Friuli, Friûl, Friaul, Furlanija. Cuatri lenghis diviersis par dî la stesse robe. La nestre tiere, la nestre patrie, e à une ricjece culturâl, linguistiche, dal paisaç, storiche – e cetant che al sarès inmò di dî -, che il progjet che o vin in cûr di contâ, al centre in plen il valôr dal so grant e inestimabil patrimoni.
Il progjet si clame Friaûlij, cuntun simpatic zûc, une fusion di peraulis, tra lis diviersis lenghis che a nomenin il Friûl e che in Friûl si fevelin. Un tiermin gnûf che al misclice furlan, sloven e todesc, par une iniziative che si propon di creâ un repertori linguistic rinovât, sicu ancje testemoneance de situazion linguistiche atuâl. Un grup di une ventine di colaboradôrs, tra students, singui e circui culturâi, par une opare divulgative e informative che si concretize midiant dal blog http://friauulij.blogspot.it e de pagjine facebook friauulij, che us invidìn a consultâ cun frecuence. Une realtât che e cîr simpri gnûf colaboradôrs, par slargjâ lis fuarpiis dai temis, dai argoments, des discussions. Par fâlu, al baste scriviur, lant tal lôr sît o usant il recapit redazione.friaulij@gmail.com
Tra lis iniziativis plui resintis dal grup Friaûlij, o vin biei articui sul Pali di Sant Donât, che si è tignût come ogni an a Cividât, ma ancje riflessions une vore interessantis come chê dal titul “Cemût i austriacs nus viodino e ce podìno ufrî al dì di vuê?”, o lis “Leiendis popolârs: la barcjute di Sant Pieri e Sant Zuan te basse furlane”, e tancj altris sponts di riflession, coments, argoments, ducj intes trê lenghis feveladis chi di nô in Friûl. Un sît che si inzorne dispès, come la pagjine facebook, par une iniziative tacade tal mês di Fevrâr e che e cres di dì in dì. Il prin post al jere “Lis variazions dialetâls dal furlan de basse furlane”, e “Introduzion al furlan ocidentâl”. Une maniere serie e atuâl par fâ cognossi ancje lis tipichis fevelis locâls de lenghe furlane.
Al è impuartant e si scuen infin nomenâ lis associazions che a sostegnin il progjet: il Circul Culturâl Sauran Fulgenzio Schneider, il Circul Culturâl Resian Rozajanski dum, Astore FVG e il Circul Culturâl Sloven Rečan Aldo Klodič. Une biele intese di realtâts diferentis, che si inzegnin insiemi par fâ cognossi intes plui variis formis e tes diviersis lenghis la grande varietât dal Friûl, o ancje Friaul, Furlanija e parcè no, un neologjisim: Friaûlij. Lâ a viodi, lei e informâsi par crodi.
di Alessio Screm
__________________________________________________________________
Associazions di zovins te storie resinte: 3 esemplis
Tra lis associazions che si son cetant impegnadis e che si dedichin cun grande operositât ae cause furlane, sostignint cun iniziativis divulgativis e artistichis la lenghe e dute la culture, a ‘nd è trê che a meretin une juste atenzion. Tra l’altri, dutis nassudis tal 1995. Fin tal cûr dal vivarôs e vari mont furlan, chestis realtâts a àn operât e a operin in sinergjie strente cu la int, cu lis pro loco, cu lis parochiis, sburtant dal di dentri dute une schirie di iniziativis cun costance e cressite.
Une di chestis e je la Academie dal Friûl, nassude a Udin cul intent primari di promovi l’implei professionâl de lenghe furlane, il disvilup di une cussience identitarie fuarte, dutune cu la difese dai dirits e dai interès dai students furlans tal gjenerâl, come che al recite il Statût. Prin dean de Academie dal Friûl al è Albert Travain, che insiemi a chei altris socis al à tacât a proponi ativitâts par furlan dentri dal Ateneu furlan, che in chei agns al jere ancjemò indaûr su la cuistion de lenghe. La intenzion fuarte e jere, e e je ancjemò, che il furlan al fos doprât in ducj i cjamps, e plui di dut in chei fondamentâi dal lavôr e dal studi, e si viodeve e si viôt inte universitât la scune ideâl par inviâ chestis dinamichis.
Ancje la Associazion culturâl La Grame, nassude ancje jê tal 1995, a Merêt di Tombe, si dimostre vivarose. Metint dongje un grup di zovins dal Friûl di mieç, il so lavôr al è chel di recuperâ un patrimoni di cognossincis e di esperiencis imparadis tal timp di diviers operadôrs culturâi. Cunvignis, spetacui, concierts, teatri, cine: cheste e je la note carateristiche de La Grame. Tra lis oparis plui significativis o nomenìn “Il Terzo Leone”, un film produsût di lôr su la storie dai Benandants, un luncmetraç che al rapresente la prime produzion cinematografiche furlane moderne. Lis Gnots Furlanis, fieste estive de lenghe, culture e des arts dal Friûl, e inmò, Il Gramon, une serie di incuintris di atualitât e di politiche culturâl, lis ativitâts didatichis intes scuelis, la golaine di libris di narative e di contis La Grame Edizions, a son lis lôr principâls e fortunadis iniziativis.
Infin e merete di jessi cognossude la Associazion FAntats Furlans (FAF). In passe 20 agns di ativitât – che si è sierade cuntune cene sociâl di doi agns fa -, a son i prins che a àn produsût maiutis par furlan, po dopo adesîfs, gadgets e ancje une schirie di libruts intitulade Fregul, stampâts sul model de golaine Mille lire. Par agns a son simpri stâts in prime file par ogni iniziative a pro dal Friûl, come la racuelte di firmis par vê une sede Rai a Udin. Tra i membris, il nestri diretôr Dree Venier, Gianni Stelitano, prin laureât discutint tesi e esams orâi in lenghe furlane te Universitât dal Friûl, Stefania Garlatti-Costa, autore di traduzions e di libris didatics tant che Lenghe. Cors di Furlan (CUF, 2008), Massimo Garlatti-Costa (cumò regjist di documentaris, tancj par furlan), e tancj altris.
A.S.
