, o vin podût sistemâ l’ex latarie e fâ un piçul bar ristorant complet di dut. O vin cirût di fâ une robe avonde funzionâl e cumò o sin daûr a cirî un gjestôr. E je la tierce volte che o fasìn il bant, ancje parcè che, savint dulà che e je Gjiviane… nol è propit tant facil cjatâ un che al vueli gjestî un locâl ca sù: al à di jessi un apassionât di mont e cun voie di metisi in zûc e di scometi sul doman!
Se al fos stât a Cortine, no saressin stâts problemis a cjatâ cualchidun disponibil a cjapâ sù l’ambient. Cumò o sin residents une desene di nô. Nol è nuie, e il paîs si svuede simpri di plui. La societât no pues spindi par pocjis personis; nô o sin in pôcs ma o costìn come se o fossin di plui. Ma o vin volût fâ chest barut, e cumò viodìn. Almancul o vin comedade une struture che se e restave in man a di ducj, nissun al varès tacât un claut. Cumò vin un ambient cun dut ce che al covente, e al pues funzionâ. Cualchidun a sarà ben interessât!»
«Achì nol è nuie» al dîs Adriano «e o costìn ae societât.» Nol è dal dut just, ancje pal fat che fintremai che a Gjiviane e je une presince, al è garantît il presidi dal teritori; a mancjaran i servizis ma no mancje la pâs, un barcon su la valade che nol ti strache mai, la tipicitât des cjasis, la netisie des viucis, i colôrs de nature che si insedin e si pierdin pal paîs… Achì al somee che il timp si sedi fermât! E forsit, in cheste societât al è inmò cualchidun che cîr la semplicitât di chestis robis e che su pe terace dal mont si contente e al gjolt di une cusine gjenuine fate in cjase.
La scomesse e je vierte: cui sa se cualchi apassionât al cjaparà sul seri cheste ocasion par judâ a vivi Gjiviane e la sô int… e no dome.
(I interessâts ae gjestion a puedin presentâ domande ae Aministrazion Civiche fin aes 14.00 di sabide ai 28 di Otubar dal 2017 – bant su http://www.confcommercio.udine.it – info 3456373053).
