Domenie ai 22 di Otubar la Associazion Amîs di Osais (Dasaias par cjargnel, Dasaiis in variante comune), in colaborazion cu la Pro Loco e il patrocini dal Comune di Prât, a àn metût in pîts e organizade La fieste dal cjalcin.
L’ideadôr di cheste fieste origjinâl al è il miedi Paolo Agostinis che, di agns, al puarte indevant la sô mission: chê di dâ une man a la int che e vîf inte miserie tai paîs plui biâts dal mont.
«La idee e nas di une esigjence condividude di creâ relazions te nestre comunitât», al conte Agostins «coinvolzint soredut anzians e ancje cui che al è stât dislidrisât e puartât intai ricoveris». E cussì, il miedi al à contatât lis vecjutis des cjasis di polse de Cjargne, domandant di fâ cjalcins di lane, une maniere par rindilis ativis e par coinvolzilis intun progjet impuartant. La fabriche dai cjalcins si è metude in moto. «In Cjanâl Pedarç, un par frazion al è lât a cirî i potenziâi ‘operaris’: jo tal ospedâl indulà che o lavori, o ai coinvolt pazients, infermîrs e ausiliârs. Par passeperaule, a son rivâts cjalcins ancje di difûr de Cjargne: Bibion, Dartigne… insome, a son stâts fats 450 pârs di cjalcins e adiriture ancje fats des mans di une vuarbe.»
Il borc di Dasaiis al à cjapât vite cui colôrs dai cjalcins metûts in mostre te vecje latarie, cu lis viucis tiradis a lustri e la musiche de violiniste Lara Celeghin. Daspò misdì, tune glesie plene di int, si è disvoluçade la bravure dal pianist Paolo Casolo. Pe ocasion, e je stade screade la mostre fotografiche di Ulderica Da Pozzo Un tic di Cjargne par un dì. A àn cjatât paron ben 300 pârs di cjalcins e a son stâts cjapâts sù cirche 6.000 euros di ufiertis in favôr dal progjet La aghe di Andrea pe costruzion di un gnûf poç te isule di Pemba tal ocean Indian.
«Andrea Menis» al conte Paolo «al jere un frut dal Cjanâl Pedarç che al veve un mâl incurabil. Cuant che al stave par lassâ chest mont, mi à domandât di fâ un poç in Afriche in sô memorie. Cul patrocini de FldC che e opere a Pemba di plui di 20 agns, o vin realizât il prin poç tal paîs di Rui (500 abitants) che al è cence aghe potabile (cost, 5.000 euros). Cussì, te fondazion o vin dât il non ai progjets che a puartaran aghe potabile a Pemba La aghe di Andrea. Cu lis ufiertis de fieste dal cjalcin al vignarà fat il secont poç. La aghe, dutune cu la educazion scolastiche, a son lis fondis de salût e un poç di aghe buine al pues miorâ la salût e la cualitât de vite. Achì si mûr di tif, colere, diaree, viers intestinâi par mancjance di aghe potabile. Lis frutis (al è il lôr compit recuperâ la aghe) a fasin chilometris par cirî une risultive di aghe buine di bevi.»
Paolo al siere cussì: «O ringracii di cûr ducj chei che mi àn dade une man par realizâ la fieste dal cjalcin, e in particolâr dutis lis feminis che a àn fat i cjalcins! I cjalcins di lane a son un balsim pe salût dai nestris pîts e dal cuarp; la lane e je sane e naturâl, musulite, che e lasse traspirâ, termoregoladore, analergjiche e no si impeste di triscj odôrs. E je un bon isolant e ciertis popolazions africanis le doprin di dì par parâsi dal cjalt e di gnot dal frêt. E je utile in ciertis malatiis reumatichis tant che la malatie di Raynaud e e preven lis ulçaris che a vegnin a chei che a son obleâts a stâ simpri tal jet.»
di Marta Vezzi