Consultazion digjitâl pe indipendence dal Friûl

Marco Serafin, 48 agns, di Palme, al lavore tant che libar professionist. Al è il puartevôs di “Res Publiche Furlane”, il moviment che al à inviât il referendum pe indipendence dal Friûl (cence che i partîts che o cognossìn za a metessin il bec). Lu vin sintûts par capî lis intenzions dal grup.
Serafin, in tancj no san cui che o sês.
O sin nassûts in gracie aes ideis di cualchi persone, tra chestis al è il nestri ideolic: Adriano Biason. Lôr a àn scomençât a meti in discussion il sisteme dulà che o sin finîts. Si sin cognossût par câs, o jerin in doi-trê, sul imprin, sîs mês za fa. Cumò o sin une cincuantine. E je stade pardabon une robe casuâl, si sin cjatâts su Facebook, e po si sin incuintrâts dal vîf intun bar di Codroip. O vin scomençât a fevelâ di Friûl e di cemût movisi par fâ alc…
Il vuestri program?
Il referendum al sarà la piere miliâr. Di lì o scomençarìn. O vin voie di jessi i partidants di un Friûl indipendent e libar: tornâ a jessi ce che o jerin prime che e rivàs la Italie: vê un Parlament nestri e decidi noaltris il nestri stes destin. L’autonomisim cemût che nus è stât proponût nol si pues fâ e no nus plâs plui.
O sês stâts tacâts ancje de Glesie che apont e dîs che la strade di tignî e je l’autonomisim.
Ur volarès ricuardâ ai predis de Arcidiocesi di Udin che cui che vuê al fevele di autonomisim al à simpri molât i bregons tai confronts dal Stât. Cui che al fevele di autonomisim lu fâs dome par mantignî un “status quo”, il stât atuâl des robis. Nol è cambiât nuie!
E voaltris ce proponêso?
Intant o sperìn te partecipazion de int. O savìn che i furlans a son stufs di cheste maniere di vivi. Al è un sintiment di stufe gjenerâl. Dopo agns di ricetis autonomistichis sbaliadis, o vin voie di cambiâ. Nus àn freât, nus àn fat sintî simpri inadeguâts, sbaliâts, tal nestri jessi furlans.
Par chest referendum, ce quorum si sêso proponûts?
No si sin proponûts un “nivel minim”. Al è un salt tal scûr. Al sarà ce che al sarà.
Dacuardi. Ma dopo?
Dopo cun chescj numars si movarìn a nivel internazionâl: o domandarìn acet li de Onu. Si movarìn a nivel di Nazion Unidis: o contatarìn personalitâts par fâ savê che il popul furlan al à dibisugne di autonomie de Italie. Al sarà il ricognossiment dal popul furlan.
Ma lui saial che te Costituzion taliane al è improibît un distac teritoriâl?
La nestre propueste ae Onu no colarà tal nuie: e sarà cjapade in considerazion, parcè che altris nazions, plui piçulis dal Friûl, a son stadis scoltadis. Che al cjali il Kosovo o cualchi Stât de ex Union Sovietiche.
E se e va mâl?
O lavorarìn pal disvilup di une cussience dal popul furlan, restant apolitics e apartitics. E pacifiscj.
A proposit, i partîts tradizionâi cemût àno reagjît a cheste vuestre idee?
Sans e lontans. I politics, ju tignìn a distance. O vin viodût in Italie che la politiche e je al servizi di pôcs. Duncje se o vessin di poiâsi sui politics, o falarìn prime di scomençâ.
Ancje il Venit al veve organizât un referendum cualchi mês za fa. Sêso in contat cun lôr?
Cul Venit, ju vin vûts i contats, ma cumò o preferìn lavorâ e restâ autonoms. Chest al è un referendum che al rivuarde dome il Friûl. Nus àn dât ancje dai raziscj tai confronts di Triest. Ma noaltris o vin fat cheste sielte, par vie che e rivuarde dome il popul furlan, che al è ben distint di triestins e venits.
Cheste vuestre iniziative, cemût podaressino definîle: une propueste o une provocazion?
Un disveâsi des cussiencis.
E il gnûf Stât cemût lu clamarêso?
Republiche dal Friûl. O vin za i candidâts di un Parlament Furlan, che al sarà elet dutun cul referendum. Duncje, subit dopo, a saran decidudis dutis lis azions di meti in vore. Ma prin di dut, il ricognossiment Onu.
La capitâl?
La vin za sielte cuntun sondaç online. A jerin trê in bal: Aquilee, Udin e Cividât. E à vinçût Aquilee. Dut si fasarà lì.
Lui al à dite prime, che il vuestri moviment al è a-partitic, che i politics ju tignîs lontans. I domandi: se o varês un parlament, cun ce lu pensaiso di implenâ se no cui partîts?
Lis fuarcis politichis a jentraran, ma dopo. Ai candidâts o vin fat une propueste serie: meti di bande lis lôr ideis personâls a pro de cause de indipendence dal Friûl, in cheste prime fase “costituent”. Dopo sì, ognidun al sarà libar di costituî il so grup politic.
Cjalant la liste dai candidâts al Parlament furlan, si cjatin tancj fantats dal Friûl ocidentâl. Chest al è un dât interessant se o pensìn che il cûr autonomistic al à simpri batût di ca de aghe. Cemût si spieghial?
Di là dal Tiliment si concentre une fuarte zone dal Friûl dal pont di viste produtîf e dal cumierç. Lôr si son rindûts cont di bessôi che la situazion e je vuê ingovernabile propite sul front economic. A vuelin tornâ indaûr, scomençâ di gnûf dal principi, tant che republiche furlane. Nô o mantignarìn i cjampanii cemût che a son cumò, cence sierâ lis puartis a nissun. Par fâ un esempli, i zovins di Pordenon, no ju oblearìn a imparâ il furlan, ma ju lassarìn libars di mantignî lis lôr peculiaritâts.
Vele, la cuistion lenghe. Passe cualchi slogan e la titolazion di “Parlament furlan”, di lenghe furlane si viôt pôc. Ancje il sît al è dut par talian, a part i somaris de homepage.
Il pont al è che nô o rivìn di 150 agns dulà che nus àn imponût il talian, e gjavât dut il rest: la nestre storie e la nestre lenghe. Cence nuie gjavâ a cui che al fevele talian e i siei dialets, la nestre posizion e je che il furlan al sarà la lenghe uficiâl de Republiche furlane. Ancje a livel Onu, al sarà ripuartât cussì. ❚
✒ Oscar Puntel