Sfuei Mensîl Furlan Indipendent
Archivi de Patrie

Clanfurt no je une citât pes feminis

Barbara Cinausero
Ute Liepold

A Clanfurt a regnin i oms. La citât e à un sindic mascli, 5 dai 7 conseîrs citadins e 28 su 45 conseîrs comunâi a son masclis. Intal 2022 inte capitâl carinziane a vivevin 54.550 feminis, che a jerin il 52% de popolazion, ma il fat che a Clanfurt lis feminis a sedin in maiorance si vualme a malistent. Cheste e je ancje la opinion di Ute Liepold. Regjiste cetant premiade e cun di plui sorintendente dal teatri Wolkenflug, Liepold e sta cirint di puartâ ae atenzion publiche chest probleme midiant de sô associazion “Visible” e cun “cjaminadis in citât” inmaneadis dutun cul “Arkitektur Haus Kärnten” (AHK).
◆ Stant al so judizi critic, ae citât i mancje une planificazion rispietose dal gjenar, massime se o pensìn ai spazis pes feminis. Te storie a son simpri stâts i umign i responsabii de planificazion citadine: lis esigjencis des feminis a son simpri restadis sul cei de puarte di cjase. Chest al disvantaze cetantis feminis che a son a stâ in citât, e lis lôr esigjencis e criticitâts a son stadis racueltis e presentadis de Liepold e de diretore dal AHK al senât citadin in chê de Zornade internazionâl de femine.
◆ In particolâr al è il trafic un bon berdei par tantis di lôr. I percors pedonâi dispès no son avonde larcs par permeti il passaç in sigurece con carocinis o birocins. Un centri citadin cence autos, rêts publichis e viis ciclabilis, e ancje la riduzion dai parcaments a podaressin dâ aes feminis i spazis che ur coventin.
◆ Dulinvie dal Lendkanal, e disturbe la scjarse iluminazion, e cun di fat tantis feminis a àn pôre a passà li vie pe gnot. Cun di plui al larès une vore ben incressi lis areis di incuintri e lis pussibilitâts di sentâsi, salacor dongje de Neuen Platz.
Citâts sicu Viene e Graz a puedin dimostrâ cemût che une planificazion atente al gjenar e podedi funzionâ.
◆ Stant a ce che e dîs la puartevôs che o vin fevelât, lis esigjencis des feminis a saressin tignudis in mancul in dute la Austrie, ma chest al varès di mudâ a Clanfurt, massime dentri dal 2025. Se in curt a vignaran metudis sù intai lûcs publics postazions fissis par cambiâur i panesei ai frutins, cu lâ dal timp al varès di jessi ancje ridot il trafic dentri dal Ring.
◆ Cun di plui si fasarà pression par che intal an cu ven si scomencin a fâ sù pistis ciclabilis siguris; e magari par meti jù altris bancjutis o instalazions pe soste a viert! Cheste però e je une altre dificoltât, ven a stâi chê di meti dacuardi dipartiments e istituzions diferentis.
◆ La strade e je lungje e intorteade, ma la indurance di chestis feminis e fâs pensâ che la citât si stedi bielzà preparant a cambiâ muse. ❚

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +

L’EDITORIÂL / No stin a colâ inte vuate de indiference

Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +