Cuant che par risolvi la crisi Safau i furlans a àn savût lâ plui inlà de politiche

Intal 1981 la Safau e jentrà intune crisi profonde che si è risolte intal 1988. Siet agns une vore dificii, ancje parcè che al jere dut il setôr siderurgjic talian a jessi metût in discussion par vie di une sô capacitât produtive plui grande di chê che e jere la domande efetive dal marcjât. Tant che si devin grancj “premis di dismission” a chei che a sieravin i sîts siderurgjics. I dipendents de Safau tra Udin, Cjargnà e Cividât a jerin cica 800 e a vignivin di dut il Friûl.  Cirche il dopli a jerin i ocupâts intal indot. Une realtât economiche e sociâl une vore impuartante, duncje. Il sindicât teritoriâl dai metalmecanics, la mitiche FLM, e il Consei di Fabriche a àn sielt di gjestî in prime persone la situazion cence deleghis aes istancis superiôrs. 
◆ I nivei regjonâi metalmecanics e  confederâi  a son stâts coinvolts, sì, ma al jere propit il sindicât locâl a decidi e a tirâ i fîi. Sielte no dome oportune ma necessarie, che e à permetût che no passassin logjichis licuidatoriis, tant che il faliment, che cualchidun al justificave cul indebitament pesant de aziende cul stât grâf di dute la siderurgjie. In cualchi mût la vicende Safau e jessude dai puartons de feriere e si è trasformade intun probleme che al tocjave il  teritori,  la comunitât, insume il Friûl. A son stâts tancj i incuintris che il sindicât al à fat cui politics e cu lis istituzions locâls. 
◆ E i parlamentârs di chê volte si son impegnâts une vore, rivant a fâ jentrâ la Safau inte leç Prodi e, in chest mût, a conzelâ i debits e a tornâ a inviâ la ativitât produtive. In chei agns lis diferencis ideologjichis a jerin pardabon profondis. Che si pensi dome ae distance di vision che e jere tra democristians, comuniscj e socialiscj! Par altri, intun mont ancjemò dividût in doi blocs de tendine di fier. Ma Toros, Baracetti, Fortuna, Santuz, Pascolat e altris ancjemò si son mots in maniere unitarie pe Safau, cussì come che – pôcs agns prime – al jere stât pe ricostruzion post taramot. In lôr al prevaleve un grant sens di responsabilitât che e meteve tal prin puest il ben comun (chel ben comun che vuê,  invezit,  al ven tant riclamât ma par nuie perseguît). 
◆ Mario Toros  al sintetizave ben chê unitât virtuose tra diviers subiets cu la espression “fâ cuadrât ator de Safau”. Chei politics, dal rest, a àn dimostrât ancje in maniere seguitive il lôr amôr pal Friûl. Al baste pensâ a Arnaldo Baracetti che, insiemi cun Roberto Dominici, al à metût sù  il “Comitât pe Autonomie e il rilanç dal Friûl”, a Renzo Pascolat che  al à creât la “Associazion Friûl Europe” e a Giorgio Santuz che vuê al è da cjâf de “Associazion pe Tierce Ricostruzion”. E un rûl fondamentâl lu à vût la Glesie Furlane inte persone dal Arcivescul di Udin Alfredo Battisti che, ai 19 di Març dal 1981, dilunc de celebrazion de Pasche intal implant di Cjargnà, al à vût peraulis potentis e emozionantis a difese dai lavoradôrs. 
◆ Peraulis di motivazion che a son stadis un sburt par ducj i atôrs sociâi, politics e economics. Inte vicende de crisi de Safau, duncje, dopo di un prin curt periodi inciert, che al paiave ancje pes divisions, i sindicâts, i partîts, lis istituzions e lis associazions datoriâls a son jentradis in cjamp ducj insiemi par un sôl obietîf: salvâ la Safau. E, insiemi cu la Safau, si à salvât ancje la Bertoli e si à rilançât dut il setôr dai açâi speciâi. Sperìn che i grups dirigjents locâi di cumò a vedin in se almancul un pôc di chel amôr pal Friûl e pes sôs comunitâts. O vin pardabon bisugne! ❚