Clorinda la bandide, cuant che la Resistence le àn scrite lis feminis

La Republiche Libare de Cjargne e je stade une esperience durade il timp di un lamp, di Lui a Dicembar dal 1944. Di un pont di viste istituzionâl ancjemò di mancul, ven a stâi dai 26 di Setembar, date de sô creazion uficiâl, ai 10 di Otubar, la zornade nere de operazion militâr naziste, fassiste e cosache che le à studade. Cul so profîl di civiltât altissim, pe difese de dignitât dal Om, che si riflet te espression incondizionade dal so estri, te scuele publiche, tal rispiet de nature e dal ambient, de libertât di peraule, pinsîr e stampe, pe abolizion de pene di muart, pe dignitât de Femine, calcolade paritarie a che dal mascjo. Plui di 2.500 chilometris cuadrâts di indipendence jenfri Friûl e Venit: 90 mil citadins che a votavin, che si aministravin midiant dai lôr rapresentants, che a gjoldevin di chei dirits che in Italie no jerin mai stas gjoldûts prime o che di almancul vincj agns a jerin stâts scancelâts dal regjim fassist. E dut chest intant che il sloven triestin Odilo Globocˇnik al tornave a cjase, braurôs di vê organizade ae perfezion la organizazion logjistiche dai cjamps di stermini di Sobibor e di Majdanek. Amì personâl di Himmler, al varès inaugurât li di pôc la Risere di San Sabba, a Triest. L’unic cjamp di stermini in Italie, cun tant di for crematori. Cuintri la Republiche de Cjargne, cuintri chest progjet di Libertât, i todescs a varessin mandât adiriture i cosacs, ma cheste e sarà la storie de prossime pontade. A sostignî i partigjans si cjatarin ancje soldâts sovietics arolâts intal “Bataion Stalin”. Un di lôr, Daniil Avdeev, al murì in combatiment a San Francesc, intal Cjanâl dal Arzin, e al fo sepulît a Clausêt ai 11 di Novembar dal ’44. Peter Handke, premi Nobel pe leterature, fevelant de resistence slovene, pardabon identitarie e di popul (tant che i partigjans slovens si metevin un cjapiel a trê pontis clamât “Triglavka” in onôr de Terglou, la mont simbul de lôr Tiere), al disè che i slovens e scombatevin par ogni malghe, par ogni fîl di fen, par ogni arbul e par dutis lis peraulis de lôr lenghe imparade cul lat des lôr maris. E anzit lis feminis bielzà dai agns vincj, cuant che il regjim fassist al cirive di disnazionalizà la culture slovene, a tignivin scuelis clandestinis tai boscs par che i fruts no pierdessin il contat cu la lidrîs. Feminis che a resistin, ancje in Cjargne, e no dome cu lis bombis. Roman Marchet, un dai paris fondadôrs plui autorevui de Republiche de Cjargne, al scriveve ai 2 di Jugn dal 1945, a vuere finide: “La Cjargne e je une regjon piçule: la lenghe, il sintiment, lis usancis dai siei fîs […] a fasin di jê une unitât”. E la unitât e fâs la fuarce. E cu la fuarce si vincin lis vueris. Se a Dimpeç si scombateve ancje pe libertât di peraule, la peraule scrite par cjargnel o par furlan e varès vude la fuarce di un Popul. No mi risulte che al sedi mai stât fat un studi sistematic sui documents, i gjornâi, i avîs, i tescj scrits in lenghe furlane vie par chei mês sflandorôs di vite de Republiche Partigjane Libare. E pûr a ‘nd jere. Un censiment atent e validât dal pont di viste sientific, un scandai seri, che al profiti di chei combatents onorevui che par nestre fortune a son ancjemò vîfs (par cumò!) e che a mantegnin la memorie di chei dîs, al disvelarès plui di cualchi sorprese. E cui miôr di une mari podaressie mai insegnâ a resisti cuintri la ditature ancje cu la fuarce di chê lenghe cjantade dongje de scune? O soi convint che lis pagjinis plui bielis de grande storie de Liberazion a forin scritis propit des feminis. Discriminadis ancje dentri tal moviment partigjan, se e je vere che no si voleve che a sfilassin a Udin, in chel 1n di Mai dal 1945 tal cûr di chê place che e je stade dedeade ae memorie di chê zornade. I mascjos a vevin pôre che cualchidun al podès pensâ che cualchi altri, a viodilis, al varès calcolât la Resistence tant che une robe di feminis! Ma lôr, cence nancje voltâsi indaûr, a àn pretindût di passâ indevant, cun tant di pistolis e di metraiadôrs. Braurosis, e pûr cussientis che la vuere, sù par ca, no jere ancjemò finide. Tant che ai 2 di Mai, i Karstjäger des Waffen SS, judâts dai fassiscj talians, dilunc la vie de lôr ritirade a fasaran un maçalizi in Vasinis, cuintri la popolazion civîl. Ma sintìn lis resons propit di une di lôr, non di bataie: Clorinda. Une partigjane cjargnele che no à vude pôre di scombati. Ancje par nô!
◆ “Nus clamavin Banditen. Parcè che o scombatevin in bande. Ma chel cartel picjât sul cuel intant che o pindulavin di un pâl de lûs o dal telegraf al voleve significâ che par lôr o jerin colpevui di disubidience cuintri la leç. La lôr leç! O ai simpri pensât che une leç no sedi juste dome tant che leç. Une leç contrarie ai principi dal Uman si scuen disubidîle. Bisugne fâsi bandîts. Par une femine, une sielte cussì grave e je stade ancje plui dificile che no par un om. Cemût fâstu a decidi di bandonâ i fîs, i vecjos di cjase? Dal moment che o sin simpri noaltris che o badìn a chei che a àn plui di bisugne. Lu vin fat par secui. La nestre decision e je stade morâl, prime che politiche. Mestris, operariis, studentis, contadinis. Nol impuartave la nestre divignince. Sposade o “signorine”, zovine o vecje. Nus disevin: “un voto per ogni moschetto”. Benon. O vin ancje sbarât. E par chest o vin pretindût di votâ! Subit: par decidi, insiemi cui nestris oms, di ogni cuistion: de vite come de muart. la nestre. Chê di chei atris. Puaris mai nô, se nus cjapavin vivis. Umiliadis, violadis, torturadis prime di jessi massacradis o depuartadis. Jo o soi finide a Ravensbruck. Il cjamp di stermini pes feminis gjestît des feminis. Tradide di un om che al pretindeve di vê di me un amôr che nol meretave. Une dì la Kapo mi ordene di lâ a cjoli un seglot di patatis, dentri di une tende nere, tirade sù propit tal mieç dal cjamp. Sul principi no rivavi a capî: la puce, la penombre, i laments. Ma cuant che i voi e il nâs si son usâts, mi soi rindude cont di cjatâmi devant di une montagne di cuarps: cualchidun si moveve, al tirave i voi, al vierzeve la bocje cence dincj, al slungjave lis mans. Il seglot mi è colât dal spavent e une patate e je rodolade dongje di chel Infier. Alore chel mussulin uman al à tacat a movisi come se al fos un organisim dolorôs che al cirive di cjapâ sù chê patate cun mil mans, di mangjâle cun mil bocjis. Ce restavial di uman? No in lôr, puarins… ma in chei che ju vevin condanâts a pierdi la lôr Umanitât? In chel moment o ai capît di vê combatût ancje par chest: par che voaltris no si dismenteais mai di restâ Umans. Fin insom. Fin ae Fin”. ❚