Cuant che i gjambars a polsavin sui arbui

Cetancj gjambars no jerino une volte inte Cose e tai siei rius? Si movevin planc planchin te aghe nete e stralusinte, jenfri i claps e lis slavaris, e noaltris fruts si rivave a gafâju come nuie e a implenâ un zei di lidric tun marilamp. Ce bielece! Un ûf dongje, e la cene e jere pronte e soredut sauride.
◆ Po al rivà il bum economic, tirantsi daûr cetante chimiche par netâ i veris e lustrâ lis plancjis, e soredut par lavâ la massarie e i bleons. Cemût no doprâ Omo, un detersîf che ti dave “un bianco così bianco che più bianco non si può”? Cul risultât che in curt cudui, crots, pes e gjambars a son sparîts in chê aghe infetade.
◆ Ma podevino i gjambars sparî cussì, bot e sclop, cence lassâ une olme dal lôr passaç in chest mont? No dal sigûr. Tant plui che gjambars di flum e masanetis o cancars di mâr, crustacis cetant simii, ai son leâts a une simbologjie religjose impuartantone. Visìnsi ancje che chescj nemaluts a cjaminin in mût stramp, come dî che par lâ indenant a van… a cessecûl.
◆ Te basiliche di Aquilee, sul paviment in mosaic dal IV secul, si viôt un arbul cun sore un gjambar o cancar ros flame. Renato Jacumin, grant studiôs dal tratât gnostic clamât Pistis Sophia, nus à pandût che chest gjambar al rapresente la costelazion dal Cancar, dal moment che, tacant dal solstizi dal 23 di Jugn, il soreli, rivât al so massim di lûs, al scomence ben planchin a zirucâ viers il solstizi dai 23 di Dicembar, la dì plui curte e scure dal an. Ve alore che il gjambar al è une alusion a Crist Chronocrator (paron dal timp) che, cu la sô muart su la crôs, nus à salvâts ducj.
◆ Cun di plui i gjambars, tes pituris a fresc de Ete di Mieç, a comparissin dispès su lis taulis de Ultime Cene, dongje dal agnel eucaristic, sparniçâts ca e là jenfri pan e vin, plats, scudielis, tacis, carafis e curtìs (mai pirons, dal moment che lis cronichis a ripuartin che il prin piron – dal grêc peiro, impirâ – al rivà pe prime volte te casse nuviçâl di une principesse bizantine vignude a marît a Vignesie).
◆ Sul lôr simbolisim si à cetant discutût, ma forsit i gjambars a vuelin pandinus la prossime passion di nestri Signôr e la sô resurezion, dal moment che ancje i gjambars a son sogjets a une metamorfosi: di grîs e umii che a son di vîfs, a deventin ros flame e sflandorôs dopo cuets.
◆ Achì in Friûl, dôs a son lis Ultimis Cenis parecjadis cui gjambars: chê te glesie di Sant Andree a Grîs di Bicinins, e chê te glesie di Sant Grivôr a Cjistiel di Davian, piturade tal 1497 di Zuan Francesc di Tumieç. Une tierce e jere te gleseute di Sant Martin a Nert, che e fo fruçade, magari cussì no, dal tsunami dal Vaiont la gnot dai 9 di Otubar dal 1963.
◆ Se po o sês sul sagrât dal domo di Glemone, denant di chel bocon di Sant Cristoful di piere – fat tal 1327 dal mestri Giglio – biel che si prepare a passâ il flum, butait il voli dongje il pît diestri dal sant. O viodarês un biel gjambar cun tanaiis e antenutis, segn impuartanton di salvece, peât in maniere ideâl al non stes di Christophoros, ven a stâi chel che al puarte Crist fantulin a sachemule di là da la aghe.
◆ Se intant, a fuarce di torzeonâ par glesiis e di fevelâ di taulis parecjadis, di gjambars e di cenis us è vignude fam, fasêt ce che al à fat il biât Pinocchio che, saborât dai siei doi galups, al jentrà a mangjâ un bocon te ostarie dal “Gjambar ros”. Pal rest, se propit o volês viodi un gjambar, lait su internet.  ❚