CONTE. Un brut dopodimisdì

Vigji e Luzie a morosavin aromai di doi agns e no si podeve imagjinâ une cubie piês parade dongje. Lui su la trentine, alt, sec, cul nâs a bec, za un pôc plet e spelât, un om pratic, preseât cjâf cantîr, socialist par tradizion di famee e convinzion personâl. Jê une trapulute di vincjecinc agns che e someave di sedis, piçule, un pôc taronde ma dute muscui e gnerfs, une musute di agnul cun intor une cjavelade colôr panole riçote e dure come il fier. Laureade in filosofie ma cence catedre, e viveve di suplencis e lezions privadis. Rivoluzionarie ferbinte, e scombateve dì e gnot pal “riscatto del proletariato”. E jere la deane dal Comitât antiimperialist, dal Coletîf des feminis, dal Circul Tierç Mont e di dute une schirie di altris cunvignis metudis sù cun chê di disledrosâ il mont.
Cun dut chest Vigji e Luzie si volevin une vore ben. A barufavin dispès ma bastave une cjaminade vie pe taviele man te man e po une biele taconade par fâ la pâs. Cul timp – al pensave lui cheste fantate e gambiarà e magari e deventarà une buine mari di famee come tantis.
Cussì nol fo purtrop, par vie di chê manifestazion cuintri la vuere tal Vietnam, che lui nol voleve lâ e jê invezit sì e cussì a lerin ducj i doi, cun lui che al rugnave che al jere periculôs e jê che e cjantave imnis dute spasimade cence nancje sintîlu.
Vigji si ricuardave come se al fos cumò chel brut dopodimisdì dai prins agns Setante. Te place plene di int invelegnide no tirave une bave di vint. L’aiar al jere penç tant che l’ardiel. Intun cîl di plomp i nûi si doleavin come se a vessin il mâl di panze e no rivassin a sbrocâsi. Di une bande Luzie e i siei compagns che a intindevin rompi i cordons de Fuarce Publiche e lâ a parâ in fruçons il Consolât american. Di chê altre un trop di poliziots zovins, cu la muse di fruts dal tac, plens di ingòs, cui gnerfs tirâts pronts a tonâ di un moment a chel altri.
Po e jere partide jê di bessole, svelte tant che une fusete, par imbusâsi tra doi cuesturins e po rimpinâsi come un jeur sù pe aste de bandiere americane. Intun marilamp e jere rivade su la spice e un moment dopo il standart cu lis stelis e cu lis strichis al colave sbregât su la fole in deliri.
No ancjemò contente e veve cirût di butâsi su la terace dal Consolât cun chê di staronzâ ben e no mâl il Consul che si jere platât sot de scrivanie tremant di pôre come un cuninut. E veve doprât la aste aromai cence bandiere come sburt ma e jere sbrissade su la ringhiere de balconade e, colant par daûr, e jere lade a impirâsi propit su chel fier che, penetrât tra lis gjambis, le veve sbusade fûr par fûr intun mût che nancje Vlad l’Impaladôr. E jere muarte in Ospedâl dopo mieze ore di agonie, dulà che e veve cerçât l’infier in tiere, zigant, preant e blestemant dutun parcè che la morfine che i devin no rivave a bonâ nancje un pôc i siei spasims.
Il dolôr di Vigji no si rive a contâlu. Le veve bussade pe ultime volte in obitori prime che a sierassin la casse. I pareve che chei lavris di marmul i cisicassin alc ma nol rivave a capî ce.
La dì dopo si jere disnotât dal Partît, dal Sindacât e di dutis chês altri organizazions dulà che jê lu veve iscrit a fuarce. Po al veve dât un tai a dutis lis amiciziis e fat capî ancje ai parincj che a scugnivin lassâlu in pâs. Al voleve dome stâ di bessôl par coltâ dì e gnot il ricuart di Luzie, de sole femine che al veve pardabon amât inte sô vite, la sole che lu veve fat sintî un om vîf e vêr. Lui paron di jê, jê parone di lui e ducj doi parons dal mont soredut cuant che a fasevin l’amôr. In chei moments jê si dismenteave de politiche e si bandonave tra i siei braçs musculôs cui voi che a lusivin come boris e i cjavei zâi che a someavin la aureule di un agnul.
La sô memorie no veve di pierdi nancje un atim de vite fate insieme, no veve di dismenteâ nancje un piçul particolâr di jê. Dut l’afiet che si vevin dâts cence sparagn no si sarès smamît cul timp parcè che lui lu varès nudrît tal so cûr cun tante buine gracie.
Dome cussì – al pensave – o podarai continuâ in cualchi mût a vivi.
Ma chest ategjament psicologjic nol zovave a la salût mentâl di Vigji. Il mût maniacâl di tignî dongje la memorie di Luzie lu puartave diret tal esauriment gnervôs e a un pas de matetât. Al mangjave pôc, al beveve tant e nol durmive nuie. Ancje sul lavôr al veve scomençât a fâ monadis.
Fin che cualchidun di cualchi bande al à vût pietât di lui.
Une sere, tornant di vore, une femine sentade su di une banchine fûr de stazion i à fat segnâl di fermâsi. Lui i è lât dongje e il so cûr si è blocât parcè chê femine e jere Luzie, propit come che lui le ricuardave che nol varès podût sbaliâsi nancje tra un milion di lôr. Ma il so cuarp al jere plui sut, come se muscui e gnerfs si fossin suiâts e i cjavei colôr panole cumò a tiravin un pôc sul grîs.
Vigji si è sentât dongje di jê, cul cûr che i bulive. “No jeristu muarte, Luzie?” i à domandât a stupit vie.
“Se o soi ca dal dut muarte no soi”.
“Ma jo ti ai viodude te casse, tal obitori”.
E à sierât i lavris cence rispuindi.
“Ma dulà sêstu stade dut chest timp?”.
“In tancj puescj e in niò”.
Vigji le à cjalade di gnûf te lûs de stazion fin a fâsi dulî i voi parcè che nol voleve acetâ la tremende veretât che si svoluçave denant di lui.
Al varès volût tocjâle e cjareçâle ma al veve come pôre di viodile sfantâsi di un moment a chel altri. La musute e jere simpri simpri chê ma come sbatude no colôr di miluç madûr come une volte.
“No tu puedis contâmi nuie dal puest dulà che tu sês cumò, nomo Luzie?”.
“Propit cussì Vigjut”
Cul cûr che i sclopave lui i à metût un braç intor des spalis preant Diu e ducj i sants di podê tocjâ ancjemò chê cjar fuarte e compate che tantis voltis al veve cjareçât e bussât.
Ma il braç le à passade fûr par fûr.
“Ce sêstu vignude a fâ, Luzie?” al à cjatât la fuarce di cisicâ.
I voi di jê si son sglonfâts come cevolis.
“No sopuartavi plui di vioditi patî par me. Scoltimi Vigji, chel che al è stât al è stât e indaûr no si torne. O vevi di ubidîti chel maladet dopodimisdì e cumò o saressin insiemit e contents. O pûr si saressin lassâts prime o dopo parcè che une vere rivoluzionarie come me no podeve vivi par simpri cuntun biât socialist come te”.
“Luzie, jo cence di te no voi indenant, venmi a cjatâ almancul cualchi volte, magari in sium”.
“No Vigji, nol è pussibil, al è za tant se o ai podût vignî vuê. Gjolditi la vite tu che tu puedis o almancul acetile par chê che e je, ancje tal dolôr. Cumò o scuen lâ ma tu no stâ cjalâmi, no vuei che tu mi viodis deventâ aiar. Mandi amôr gno, ricuarditi che o continui a amâti ancje dulà che o soi cumò, cheste e je une des pocjis consolazions che mi restin”.
Cumò Vigji al vaive cence padin e cence cirî di tignîsi, cjamât di ingòs e di dolôr.
“Tu almancul tu puedis sbrocâti – i disè Luzie, cuntune vôs simpri plui lontane – lis fantasimis  invezit no puedin vaî”. ❚
✒ Adriano Nascimbeni