Ai 18 di Fevrâr e à cjapât gnove vite La cort di Piedim, ostarie cun cusine inte piçule frazion di Darte. La ostarie di plui di 50 agns e je stade il pont di riferiment pal paisut di 150 animis e cussì fintremai al Dicembar passât, cuant che Teresa Merluzzi e je lade in pension e lis puartis si son sieradis.
«Mi displaseve che La cort di Piedim e restàs sierade» e conte Gloria Di Gallo, 26 agns, «e cussì o ai pensât di provâ cheste gnove esperience, molant il lavôr che o vevi a Vile intun centri comerciâl. E je plui che altri une maniere par tignî vive cheste comunitât e par dâ un servizi ancje par no fâ murî il paîs.»
Di fat, tal paîs al è dome un negozi di mangjative e la ostarie e jere l’unic lûc di agregazion dai Piedemots. Il sindic di Darte, te inaugurazion al à dit «cuant che intune frazion si siere un esercizi public e ven a mancjâ la ocasion di cjatâsi; La cort di Piedim e permet ae int, sedi zovins che anzians, di incuintrâsi. E je la uniche ostarie de frazion e e da un servizi util e indispensabil. Al fâs plasê che i gnûfs gjestôrs a vierzin dopo doi mês, dant cussì continuitât ae gjestion di prime.»
Par Gloria no je propit dal dut une novitât, considerât che i prins agns di vite ju à passâts propit achì cun sô mari che e veve in gjestion la ostarie.
Vuê e je dute la famee che i da une man e achì si pues mangjâ alc di gjenuin e tipic cjargnel: polente e frico, cjarsons, morbidelas…
«Stant che o sin fûr man, al è impuartant prenotâ clamant al fis (0433/320150) – e invide Gloria – parcè che il segnâl dal celulâr nol cjape trop (333/8052040)!! Se cualchidun al vûl savê alc di plui, nus cjate su Facebook. Par cumò o ai vude une buine rispueste e o soi contente, e mi auguri che e duri tal timp.»
La cort di Piedim e siere par polse il lunis, ma tal rest de setemane us spiete par lâ a cerçâ il mangjâ cjargnel e par cognossi il snait e la voie di fâ di Gloria che à decidût di restâ a vivi tal so paîs cu la sô famee. ❚
✒ Marta Vezzi