Midiant de storie dai cognons furlans, si fâs ancje la storie dal nestri Friûl. Chest mês us proponìn 5 cognons DOC, che a si cjatin dome ca: se a ‘nd è fûr vie, dal sigûr a son furlans lâts a stâ vie pe Italie.
(gjavâts fûr di «I cognomi del Friuli» di Enos Costantini e Giovanni Fantini ed. La Bassa/LithoStampa. O ringraciìn i autôrs pe disponbilitât e pe colaborazion).
COSTAPERARIA
Dongje Vernâs, tal comun di Sant Pieri dai Sclavons, e je une localitât parade dal aiar, une vore juste pe coltivazion des pomis, massime dai piruçs. I furlans le àn clamade Cueste Perarie, deventât par talian Costaperaria, duncje “cueste di mont plene di piruçârs”. 1642 filius Tomae di Costaperaria di Vernaso; 1698 filius Caspari Costaperaria de Costaperaria.
CANTARUTTI
Plui di une lis ipotesis su la origjin dal cognon. Fra chestis il “cantar” che al è il pitêr, ma ancje “carantanut” che al starès par diminutîf di “carantan”, duncje persone di pôc valôr o che e ven de Carinzie. Une volte, però, Cantarutto al jere un non di persone: tal 1294 un oresin clamât cussì al lavorave a Cividât. Al ven dal todesc Kuntar, deventât par furlan Kontar cul sufis – ut e il passaç di “o” a “a”. Cheste, forsit, la strade plui juste par capî il non. 1470 Ant. Cantarut da Cisterna; 1589 Sig. Gio Batta Cantarutto da Cividale fattore dei nobb. Trovamalla.
PASSON
Al vûl dî “pascul” e al jere une vore di voghe, ancje in planure, tant di lassâ toponims tant che Passons, dongje Udin. Lis formis Passon e Passone si cjatin massime a Udin e a Mortean. Passoni a Manzan. 1589, 15 aprile don Battista Passone capp. Faedis – registrata assoluz. da irregolarità per concubinato; 1767 Sebast. Passon, cameraro Fraterna S. Nicolò d’Oleis.
CODUTTI
Cun ogni probabilitât dal stranon codut , diminutîf di “code”, dât – par esempli – al ultin nassût de famee. Avonde comun a Morùs, si cjatilu ancje a Martignà, Pasian di Prât, Udin, Tavagnà e Pagnà. 1553 Giovanni di Plasentino detto Codut q. Colao Cumini di Torreano (di Martignacco); 1612 Valentino Codut da Brazzacco accusato di espressioni eretiche.
ROIATTI
Di roie, cun sufìs di dispresi, duncje non o stranon dât a cualchidun che, par lavôr, al veve a ce fâ cun la roie. Al podarès jessi ancje il talian di ruat (riul), ma al cambie pôc. 1649 Sig, Giacomo Roiatto causidico in Cividale.❚