Bisugnave ancjemò ricjatâ lis fuarcis par tornâ dal dut in pîts, in chel aromai lontan Istât dal 1977, a cualchi mês des primis scjassadis che a vevin fat capî ai furlans che, magari cussì no, chel Orcolat rabiôs che al steve fiscant la lôr tiere nol jere dome un brut sium. Purpûr, chel drame colât di vuê a doman su la grope de int al veve sveât alc dentri dai sintiments e, adun cu la voie di tornâ a partî – cu la economie, cul drandran di ducj i dîs, cu la vite, in sumis – a tacarin a formâsi trops di associazions e grups che a rivendicavin plui dirits e autonomie pe identitât furlane. Jenfri chescj moviments, no si puedin dismenteâ chei che a puartarin ae nassite de Universitât dal Friûl, istituide cu la leç statâl 546 dal 1977 (articul 26), li che si lei clâr e net che il gnûf Ateneu logât a Udin al veve “di contribuî al progrès civîl, sociâl e ae rinassite economiche dal Friûl e di deventâ strument organic di disvilup e di rinovament dai filons origjinaris de culture, de lenghe, des tradizions e de storie dal Friûl”. Di ca, e tache une storie che chest an si pronte a taiâ il nastri dai 40 agns, par sigûr no facii e cun plui di cualchi sacrifici, ma simpri cuntun voli di atenzion al teritori. In ricognossince a chei che a àn dât il vie a cheste aventure, inviade ad in plen il prin di Novembar dal 1978, cul inizi dai prins cors di lauree, la Universitât dal Friûl e à in program dute une schirie di events, di mût che i students di vuê a sedin a cognossince dal valôr dal testemoni che ur à capitât sot man.
Il prin apontament al sarà chel dai 10 di Mai, te suaze de Setemane de Culture Furlane e di Vicino/Lontano, cu la scree de mostre “Nascita di un Ateneo. Dal terremoto una tenda per il futuro” e la cunvigne “Par un Ateneu furlan. I cuarante agns de Universitât dal Friûl”, par cure dal Centri Interdipartimentâl pal Svilup de lenghe e de culture dal Friûl – CIRF. Fin ai 25 di Mai, cun di fat, te jentrade di Palaç Antonini si podaran viodi i panei che a ricostruissin il percors de racuelte di firmis pe istituzion di une Universitât autonome, cun fotografiis e tescj metûts adun dal delegât dal Retôr pe Culture, Francesco Nazzi, che a saran insiorâts di strissons e manifescj de epoche, recuperâts di pueste pe ocasion. La conference si fasarà in sale Roberto Gusmani, a lis 5 dopomisdì, cun relatôrs, in plui dal curadôr de mostre, il professôr emerit Franco Frilli, za retôr dal Ateneu di Udin dal 1983 al 1992 e l’ex senatôr Diego Carpenedo, in chê volte conseîr regjonâl e partidant salt e atîf pe ricostruzion dal Friûl.
di Serena Fogolini