Comission Von der Leyen 2, dopo des audizions in Setembar, ae fin di Otubar al rivarà il vôt dal PE

Ai 18 di Lui stâts il Parlament European (PE) al veve votât pe presidente de Comission Europeane (CE), confermant in chê funzion Ursula Von der Leyen. Doi mês plui tart, ai 17 di Setembar, la stesse presidente e à presentât ae assemblee plenarie di Strasburc la liste di chei che a varessin di jessi i components de CE.
◆ Daûr di chês che a son lis previsions dai Tratâts de Union Europeane (UE), la lôr designazion e ven fate su la fonde di un acuardi jenfri la Presidente de CE e i guviers dai Stâts che a fasin indenant lis lôr propuestis daûr di trê criteris di fonde: “la competence gjenerâl”, “l’impegn european” e “lis garanziis di indipendence”. La lôr liste e ven fate buine ancje dal Consei de UE, ma pe lôr jentrade in funzion i “comissaris” a àn di vê ancje il vôt a pro dal PE, che dopo de presentazion dai lôr nons al varès di esprimisi inte sentade plenarie dai 24 di Otubar. Par chel, cundut che la lôr indicazion di partence e rive dai guviers e che a àn za vude la “benedizion” dal Consei dei UE che al è un dai orghins de Union che al palese in maniere direte la sô componente intergovernative, nol è coret dî che i components de CE a son rapresentants direts dai Stâts e a son fûr scuare lis declarazions e lis valutazions in cont de liste dai “comissaris” che vie pes setemanis passadis a son saltadis fûr in particolâr ator pal Stât talian.
◆ Il PE al interprete chest rûl di valutazion dai components de CE cuntun nivel di atenzion simpri plui alt. Za in passât al veve mostrât chest ategjament responsabil, cemût che si visin par sigûr, tra i tancj, il talian Rocco Buttiglione, che tal 2004 al fo il prin a jessi fermât de aule di Strasburc, e la slovene Alenka Bratušek e la francese Sylvie Goulard, fermadis une tal 2014 e chê altre tal 2019. In cheste ocasion i eurodeputâts a àn domandât par ordin la liste dai vincjesiet “comissaris” designâts e a àn fat une audizion di passe cuatri oris. Cumò la conference dai presidents dai grups parlamentârs e à di prontâ une propueste di risoluzion di aprovazion de gnove CE, che e varès di jessi discutude e fate buine, a maiorance semplice dai vôts, dentri de fin di Otubar. Dopo dal vôt di Strasburc la vuide de CE e varà di vê il vôt a pro, a maiorance cualificade, dal Consei European, l’orghin formât dai cjâfs di Stât e di guvier. Al è probabil che la seconde Comission vuidade di Ursula Von der Leyen e sarà operative tacant dai prins di Novembar.
◆ La ativitât dal gnûf PE, impen, e je za in plene. Tra Strasburc e Bruxelles i eurodeputâts elets dai 6 ai 9 di Jugn stâts a àn za vût il lôr bon cefâ, no dome pe valutazion de liste dai comissaris, ma ancje pe lôr organizazion interne e par frontâ diviersis cuistions. Un dai dossiers plui impegnatîfs al è chel de poie economiche e militâr ae Ucraine. In cont di chest argoment il PE al à discutût e po al à fat buine ai 18 di Setembar stâts cun 425 vôts a pro, cun 131 cuintri e cun 63 astensions une risoluzion che e domande ai Stâts membris de UE di permeti ae Ucraine di «meti in vore ad implen il so dirit di difindisi» e par chel di «gjavâ vie daurman lis limitazions tal ûs dome in funzion difensive e intal teritori ucrain des armis che a vegnin dadis al guvier di Kyiv». Il document e la sô preparazion a àn palesât plui di cualchi contradizion, dentri sei dai grups parlamentârs che dai partîts politics, cence dismenteâ chês che a tocjin in gjenerâl il rûl de UE intal conflit rus ucrain. Al è propit cun riferiment a chest aspiet che diviers eurodeputâts no àn votât a pro. Par esempli a àn votât cuintri il basc Perrando Barrena Arza di EH Bildu, dal grup de Çampe europeane e la basche Ana Mranda (Bloque Nazionalista Galego – BNG) dal grup Verts/Aleance Libare Europeane, intant che in chel stes grup la catalane Diana Riba (Esquerra Republicana de Catalunya – ERC) si à astignude. ❚