Cort Europeane dai Dirits dal om: la Audencia Nacional no je imparziâl

Al è alc che nol funzione intal sisteme de justizie dal Stât spagnûl. Al è ce che al salte fûr de croniche dai prins dîs dîs di Novembar, tra Strasburc, Madrid, la Catalogne e il Paîs Basc.
Ai 6 di Novembar stâts la Cort Europeane dai dirits dal om e à condanât il Stât spagnûl parcè che nol à garantît il procès just a Arnaldo Otegi, personalitât di ponte de çampe patriotiche e indipendentiste basche, in chel che al ven clamât “câs Bateragune” e che al rimonte a nûf agns indaûr.
Ai 13 di Otubar dal 2009, Otegi e altris nûf di lôr a vignivin metûts in galere cu la acuse di jessi daûr a tornâ a meti adun il partît Batasuna, che al jere stât metût fûr leç tal 2003, e di jessi dirigjents de ETA, e ai 16 di Setembar dal 2011 la cuarte sezion de cjamare penâl de Audiencia Nacional, vuidade de judice Ángela Murillo, par chel e condanave Otegi e l’ex segretari dal sindicât nazionalitari LAB (Langile Abertzaleen Btzordeak: Comissions dai operaris patriotics) Rafa Díez, a dîs agns di preson e a dîs agns di inabilitazion politiche. Chê stesse sentence, che ur dave une condane di vot agns di reclusion a cuatri dai arestâts e che e assolveve chei altris, e cjatave conferme sostanziâl ai 7 di Mai dal an seguitîf tal judizi dal Tribunâl Suprem, che però al riduseve il timp de pene detentive, par vie che al calcolave i imputâts “teroriscj”, ma no dirigjents de “organizazion teroristiche”, e soredut al vignive dât fûr cence unanimitât, parcè che lu fasevin bon dome trê judiçs su cinc. In particolâr, dai doi contraris un al jere a pro de assoluzion dai imputâts, che ju calcolave inocents e responsabii dome di ativitât politiche, e chel altri al jere pal anulament dal judizi di prin grât par vie de mancjance di imparzialitât de Murillo che si palesave te sô condote dal procès. Cussì Otegi e altri cuatri condanâts a presentavin ricors prime denant dal Tribunâl Costituzionâl, cence sucès, e po ancje li de Cort Europeane, che tal 2015 i dave acet juste ae domande di esaminâ la posizion de magjistrade de Audiencia Nacional. Dopo trê agns, Strasburc al conferme ce che al jere za stât marcât de bande dal Tribunâl Suprem: Murillo no jere imparziâl e par chel il procès nol è stât coret.
No je la prime volte che la imparzialitât de Audiencia Nacional e ven metude in discussion. In passe cuarante agns di ativitât, chel che al à cjapât il puest dal Tribunal de Orden Publico dai timps dal franchisim al à mandât in galere tant che “teroriscj” cetancj di lôr, dai ativiscj politics bascs e catalans fintremai ai gjornaliscj e ai musiciscj, dome par vie dal contignût di cualchi articul o di cualchi cjançon. In altris câs, e palese un altri ategjament: par esempli in chel di Manuel Murillo Sánchez (che al à il stes cognon de magjistrade, ma nol è so parint…).
Ai 7 di Novembar si à savût che l’om al jere stât metût in preson de bande dai Mossos d’Esquadra, la polizie autonome catalane, ancjemò ai 19 di Setembar stâts, par vie che al jere daûr a prontâ un atentât cuintri dal prin ministri spagnûl Pedro Sánchez, “colpevul” di vê chê di spostâ il cadavar dal ditatôr Francisco Franco dal mausoleu monumentâl di Valle de los Caìdos. Cundut che a cjase sô a àn cjatât un arsenâl e che il so intindiment violent al è palês, la Audiencia Nacional no à calcolât la imputazion di terorisim e e à decidût di lassâ il câs al tribunâl locâl di Terassa, in Catalogne. Che al sedi par vie che Manuel Murillo Sánchez al è “spagnolissim” e al à il cult dal Caudillo de España, intant che Arnaldo Otegi al è basc e al è stât un di chei plui impegnâts tal confront che al à puartât ae rinunzie definitive de lote armade de bande de ETA e po ancje ae sô dissoluzion? ❚
Marco Stolfo